ލިވަޕޫލް ފުޓްބޯލް ކްލަބްގެ ކޯޗު، ޔާގެން ކްލޮޕް، ގެ ބަދަލުގައި އެ ކްލަބާ ހަވާލުވާނީ، މިހާރު ނެދަލޭންޑްސްގެ ފެޔެނޫދުގެ ކޯޗުގެ މަގާމުގައި ހުރި އެ ގައުމަށް ނިސްބަތްވާ އާރނޭ ސްލޮޓްކަމަށް ރިޕޯޓުތައް ބުނެފިއެވެ.

މި ސީޒަނަށްފަހު ލިވަޕޫލް ދޫކޮށްލުމަށް ކްލޮޕް ނިންމާފައިވާތީ އޭނާގެ ބަދަލުގައި އެ މަގާމަށް ކޯޗެއް ހޯދުމުގެ މަސައްކަތް ލިވަޕޫލުން ކުރަމުން އަންނަތާ ދުވަސްކޮޅެއް ވެއްޖެއެވެ. އަދި ލިވަޕޫލުން އެކަން ކާމިޔާބުކޮށްފިކަމުގެ ހަބަރުތައް ފެތުރިފައިވަނީ ފާއިތުވި 24 ގަޑިއިރުގެ ތެރޭގައެވެ. އަދި މި ހަބަރު، އިނގިރޭސިވިލާތާއި ނެދަލޭންޑްސްގެ ހަބަރު ފަތުރާ ވަސީލަތްތަކުން ވެސް ކަށަވަރުކޮށްދެއެވެ.

ހަބަރު ފެތުރިފައިވާ ގޮތުގައި، ލިވަޕޫލުން ސްލޮޓް ގެނައުމުގެ ފީއެއްގެ ގޮތުގައި 11 މިލިއަން ޔޫރޯ ފެޔެނޫދުއަށް ދިނުމަށް ވަނީ އެއްބަސްވެފައެވެ. މި އަގާއެކު އޭނާ ވެގެންދާނީ ނެދަލޭންޑްސްގެ އެންމެ އަގުބޮޑު ކޯޗަށެވެ.

Advertisement

ފެޔެނޫދާއިއެކު ސްލޮޓް އަދި ލީގުގައި ބާކީ 3 މެޗު ކުޅެން ޖެހެއެވެ. އެ ކުލަބު މިހާރު އޮތީ 75 ޕޮއިންޓާއެކު ޑަޗް ލީގުގެ ދެވަނައިގައެވެ. އެއް ވަނައިގައި އޮތް ޕީއެސްވީއަށް ލިބިފައިވަނީ 84 ޕޮއިންޓެވެ.

ފެޔެނޫދާއި ސްލޮޓް ހަވާލުވީ 2020 ވަނަ އަހަރުގެ ޑިސެމްބަރު މަހުއެވެ. އޭގެ ފަހުން މިހާތަނަށް އެ ޓީމު ކުޅެފައިވާ 147 މެޗުގެ ތެރެއިން 95 މެޗު ވަނީ ކާމިޔާބުކޮށްފައެވެ. އަދި 29 މެޗުން އެއްވަރުވެފައިވާއިރު، ބަލިވެފައިވަނީ 23 މެޗުންނެވެ.

ސްލޮޓްވަނީ ފެޔެނޫދާއެކު ޑަޗް ލީގު މިދިޔަ ސީޒަނުގައި ކާމިޔާބުކޮށްފައެވެ. އަދި އޭގެ އިތުރުން ގައުމުގެ ފުޓުބޯޅަ އެސޯސިއޭޝަން ކަޕް ވެސް މި ސީޒަނުގައި ކާމިޔާބުކޮށްފައިވެއެވެ.