ސަރުކާރުގެ ހުރިހާ ސްކޫލެއްގެ ކްލާސްރޫމްތައް އޭސީ ކުރުމަށް ކުރިޔަށް ގެންދާ ޕްރޮގްރާމްސް، "ކޫލް ސްކޫލް" ޕްރޮގްރާމް މިއަދު އިފްތިތާޙްކޮށްފިއެވެ.

މިޕްރޮގްރާމް މިއަދު އިފްތިތާހްކޮށްފައި ވަނީ އެކަމަށްޓަކައި ޚާއްޞަކޮށްގެން މިއަދު މާފުށީ ސްކޫލުގައި ބޭއްވި ރަސްމިއްޔާތުގައެވެ.

މި މަޝްރޫޢު އިފްތިތާހްކޮށްދެއްވީ، މިނިސްޓަރ އޮފް އެޑިޔުކޭޝަން އިސްމާޢީލް ޝަފީއު އެވެ.

މާފުށީ ސްކޫލް އޭސީ ކުރުމުގެ މަސައްކަތް ކުރިޔަށް ގެންދަނީ، މާފުށީ ކައުންސިލުން އިސް ނަގައިގެން، އެރަށުގެ ލޯކަލް އޮތޯރިޓީ ކުންފުންޏާއި ހަވާލުކޮށްގެންނެވެ. މާފުށީ ކައުންސިލުން ހާމަކޮށްފައިވާ ގޮތުގައި، މާފުށީ ސްކޫލުގެ ކްލާސްރޫމްތައް އޭސީ ކުރުމުގެ މަސައްކަތް އެއްމަސްދުވަހުގެ ތެރޭގައި ނިންމާނެއެވެ.

ސަރުކާރުން އަމާޒު ހިފާފައި ވަނީ ކޮމިއުނިޓީއާ ގުޅިގެން ސަރުކާރުގެ ސްކޫލްތައް އޭސީ ކުރުމުގެ މަސައްކަތް ދެއަހަރު ދުވަހުގެ ތެރޭގައި ނިންމުމަށެވެ.

މިރަސްމިއްޔާތުގައި، އެޑިޔުކޭޝަން މިނިސްޓަރ އިސްމާޢީލް ޝަފީޢު ދެއްކެވި ވާހަކަފުޅުގައި ސްކޫލްތައް އޭސީ ކުރުމަށް ބޭނުންވާ ކަރަންޓްގެ 30 އިންސައްތައަކީ، އިއާދަކުރަނިވި ހަކަތައިގެ ވަޞީލަތްތަކުން އުފެއްދޭ ކަރަންޓްކަމުގައި ހެއްދެވުމަށް ރައީސުލްޖުމްހޫރިއްޔާ އިރުޝާދުދެއްވާފައިވާ ކަމުގައި ވިދާޅުވިއެވެ.

ކަމުގެ ފަންނީ ތަޖުރިބާކާރު ބޭފުޅުން ލަފާކޮށްފައިވާ ގޮތުގައި ރާއްޖޭގެ ސަރުކާރު ހުރިހާ ސްކޫލެއްގެ ކްލާސް ރޫމްތައް އޭސީ ކުރުމަށް ބައި ބިލިޔަން ރުފިޔާ ޚަރަދުވާނެއެވެ.