ހުޅަނގު މޫސުމުގެ ވިއްސާރައާއި އެކު ރާއްޖޭގެ ސަރަހައްދަށް މޫސުމް ވަރަށް ބޮޑަށް ގޯސްވެފައި ވާއިރު ކަމާއި ބެހޭ ފަރާތްތަކުން އިލްތިމާސް ކުރަމުން ދަނީ ކަނޑު ދަތުރުފަތުރު މަޑު ޖައްސާލުމަށެވެ. ކަނޑުމަތީގެ ހާދިސާތައް މަދު ކުރުމަށް އޮތް އެންމެ ރަނގަޅު ގޮތަކީ، މޫސުމް ރީތިވާންދެން އެބަޔަކު ތިބި ހިކިފަސްތަނެއްގައި ތިބުން ކަމުގައިި ވީނަމަވެސް، ގަދަވަޔާއި ވިއްސާރައިގައިވެސް އެތައް ބަޔަކު ފުރާނަ އަތްމައްޗަށް ލައިގެން ދަތުރު ކުރަން ވަނީ މަޖުބޫރުވެފައެވެ.

ރާއްޖޭގެ އެތެރޭގެ ދަތުރުފަތުރު އެންމެ ބޮޑަށް ބިނާވެފައި އޮތީ މާލެ އާއި އަތޮޅުތަކުގެ މެދުގައި ކުރާ ފެރީ ލޯންޗު ދަތުރުތަކަށެވެ. ކަނޑުގަދަވެ ވިއްސާރަކަމުން މާލެ އާއި އަތޮޅުތަކުގެ ރަށްތަކާއި ދެމެދު ކުރާ ފެރީ ލޯންޗު ދަތުރުތަކުގެ ޝެޑިއުލްއަށްވެސް ވަނީ ބުރޫ އަރާފައެވެ.

މިދުވަސްވަރަކީ ސްކޫލު ބޮޑު ޗުއްޓީގެ ދުވަސް ވަރަށް ވުމާއި އެކު އަތޮޅުތަކުން މާލެއަށް އެކި ބޭނުންތަކުގައި އެތައް ސަތޭކަ ބަޔަކު ވަނީ އައިސްފައެވެ. އެހެން ނަމަވެސް ވިއްސާރަ އާއި ދިމާވެ ކަނޑުދަތުރު ފަތުރަށް، ޚާއްޞަކޮށް ލޯންޗު ފެރީ ތަކުގެ ދަތުރުފަތުރަށް ހުރަސް އެޅެމުންދާތީ، މާލޭގައި އެތައް ބަޔަކު ތާށިވެއްޖެއެވެ.

Advertisement

އާދީއްތަ ދުވަހު ސްކޫލުތައް ހުޅުވޭއިރު، މިއަދަކީ މުދައްރިސުން ސްކޫލުތަކަށް ނުކުންނަށް ޖެހޭ ދުވަހެވެ. އެހެން ނަމަވެސް ވިއްސާރައިގެ ސަބަބުން ދަތުރުފަތުރަށް ހުރަސް އެޅިފައިވާތީ ގިނަ ސްކޫލުތަކުގެ ޓީޗަރުންނަށް އެނބުރި ރަށަކަށް ނުދެވެއެވެ.

ވިއްސާރައިގެ ސަބަބުން އިއްޔެވެސް މެދުރާއްޖެ ތެރޭގެ އަތޮޅުތަކަށް ކުރަމުން އައި ޝެޑިއުލް ފެރީ ލޯންޗު ދަތުރުތަކުގެ ގިނަ ދަތުރުތައް ވަނީ ކެންސަލްކޮށްފައެވެ. އަދި ގަދައިގައިވެސް ލޯންޗު ދަތުރުތައް ބާއްވަން ފެރީ ޚިދުމަތްދޭ ލޯންޗުތަކަށް މަޖުބޫރުވެފައި ވަނީ ސްކޫލުތައް ހުޅުވެން ވާއިރަށް، ރަށަށްދާން ޓިކެޓް ނަގާފައިވާ ފަރާތްތައް ރަށާއި ހަަމައަށް ގެންގޮސްދިނުމަށެވެ.

ލޯންޗު ފެރީގެ ޚިދުމަތްދޭ ފަރާތްތަކުންވެސް އެޚިދުމަތް ދެނީ ކަސްޓަމަރުންގެ އަތުން ލިބޭ ޓިކެޓް ފީގެ މައްޗަށް ބަރޯސާވެގެން ކަމަށްވާތީ، ނަގާފައިވާަ ޓިކެޓްތައް އެއްފަހަރާ ގިނަ ބަޔަކު ކެންސަލް ކުރާ ނަމަ ރިފަންޑް ދިނުމަށް އެފަރާތްތަކަށްވެސް ދަތިވާކަން އެފަރާތްތަކުން ފާހަގަކުރެއެވެ. ޚާއްޞަކޮށް ލޯންޗު ފެރީ ޓިކެޓްތަކުގެ ދަތުރުތަކުގައި ޓިކެޓް ރިފަންޑްކޮށްދެނީ، ދަތުރުކުރަން އޮތް ގަޑީގެ 24 ގަޑިއިރު ކުރިން، ޓިކެޓް ކެންސަލްކޮށް ރިފަންޑްކޮށްދޭން އެދުމުންނެވެ.

