މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން ފަލަސްތީނުގެ ނަސްލު ނެތިކޮށްލުމަށް އިޒްރޭލުން ހިންގަމުންދާ ޖަރީމާ މެދުކެނުޑުމެއްނެތި ކުރިޔަށްދަނިކޮށް، އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން މިހާތަނަށް ކުރި އެންމެ ވަރުގަދަ އަމުރު އިއްޔެ އިޒްރޭލުގެ މައްޗަށް ކޮށްފިއެވެ. އެގޮތުން އައިސީޖޭއިން އިޒްރޭލަށް އަމުރުކޮށްފައިވަނީ، ގާޒާގެ ރަފާއަށް ދެމުންގެންދާ ހަމަލާތައް ވަގުތުން ހުއްޓާލުމަށެވެ.

މި އަމުރަކީ ދެކުނު އެފްރިކާއިން ހުށަހެޅި މައްސަލައަކާ ގުޅިގެން އައިސީޖޭއިން ނެރެފައިވާ އަމުރެކެވެ. ދެކުނު އެފްރިކާއިން ހުށަހެޅި މައްސަލައިގައި އެދިފައިވަނީ ގައްޒާއަށް އިޒްރޭލުން ދެމުންދާ ހަމަލާތައް ވަގުތުން ހުއްޓުވުމުގެ އިތުރުން ރަފާހްއަށް އިޒްރޭލު ސިފައިން އަރައިގަތުން ހުއްޓުވައިދީ އިންސާނީ އެހީ ޣައްޒާއަށް ވެއްދުމުގެ އަމުރަކަށެވެ.

އައިސީޖޭގެ މި އަމުރާ ގުޅިގެން އިޒްރޭލުން ބުނެފައިވަނީ، އިޒްރޭލުން ހަމަލާތައް ހުއްޓުވައިފިނަމަ، ހަމާސްއިން އަލުން ބާރުގަދަކޮށް، ހަމާސްއިން ރަހީނުކޮށްފައިވާ އިޒްރޭލު މީހުން މިނިވަންކުރަން ހުރަސްއެޅޭނެ ކަމަށެވެ. އެހެންކަމުން އިޒްރޭލުން އެދިފައިވަނީ އެ މައްސަލަ ކޯޓުން ބޭރުކޮށްލުމަށެވެ.

އައިސީޖޭއިން އިއްޔެ މި އަމުރު ނެރެފައިވަނީ 13 ފަނޑިޔާރުންގެ އަގުލަބިއްޔަތުންނެވެ. އަމުރު ނެރުމާ ދެކޮޅުވީ ދެ ފަނޑިޔާރެކެވެ.

މީގެކުރިން ވެސް އައިސީޖޭއިން ވަނީ މިފަދަ އަމުރެއް ނެރެފައެވެ. ނަމަވެސް އެ ހުކުމުގައި އިޒްރޭލުގެ މައްޗަށް އަމުރުކޮށްފައިވަނީ ޣައްޒާގައި ގަތުލުއާންމު ހިންގުން ހުއްޓުވުމަކަށް ގެނައުމަށެވެ. ނަމަވެސް އެ އަމުރުގައި ހަމަލާތައް ހުއްޓައިލުމަކަށް ސީދާ އަމުރުކޮށްފައެއް ނުވެއެވެ.

ޣައްޒާއަށްދޭ ހަމަލާތައް ހުއްޓުވުމުގެ އަމުރަކަށް އެދިފައިވާއިރު، ފަލަސްތީނުގެ ރައްޔިތުންނާ ދެކޮޅަށް ހިންގާފައިވާ ޖަރީމާތަކާ ގުޅިގެން އިޒްރޭލުގެ ރައީސް ބެންޖަމިން ނަތަންޔާހޫ ހައްޔަރުކުރުމުގެ އަމުރަކަށް ވެސް އެ ކޯޓުގައި ވަނީ އެދިފައެވެ.