އިންޑިއާގެ ޢާންމު އިންތިޚާބު 2024ގައި ބާރަތިޔާ ޖަނާތާ ޕާޓީ (ބީ.ޖޭ.ޕީ) އާއި އެޕާޓީ އިސްވެ އޮވެ އުފައްދާފައިވާ ނޭޝަނަލް ޑިމޮކްރަޓިކް އެލަޔަންސް (އެން.ޑީ.އޭ) ހޯދި ކާމިޔާބީ ފާހަގަކުރައްވައި އިންޑިއާގެ ބޮޑުވަޒީރު ނަރެންދުރަ މޯދީއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ ނައިބު ޙުސައިން މުޙައްމަދު ލަޠީފް ތަހުނިޔާ ވިދާޅުވެއްޖެއެވެ.

ހަފްތާއަކަށް ދިގު ދެމިގެން ދިޔަ އިންޑިއާގެ އާއްމު އިންތިޚާބުގައި، މިހާރުވެރިކަން ކުރާ ބީޖޭޕީއަށް މެޖޯރިޓީއެއް ނުލިބުނެވެ. އެހެން ނަމަވެސް ބީޖޭއާއިން އެހެން ޕާޓީތަކާއި އެކު ހަދާފައިވާ އިއްތިހާދަށް ޕާލަމެންޓްގެ އަޣުލަބިއްޔަތު ލިބޭތީ ކޯލިޝަން ސަރުކާރެއް އެކުލަވާލައި، ބޮޑުވަޒީރު ކަމުގެ ތިންވަނަ ދައުރެއް ފުރިހަމަ ކުރެއްވުމަށް، ބޮޑު ވަޒީރު ނަރެންދުރަ މޯދީއަށް ފުރުޞަތު ލިބިވަޑައިގަންނަވައެވެ.

ރައީސުލްޖުމްހޫރިއްޔާ އިންޑިއާގެ ބޮޑުވަޒީރަށް މަރުޙަބާ ވިދާޅުވެ، އެކްސްގައި ކުރެއްވި ޕޯސްޓުގައި ތަރައްޤީއާ ހަމަޖެހުން ހޯދުމަށް އިންޑިއާ އާއި ދިވެހިރާައްޖެއާ ދެ ޤައުމު ގުޅިގެން ކުރެވޭ މަސައްކަތް އިތުރުވެގެންދާނެ ކަމަށް އުންމީދުކުރައްވާ ކަމުގައި ރައީސުލްޖުމްހޫރިއްޔާ ފާހަގަކުރައްވާފައި ވެއެވެ.

ބީޖޭޕީން ހޯދި ކާމިޔާބީއަށް ތަހުނިޔާ ދަންނަވައި، ރައީސުލްޖުމްހޫރިއްޔާގެ ނައިބު ޙުސައިނަް މުޙައްމަދު ލަޠީފް އެކްސްގައި ކުރެއްވި ޕޯސްޓްގައިވެސް ވިދާޅުވީ، ބީޖޭޕީ ސަރުކާރާއި އެކު އިންޑިއާ އާއި ދިވެހިރާއްޖޭގެ ގުޅުން އިތުރަށް ބަދަހިވެގެންދާނޭ ކަމަށް އުއްމީދު ކުރައްވާ ކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމަށް ވަޑައިގެންނެވުމަށް ހިންގެވި ކެމްޕޭންތަކާއި، ޕީޕީއެމްއިން ހިންގި އިންޑިއާ އައުޓް ކެމްޕޭންގެ ސަބަބުން، އިންޑިއާއާއި ދިވެހިރާއްޖޭގެ ޚާރިޖީ ގުޅުމަށް ބުރޫއެރިއެވެ. އަދި މިސަރުކާރުގެ މިނިސްޓަރުންގެ ނައިބު ފެންވަރުގައި ތިއްބެވި ބޭފުޅުންތަކެއް އިންޑިއާގެ ބޮޑު ވަޒީރަށް ފުރައްސާރަ ކުރުމާއި ގުޅިގެން އިންޑިއާއިން ރާއްޖޭގެ ޓުއަރިޒަމް ބޮއިކޮޓް ކުރުމުގެ ހަރަކާތްތައް ފެށިއެވެ.