އިންގްލިޝް ޕްރިމިއަ ލީގުގައި ރޭ އެވަޓަންއާ ބައްދަލުކޮށް ލިވަޕޫލަށް ނަތީޖާއެއް ނުނެރެވުމުން، އެ ޓީމު އެންމެ ފަހުން ލީގުގެ ރޭހުން ސޮއްސާލާފާނެކަމަށް ގަބޫލުކުރެވެން ފަށައިފިއެވެ. އެވަޓަންގެ ގުޑިސަން ޕާކުގައި ކުޅުނު މި މެޗު އެވަޓަން އިން ކާމިޔާބުކޮށްފައިވަނީ 2-0 އިންނެވެ.

ލިވަޕޫލުން މުޅި މެޗުގައި ގިނަ ވަގުތު ބޯޅަ ހިފަހައްޓައިގެން ކުޅުނު ނަމަވެސް، އެވަޓަންއާ އަޅާބަލާއިރު، އެ ޓީމަށް މާ ގިނަ ހަމަލާތަކެއް އިދިކޮޅު ގޯލަށް ފޮނުވާލެވިފައެއް ނުވެއެވެ.

އެވަޓަންގެ ފުރަތަމަ ގޯލު ކާމިޔާބުކޮށްފައިވަނީ ފުރަތަމަ ހާފުގައި އެ ޓީމުގެ ޑިފެންޑަރު ބްރެންތުވެއިޓްއެވެ. އަދި ދެވަނަ ގޯލު ދެވަނަ ހާފުގެ 13 ވަނަ މިނެޓުގައި ކާމިޔާބުކޮށްފައިވަނީ ޑޮމިނިކް ކެލްވާޓް-ލުވިންއެވެ.

އެވަޓަންގެ ދަނޑުގައި އެމީހުނަށް ލިވަޕޫލް މި ބަލިކުރެވުނީ 13 އަހަރަށް ފަހުއެވެ. އެންމެފަހުން ލީގު މެޗެއްގައި އެވަޓަންއަށް ލިވަޕޫލް ބަލިކުރެވިފައިވަނީ 2010 ވަނަ އަހަރުގެ އޮކްޓޯބަރު މަހުއެވެ. އެ މެޗު ވެސް އެވަޓަން ކާމިޔާބުކުރީ 2-0 އިންނެވެ.

މި ނަތީޖާއާއެކީ މިވަގުތު ލިވަޕޫލް 74 ޕޮއިންޓާއެކު ލީގުގެ ދެވަނައިގައި އޮތް ނަމަވެސް، ތިން ވަނައިގައި އޮތް މެންޗެސްޓަރ ސިޓީ ލިވަޕޫލަށް ވުރެން އެއް ޕޮއިންޓު ފަހަތުގައި އޮތީ ދެ މެޗު މަދުން ކުޅެގެނެވެ. އެހެންކަމުން، ބޮޑަށް ބެލެވޭ ގޮތުގައި ދެން ލީގު ތައްޓަށް އެންމެ ކައިރިން ވާދަކުރާނީ ސިޓީއާއެކު އާސެނަލްއެވެ.