ރާއްޖެއަށް މިހާރު ކުރަމުންދާ ގަދަ ވިއްސާރައިގައި އިއްޔެ ހަވީރު އއ. ތޮއްޑޫ ހިމެނޭ ސަރަހައްދަށް ކޮޅިގަނޑެއް އައި ވަގުތު އެ ރަށުން މޫދަށް އެރި ތިބި ކުދިންތަކެއް އެ ކޮޅިގަނޑުގައި ޖެހި އެއްގަމަށް ނާދެވިގެން އުޅެނިކޮށް، އެ ކުދިން ސަލާމަތްކޮށް އެއްގަމަށް ގެނައުމަށް އެވަގުތު އެ ސަރަޙައްދުގައި ތިބި ސްޓެލްކޯގެ މުވައްޒަފުން ހަރަކާތްތެރިވެއްޖެއެވެ.

މި ހާދިސާއާ ގުޅޭ ފޮޓޯތަކުން ފެންނަ ގޮތުގައި، މޫދުގައި ރަށަށް ނާދެވި ތާށިވެފައިތިބީ 5 ފިރިހެން ކުދިންނެވެ. މަންޒަރު ފެންނަ ގޮތުން އެ ކުދިން ތިބީ ލޮނުގަނޑުން 5 ވަރަކަށް އިންޗި މައްޗަށް އޮތް ތޮށިގަނޑެއް ފާޑުގެ ތަނެއްގެ މަތީގައެވެ. މި ހާދިސާގައި އެއްވެސް ކުއްޖަކަށް އަނިޔާއެއް ވެފައެއް ނުވެއެވެ.

އަދި ހަމަ އެއާއިއެކު، ތޮއްޑޫއަށް އެރި މި ކޮޅިގަނޑުގެ ސަބަބުން ބިންދައިގެންދިޔަ ބައެއް ގަސްގަހުގެ ބައިތައް ގޭގޭގެ ފުރާޅު މައްޗަށާއި ގޯތި ތެރެއަށް ވެއްޓުމާއި ގުޅިގެން ލިބުނު ގެއްލުންތަކުން ސަލާމަތް ކުރުމަށާއި، އެ ގޮފިތައް ނަގާ ސާފުކުރުމަށް ވެސް ސްޓެލްކޯގެ ހީވާގި މުވައްޒަފުން ވަނީ ހަރަކާތްތެރިވެ، ރަށުގެ ރައްޔިތުންނަށް ފުރިހަމަ އެހީތެރިކަމެއް ފޯރުކޮށްދީފައެވެ.

ގެއެއްގެ ފުރާޅު މައްޗަށް ވެއްޓިފައި އޮތް ގަހެއްގެ ބައެއް ނެގުމަށް ސްޓެލްކޯގެ މުވައްޒަފުން ހަރަކާތްތެރިވަނީ، ފޮޓޯ: ސްޓެލްކޯ

މިކަމާ ގުޅިގެން އެ ކުންފުނިން ސޯޝަލް މީޑިއާގައި ކުރި ޕޯސްޓެއއްގައި ބުނެފައިވަނީ، ރައްޔިތުންނަށް ދިމާވާ މިފަދަ ކޮންމެ ކަމެއްގައި އެކުންފުނީގެ މުވައްޒަފުން އަބަދުވެސް ހިތްވަރާއި ކެރުމާއިއެކު އެންމެ އިސް ސަފުގައި ދެމިތިބޭނެ ކަމަށެވެ.

މި ވިއްސާރައާއި ގުޅިގެން ދަތުރުފަތުރު ކުރުމަށް ރައްކާތެރި ނޫންކަމުން ރާއްޖޭގެ މޫސުމާ ބެހޭ އިދާރާއިން ވެސް ވަނީ ކަނޑު ދަތުރުފަތުރު ކުރުމުގައި ސަމާލުވުމަށް އިލްތިމާސްކޮށްފައެވެ.