މުޅިން އަލަށް ޔޫރޯއަށް ކޮލިފައިފި ޖޯޖާ އާއި ބައްދަލުކުރި މެޗުގައި ތުރުކީގެ ޒުވާން ފޯވާޑު، އާރދާ ގޫލާރ ކާމިޔާބުކުރި ރީތި ގޯލާއެކު، މުބާރާތުގައި ކުޅުނު ފުރަތަމަ މެޗުގައި ގޯލެއް ކާމިޔާބުކުރި އެންމެ ޒުވާން ކުޅުންތެރިޔާގެ މަގާމު އޭނާ ހޯދައިފިއެވެ.

ސްޕެއިންގެ ގަދަ ބާރު، ރެއާލް މެޑްރިޑަށް ކުޅެމުން އަންނަ ގޫލަރގެ މި ރެކޯޑު ކުރިން އޮތީ ޕޯޗުގަލްގެ ކްރިސްޓިއާނޯ ރޮނާލްޑޯގެ އަތުގައެވެ. ރޮނާލްޑޯގެ ގޯލު ފެނިގެން ގޮސްފައިވަނީ 2004 ވަނަ އަހަރުގެ ޔޫރޯގައެވެ. އެއީ އެ މުބާރާތުގައި ޗެމްޕިއަންކަން ހޯދި ގްރީސްއާ ދެކޮޅަށް ކުޅުނު ގްރޫޕް ސްޓޭޖުގެ ފުރަތަމަ މެޗުގައެވެ. މި ގޯލު ކާމިޔާބުކުރި އިރު ރޮނާލްޑޯގެ އުމުރަކީ 19 އަހަރާއި 128 ދުވަހެވެ. އަދި ޖޯޖާ ކޮޅަށް ގޫލަރ އޭނާގެ ޔޫރޯގެ ފުރަތަމަ ގޯލު ކާމިޔާބު ކުރި އިރު އޭނާގެ އުމުރަކީ 19 އަހަރާއި 114 ދުވަހެވެ.

ޔޫރޯގައި ގޯލެއް ކާމިޔާބުކުރި އެންމެ ޒުވާން ކުޅުންތެރިޔާއަކީ ސްވިޒަލޭންޑުގެ ޖޯހަން ވޮންލަންތެންއެވެ. އުމުރުން 18 އަހަރާއި 141 ދުވަހުގައި ވޮންލަންތެން ރެކޯޑު ފޮތުން ޖާގަ ހޯދި ގޯލު ކާމިޔާބުކުރީ ފްރާންސް އާ ދެކޮޅަށް ޔޫރޯ 2004 ގައި ކުޅުނު މެޗެއްގައެވެ. ނަމަވެސް އެ މެޗުގައި ސްވިޒަލޭންޑު ވަނީ 3-1 އިން ބަލިވެފައެވެ. އޭނާގެ ކުރިން އެ ރެކޯޑު އޮތީ އިނގިރޭސިވިލާތުގެ ވޭން ރޫނީގެ އަތުގައެވެ.

ޔޫރޯގައި ގޯލު ކާމިޔާބު ކޮށްފައިވާ އެންމެ ޒުވާން ކުޅުންތެރިން:

ޖޯހަން ވަންލޮންތެން –    18 އަހަރާއި 141 ދުވަސް (ޔޫރޯ 2004)

ވޭން ރޫނީ –          18 އަހަރާއި 237 ދުވަސް (ޔޫރޯ 2004)

ރެނާޓޯ ސަންޗޭޒް –      18 އަހަރާއި 317 ދުވަސް (ޔޫރޯ 2016)

ޑްރަގަން ސްޓޮކޮވިޗް –    19 އަހަރާއި 108 ދުވަސް (ޔޫރޯ 1984)

އާރދާ ގޫލާރ –         19 އަހަރާއި 1144 ދުވަސް (ޔޫރޯ 2024)

ކްރިސްޓިއާނޯ ރޮނާލްޑޯ –  19 އަހަރާއި 180 ދުވަސް (ޔޫރޯ 2004)