ބައެއް ދަތުރުވެރިންވެސް ފާހަގަކުރާ ގޮތުގައި ގަދައިގައިވެސް ދަތުރަށް އަރަން ޖެހެނީ ކޮންމެހެން ދަތުރު ކުރާން ބޭނުން ވެގެނެއް ނޫނެވެ، ޓިކެޓް ރިފަންޑް ނުލިބޭނެ ހާލަތު މެދުވެރިވާތީ ކޮންމެހެން ދަތުރުކުރަން މަޖުބޫރުވަނީއެވެ.

އަތޮޅުތެރޭގެ ލޯންޗުފެރީގެ ދަތުރުތައް އުޅެނީ ކޮޅަކަށް، ބޮލަކަށް 300ރ އާއި 1000ރ އާއި ދެމެދުގައެވެ. ތ އަތޮޅަށް ލޯންޗު ފެރީތައް ދަތުރު ކުރަނީ ކޮޅަކަށް 900ރ އަށެވެ. ށ. އަތޮޅަށް ލޯންޗު ފެރީތައް ދަތުރުކުރަނީ، ކޮޅަކަށް 1050ރ އެވެ. އެހެންކަމުން 3 މީހުންގެ އާއިލާއެއްވެސް ޓިކެޓަށް ވަރަށް ބޮޑު ޚަރަދެއް ކުރަން ޖެހެއެވެ.

ރާއްޖެއަށް މޫސުމް ވަރަށް ގޯސް ވެފައި ވާއިރު، މިއަދު މެންދުރު 12:00 އާއި ހަމައަށް މާލެ ސަރަހައްދު އޮތީ އޮރެންޖް އެލާޓުގައެވެ. އަދި މާލެ ސަރަހައްދަށް ވިލާގަނޑުގައި ގަޑިއަކު 60 މޭލަށް ވައިގަދަވާނެ ކަމުގައިވެސް މޫސުމާއި ބެހޭ ޤައުމީ އިދާރާއިން އޮތީ ވިދާޅުވެފައެވެ.

މީގެ އިތުރުން މާލެ ސަރަހައްދަށް ނެރެފައިވާ އޮރެންޖް އެލާޓްގެ ވަގުތު މިއަދުގެ ހަވީރު 4:00 އާއި ހަމައަށް މޫސުމާއި ބެހޭ ޤައުމީ އިދާރާއިން ވަނީ އިތުރުކޮށްފައެވެ. މިގޮތުން މެންދުރު 12:00 އިން ހަވީރު 4:00އަށް އޮރެންޖް އެލާޓް ނެރެފައި ވަނީ ވ އަތޮޅުން ފެށިގެން ޅ. އަތޮޅާއި ދެމެދުގެ ރަށްތަކަށެވެ. 

ދިވެހި ފުލުހުންގެ ޚިދުމަތުންވެސް މިއަދު ވަނީ، މި ދުވަސްވަރަކީ ކަނޑުގަދަ، ވިއްސާރަ ދުވަސް ވަރަކަށް ވުމާއެކު، ކޮންމެހެން ކުރަން ޖެހިއްޖެ ހާލަތުގައި މެނުވީ ކަނޑުދަތުރު ނުކުރުމަށް އިލްތިމާސްކުރަން. ދަތުރުކުރަން ޖެހިއްޖެ ހާލަތުގައި ވެސް ރައްކާތެރިކަމުގެ ފިޔަވަޅު އެޅުމަށާއި ކުދި އުޅަނދުގައި ދަތުރުނުކުރުމަށް އިލްތިމާސްކޮށްފައެވެ.

މޫސުމާއި ބެހޭ ޤައުމީ އިދާރާއިން ލަފާކޮށްފައިވާ ގޮތުގައި ކުރިޔަށް އޮތް 3 ދުވަހުވެސް ރާއްޖެއަށް މޫސުމް ގޯސްވާނެއެވެ. އެހެން ނަމަވެސް އެކި ސަބަބުތަކާއި ހެދި ގަދަ ވިއްސާރައިގައިވެސް ކަނޑު ދަތުރުކުރުން ނޫންގޮތެއް ނެތި، ފުރާނަ އަތްމައްޗަށްލައިގެން އެތައް ބަޔަކު ދަނީ ދަތުރަށް އަރަމުންނެވެ.