ރާއްޖޭގެ 5 ސަރަހައްދެއްގައި ބްލަޑް ބޭންކް ޤާއިމްކުރުމަށް ސަރުކާރުން މަސައްކަތް ކުރައްވަމުން ގެންދަވާ ކަމުގައި މިނިސްޓްރީ ހެލްތުން ވިދާޅުވެއްޖެއެވެ.

އެމިނިސްޓްރީން މިހެން ވިދާޅުވީ، މިއަދު ފާހަގަކުރާ ދުނިޔޭގެ ލޭ ހަދިޔާ ކުރުމުގެ ދުވަހާއި ގުޅުވައިގެން އާއްމު ކުރި ބަޔާނުގައެވެ. އެމިނިސްޓްރީން ވިދާޅުވީ، ހދ. ކުޅުދުއްފުއްްޓާއި އަދި ރ. އުނގޫފާރުގައި މިއަހަރުގެ ތެރޭގައި ބްލަޑް ބޭންކް ޤާއިމްކުރުމަށް ސަރުކާރުން މަސައްކަތް މަސައްކަތް ކުރައްވަމުން ގެންދަވާ ކަމަށެވެ.

މިނިސްޓްރީ އޮފް ހެލްތުން ވިދާޅުވީ، ދިވެހިރާއްޖެއަކީ ނިސްބަތުން ތެލަސީމިއާ ޕޭޝަންޓުން ގިނަ ގައުމަކަށްވާއިރު، ދިވެހިރާއްޖޭގައި ލޭ ބޭނުންވާ މިންވަރުވެސް އެހެން ގައުމުތަކާއި އަޅާބަލާއިރު އިތުރުކަމަށެވެ. އަދި ދިވެހިރާއްޖޭގައި ބޭނުންކުރެވޭ ލޭގެ ގާތްގަޑަކަށް 70 އިންސައްތަ ބޭނުންކުރެވެނީ ތެލެސީމިއާ ޕޭޝަންޓުންނަށް ކަމުގައިވެސް ހެލްތު މިނިސްޓްރީން ވިދާޅުވެއެވެ.

އެމިނިސްޓްރީން ވިދާޅުވީ، މިއަހަރަކީ މޯލްޑިވައަން ބްލަޑް ސަރވިސަސްގައި ނެގޭ ބްލަޑް އިތުރު ކުރުމަށް ޚާއްސަ ސަމާލުކަމެއް ދެއްވި އަހަރަކަށްވުމާއެކު އަދި ޚާއްސަކޮށް ލޭ އިތުރުކުރުމަށް ހިންގޭ ހަރަކާތް އިތުރުކުރުމަށް ކެބިނެޓުން ފާސްކޮށްފައިވާތީ، އެ މަސައްކަތް އިތުރަށް ހަރުދަނާ ކުރެވިފައިވާ ކަމަށެވެ.

މިއަހަރު ބައިނަލް އަޤުވާމީ ލޭ ހަދިޔާ ކުރާ މީހުންގެ ދުވަހުގެ ޝިއާރަކީ: “Share life Give blood”އެވެ.

ބައިނަލްއަޤުވާމީ ގޮތުން ފާހަގަކުރާ، ދުނިޔޭގެ ލޭ ހަދިޔާ ކުރުމުގެ ދުވަހަކީ، ކޮންމެ އަހަރެއްގެވެސް ޖޫން މަހުގެ 14 ވަނަ ދުވަހެވެ.