ބޮޑު ޗުއްޓީ ނިމި އާދީއްތަ ދުވަހު ސްކޫލުތަށް ހުޅެވޭއިރު ފުރަތަމަ ތިން ދުވަހު ކިޔަވައިދޭ ދަންފަޅިތަކުގެ ވަގުތު ކުޑަކޮށްގެން ކިޔަަވައިދިނުން ކުރިޔަށް ގެންދިޔުމަށް މިނިސްޓްރީ އޮފް އެޑިޔުކޭޝަނުން މިއަދު ސްކޫލުތަކަށް އަންގައިފިއެވެ.

ދިރާސީ އައު އަހަރުގެ ކިޔެވުން ފެށުމާއި ގުޅޭ ގޮތުން މިއަދު މިނިސްޓްރީ އޮފް އެޑިޔުކޭޝަނުން ސްކޫލުތަކަށް ފޮނުވި ސަރކިއުލާގައި ބުނެފައި ވަނީ، މިދުވަސްވަރަކީ، ރާއްޖޭގެ އެކި ހިސާބުތަކަށް ގަދަ ވަޔާއި އެކު ބޯކޮށް ވާރޭވެހި، ކަނޑުތައް ގަދަވުމުގެ ސަބަބުން ދަތުރު ފަތުރު ކުރުމަށް ބުރޫއަރާފައިވާ ދުވަސްވަރަކަށް ވުމާއި އެކު، ކުރިމަތިވެފައިވާ އުނދަގޫ މޫސުމީ ޙާލަތަށް ރިޢާޔަތްކޮށް، ދަރިވަރުންނަށް ފިލާވަޅުތައް ގެއްލޭ މިންވަރު ކުޑަކުރުމަށް އިންތިޒާމްތައް ހަމަޖެއްސުމަށްޓަކައި، އާދީއްތަ ދުވަހުން ފެށިގެން އަންގާރަ ދުވަހާއި ހަމައަށް، ސްކޫލުތަކުގެ ކިޔަވައިދޭ ދަންފަޅިތައް ކުރުކޮށް ގެންދިޔުމަށް މިނިސްޓްރީން ނިންމާފައިވާ ކަމަށެވެ. މިގޮތުން ކިޔަވައިދޭ ކޮންމެ ދަންފަޅިއެއްވެސް 2 ގަޑި އިރާއި، 3 ގަޑި އިރާއި ދެމެދަށް ފައްތައިގެން ކުރިޔަށް ގެންދިޔުމަށް މިނިސްޓްރީ ވަނީ ސްކޫލުތަކަށް އަންގާފައެވެ.

މޫސުމީ ހާލަތާއި ގުޅިގެން ދަތުރުފަތުރަށް ހުރަސް އެޅިފައިވާތީ، ކިޔަވައިދޭ ދަންފަޅީގެ ވަގުތު މަދު ކުރުމަށް މިނިސްޓްރީ އޮފް އެޑިޔުކޭޝަނުން ނިންމި އިރު، ދަތުރުފަތުރަށް ބުރޫ އެރުމާއި ގުޅިގެން ގިނަ އަދަދެއްގެ ދަރިވަރުންނާއި މުދައްރިސުން ރަށްރަށާއި މާލޭގައި ތާށިވެފައެވެ.

އަތޮޅުތަކުގެ ގިނައަދަދެއްގެ ޓީޗަރުންނާއި ދަރިވަރުން މާލޭގައި ތިބި އިރު، ރަށްރަށަށް މާލެއިން ޗުއްޓީއަށް ދިޔަ މުދައްރިސުންނާއި ދަރިވަރުންނާއި ބެލެނިވެރިން ތިބީ މާލެއަށް ނާދެވިފައެވެ. ރާއްޖެއަށް މޫސުމް ގޯސްވެ މާލެ ސަރަހައްދާއި އުތުރުގެ އަތޮޅުތަކަށް މިހާރުވެސް އޮރެންޖް އެލާޓް ނެރެފައިވާއިރު، ކުރިޔަށް އޮތް ތިން ދުވަހުވެސް މޫސުމް ގޯސްވާނޭ ކަމަށް މޫސުމާއި ބެހޭ ޤައުމީ އިދާރާއިން ވަނީ ލަފާކޮށްފައެވެ.