ޔޫއެފާ ޔޫރޯގެ ތާރީހުގައި އެންމެ އަވަހަށް ކާމިޔާބުކުރި ގޯލު އިޓަލީއާ ދެކޮޅަށް އަލްބޭނިއާގެ ނެދިމް ބަޖްރަމީ ކާމިޔާބުކޮށްފިއެވެ. އޭނާ މި ގޯލު ކާމިޔާބުކޮށްފައިވަނީ ޔޫރޯ 2024ގެ ގްރޫޕް-ބީގެ ދެވަނަ މެޗުގައެވެ.

އިޓާލިއަން ސީރިއާގެ ސަސުލޯއަށް ކުޅެމުން އަންނަ ބަޖްރަމީގެ މި ތާރީހީ ގޯލު ފެނިގެން ގޮސްފައިވަނީ، އިޓަލީއާ ދެކޮޅަށް ކުޅުނު މެޗުގައި ލިބުނު އެއްލުމެއްގެ ބޭނުން ހިފައި، މެޗު ފަށައިގެން 22 ސިކުންތުގެ ތެރޭގައެވެ.

ބަޖްރަމީ އެންމެ ފުރަތަމަ ފެނިފައިވަނީ ސްވިޒަލޭންޑުގެ ގައުމީ ޖާޒީގައެވެ. ސްވިޒަލޭންޑުގެ 15 އަހަރުން ދަށުގެ ގައުމީ ޓީމުން ފެށިގެން 21 އަހަރުން ދަށުގެ ގައުމީ ޓީމާ ހަމައަށް އޭނާ ވަނީ ކުޅެފައެވެ. އެއަށްފަހު ބަޖްރަމީ ނިންމީ އޭނާ ނިސްބަތްވާ އަލްބޭނިއާގެ ގައުމީ ޓީމަށް ކުޅުމަށެވެ. ސްވިޒަލޭންޑަށް އުފަންވި ނަމަވެސް އޭނާގެ މަންމައާއި ބައްޕައަކީ އަލްބޭނިއާގެ ދެމަފިރިންނެވެ.

Advertisement

އަލްބޭނިއާގެ ޖާޒީގައި ބަޖްރަމީ އެންމެ ފުރަތަމަ ފެނިފައިވަނީ 2021 ވަނަ އަހަރުގެ ސެޕްޓެމްބަރު މަހު ކުޅުނު 2022 ވަނަ އަހަރުގެ ވޯލްޑް ކަޕް ކޮލިފައިން މެޗެއްގައި، ހަންގޭރީއާ ދެކޮޅަށެވެ. އެ މެޗުގައި އޭނާ ކުޅެން ނިކުމެފައިވަނީ ބަދަލު ކުޅުންތެރިއެއްގެ ގޮތުގައެވެ.

އަލްބޭނިއާގެ ގައުމީ ޓީމަށް މިހާތަނަށް ކުޅެފައިވާ 24 މެޗުން ބަޖްރަމީ ވަނީ 5 ގޯލު ކާމިޔާބުކޮށްފައެވެ.