އިނގިރޭސިވިލާތަށް އުފަން ނައިޖީރިއާގެ އަޑެމޯލާ ލުކްމާންގެ ހެޓްރިކަކާއެކު ބެޔާން ލެވަކޫސެން 3-0 އިން ބަލިކޮށް، އެޓަލާންޓާއިން ޔޫރޮޕާ ލީގުގެ ތަށި އުފުލާލައިފިއެވެ. އަދި އެޓަލާންޓާގެ މި ކާމިޔާބާއެކީ، ލެވަކޫސެން ބަލިނުވެ ދަމަހައްޓަމުން އައި ރެކޯޑު ވެސް މިވަނީ ނިމުމަކަށް އައިސްފައެވެ. ޔޫރޮޕާ ލީގުގެ ފައިނަލް މެޗާއި ލެވަކޫސެން އެންމެ ފަހުން ބަލިވެފައިވާ ދުވަހާއި ދެމެދުގައި 361 ދުވަސް ހޭދަވެފައިވެއެވެ.

ޑަބްލިންގައި ކުޅުނު ފައިނަލު މެޗުގެ ހެޓްރިކާއެކު، ލުކްމާންއަކީ ޔޫރަޕިއަން ފައިނަލެއްގައި ހެޓްރިކް ހެދި ހަވަނަ ކުޅުންތެރިޔާއެވެ. އެންމެ ފަހުން ޔޫރަޕިއަން ފައިނަލެއްގައި ހެޓްރިކެއް ހަދާފައިވަނީ 1975 ވަނަ އަހަރުގެ ޔޫއެފާ ކަޕްގެ ފައިނަލުގައި ޖަރުމަނުގެ ބޮރޫޝިއާ މޮންޗެންގްލަބެޗްގެ ޖަޕް ހޭންކްސްއެވެ.

ލުކްމާންގެ މުޅި ކެރިއަރުގައި ވެސް މި މެޗުގައި ނޫނިއްޔާ އެއް ގޯލަށްވުރެން ގިނައިން އޭނާއަށް ކާމިޔާބު ކުރެވިފައެއް ނުވެއެވެ. ލުކްމާންވަނީ މީގެ ކުރިން ޗާލްޓަން، އެވަޓަން، އާރު. ބީ. ލެޕްޒިގް، ފުލަމް އަދި ލެސްޓާ ސިޓީއަށް ކުޅެފައެވެ. އަދި އޭނާ ވަނީ އެޓްލާންޓާއާއެކު މި ހޭދަކުރި ދެ ސީޒަނުން ކޮންމެ ސީޒަނެއްގައި ވެސް 15 ގޯލު ކާމިޔާބުކޮށްފައެވެ.

Advertisement

އެޓަލާންޓާގެ މި ކާމިޔާބަކީ އެ ކުލަބަށް ވެސް އެތައް ގޮތަކުން ވަރަށް ތާރީހީ ކާމިޔާބެކެވެ. އެ ގޮތުން އެ ޓީމަކީ 1999 ވަނަ އަހަރަށްފަހު މި މުބާރާތް ކާމިޔާބުކުރި އިޓަލީގެ ފުރަތަމަ ޓީމެވެ. އަދި މިއީ އެ ކުލަބުގެ 116 އަހަރުގެ ހަޔާތުގައި އެ ކުލަބަށް ހާސިލް ކުރެވުނު ދެވަނަ ތައްޓެވެ. މީގެ ކުރިން އެ ޓީމަށް ކާމިޔާބުކުރެވިފައިވަނީ 1963 ވަނަ އަހަރުގެ ކޮޕާ އިޓާލިއާއެވެ.

މެޗަށްފަހު ވާހަކަ ދައްކަމުން އެޓަލާންޓާގެ ކޯޗު ޖިއާން ޕިއެރޯ ގަސްޕެރީނީ ވަނީ މެޗުގައި ހެޓްރިކް ހެދި ލުކްމާންއަށް ވަރަށް ބޮޑަށް ތައުރީފުކޮށްފައެވެ. އޭނާ ބުނީ، ލުކްމާންގެ ފަރާތުން ފެނިފައިވަނީ ހީވެސް ނުކުރާފަދަ މޮޅު ކުޅުމެއް ކަމަށެވެ. އަދި އޭނާއަކީ އިނގިރޭސިވިލާތުގައި ކުޅުނުއިރު މާބޮޑަށް ފާހަގަ ކޮށްލެވުނު ކުޅުންތެރިއަކަށް ނުވިނަމަވެސް، އެޓަލާންޓާއަށް ބަދަލުވުމަށްފަހު ގަސްޕެރީނީ އޭނާ ބޮޑަށް އެޓޭކިންގައި ބޭނުން ކުރުމުން އޭނާގެ ކުޅުން އިތުރަށް ރަގަޅުވެގެން ދިޔަ ކަމަށް ބުނެފައިވެއެވެ.