ރޯދަމަހު ފޮނުވި ކަރަންޓް ބިލްތަކަށް ދީފައިވާ ޑިސްކައުންޓް 45 މިލިއަނަށް އަރާކަމުގައި ޔުޓިލިޓީސް ކުންފުނިތަކުން ބުނެފިއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި، ސްޓެލްކޯގެ މެނޭޖިންގ ޑައިރެކްޓަރ ޙުސައިން ފަޙްމީ އާއި، ފެނަކަ ކޯޕަރޭޝަންގެ މެނޭޖިންގ ޑައިރެކްޓަރ މުއާޒް މުޙައްމަދު ރަޝީދު ވަނީ ކަރަންޓް ބިލްތަކާއި ގުޅިގެން މިހާރު ހުރި ކަންބޮޑުވުންތަކާއި ގުޅޭ ގޮތުން ނޫސްވެރިންނަށް މައުލޫމާތު ދެއްވާފައެވެ.

ސްޓެލްކޯގެ މެނޭޖިންގ ޑައިރެކްޓަރ ޙުސައިން ފަޙްމީ ވިދާޅުވީ، ރޯދަމަހު ފޮނުވި ކަރަންޓް ބިލްތަކަށް ޖުމުލަ 20 މިލިއަން ރުފިޔާގެ ޑިސްކައުންޓެއް ދެވިފައިވާ ކަމަށެވެ. އޭނާ ވިދާޅުވީ އެ ކުންފުނިން އަމަލުކޮށްފައި ވަނީ ޔުޓިލިޓީޒް ރެގިއުލޭޓަރީ ބޮޑީއާއި ސަރުކާރުން އެންގެވި ގޮތަށް ކަމަށެވެ. އަދި ރޯދަމަހު ފޮނުވި ކަރަންޓް ބިލަކީ، ރޯދަމަހު ބޭނުންކުރި ކަރަންޓަށްކޮށްފައިވާ ބިލް ނޫންކަން ފާހަގަކުރައްވައި ފަޙްމީ ވިދާޅުވީ، އެކަމުގެ ބޭނުމަކީ، ރޯދަމަހު ރައްޔިތުން ކުރަންޖެހޭ ހޭދައަށް ލުޔެއް ދެއްވުންކަމަށެވެ.

ފެނަކަ ކޯޕަރޭޝަންގެ މެނޭޖިން ޑައިރެކްޓަރ މުއާޛު މުޙައްމަދު ރަޝީދު ވިދާޅުވީ، ކަރަންޓްގެ ޑިސްކައުންޓްގެ ގޮތުގައި ކަރަންޓް ބިލްތަކުން 25 މިލިޔަން ރުފިޔާގެ ޑިސްކައުންޓެއް ދެވިފައިވާ ކަމަށެވެ. މުއާޛު ވިދާޅުވީ، ރޯދަމަހު ޑިސްކައުންޓް ހިމަނައި ފޮނުވާފައިވާ ކަރަންޓް ބިލްގައި ހިމެނޭނީ، ރޯދަމަހު ބޭނުން ކުރެވުނު ކަރަންޓްގެ ބައެއް ކަމަށެވެ. އެގޮތުން ރޯދަަމަހު ފޮނުވި ކަރަންޓް ބިލްގައި ބިލްކޮށްފައި ވަނީ، ފެބުރުއަރީ 25 އިން މާރިޗު 24އަށް ބޭނުންކޮށްފައިވާ ކަރަންޓް ކަމުގައި އޭނާ ވިދާޅުވިއެވެ. އެހެންވެ ޑިސްކައުންޓް ދިން ކަރަންޓް ބިލްގައި ހިމެނިފައި ވަނީ ރަމަޟާން މަހުގެ 13 ދުވަހެވެ.

ފެނަކަ ކޯޕަރޭޝަންގެ މެނޭޖިންގ ޑައިރެކްޓަރ މުއާޛު މުޙައްމަދު ރަޝީދު --

ރަމަޟާން މަހު ބިލްތައް ބޮޑުވުމަށް ލުޔެއް ދެއްވާނެ ކަމުގައި ރައީސުލްޖުމްހޫރިއްޔާ ވިދާޅުވި ވިދާޅުވުން، ވަނީ އާއްމުންނަށާއި، ކުންފުނިތަކަށް އޮޅުން އަރާފައެވެ. ރައީސުލްޖުމްހޫރިއްޔާ ވިދާޅުވީ ރަމަޟާން މަހުގައި ބޭނުން ކުރާ ކަރަންޓަށް ޑިސްކައުންޓް ދިނުމުގެ ވާހަކަފުޅު ކަމުގައި ވީނަމަވެސް، ކުންފުނިތަކުން ޑިސްކައުންޓް ހިމަނާފައި ވަނީ ރަމަޟާން މަހުގެ ކުރީގެ މަހު ބޭނުން ކުރެވުނު ކަރަންޓް ބިލަށެވެ. އެހެންވެ ރަމަޟާން މަސް ނިމިގެން ލިބުނު ކަރަންޓްބިލް އާދަޔާއި ޚިލާފަށް ބޮޑުވުމުގެ ޝަކުވާ އާއްމުން ގެންދަނީ ކުރަމުންނެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި، ޗީފް ސްޕޯކްސްޕަރސަން ހީނާ ވަލީދު ވިދާޅުވީ، ކަރަންޓް ބިލްތަކާއި މެދު އާއްމުންގެ މެދުގައި އޮތް ކަންބޮޑުވުމަށް ލުޔެއް ދެވޭނެ ގޮތަކާއި ގުޅޭ ގޮތުން ކަމާއި ގުޅޭ އިދާރާތަކާއި އެކުި ސަރުކާރުން މަޝްވަރާތައް ކުރައްވާނެ ކަމަށެވެ. އެހެން ނަމަވެސް އެކަމުގައި ސަރުކާރުން މިހާރު ވަކިގޮތެއް ނިންމާފައިވާކަން ނުވަތަ ނޫންކަން އަދި ސާފެއް ނޫނެވެ.