ދިވެހިރާއްޖެއަށް މަލްޓި ޕާޓީ ޑިމޮކްރެޓިކް ނިޒާމު ތައާރަފުވީފަހުން، އިންތިހާބެއްގައި މުޅިން އަލަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އަށް ހިންނަވަރުން މެޖޯރިޓީ ގެއްލިއްޖެއެވެ. 

ވަގުތީ ނަތީޖާތައް ދައްކާ ގޮތުން، ވިހި ވަނަ ރައްޔިތުންގެ މަޖިލީހުގެ މެންބަރުން އިންތިހާބު ކުރުމަށް މިއަދު ބޭއްވި އިންތިހާބުގައި ހިންނަވަރު ދާއިރާގެ ގޮނޑި ކާމިޔާބު ކުރައްވާފައިވަނީ، ޕީއެންސީގެ ކެނޑިޑޭޓު މުޙައްމަދު އަބްދުއްރަޙްމާނެވެ. އެމްޑީޕީގެ ޓިކެޓުގައި މި ދާއިރާއިން ވާދަކުރައްވާފައިވަނީ، މިހާރު ވެސް އެ ދާއިރާގެ މެންބަރު ޖީހާން މަޙްމޫދެވެ. 

ރައީސް އިބްރާޙިމް މުޙައްމަދު ޞާލިޙް 5 ދައުރުގައި ފުރުއްވި މި ގޮނޑިއަށް ޖީހާން މަޙްމޫދު އިންތިހާބުވީ، އެ މަނިކުފާނު ރާއްޖޭގެ ރައީސުލްޖުމްހޫރިއްޔާކަމަށް 2018 ވަނަ އަހަރު އިންތިހާބުވުމަށްފަހުއެވެ. 

ނަވާރަ ވަނަ ރައްޔިތުންގެ މަޖިލީހަށް ޖީހާން އިންތިހާބުވެފައިވަނީ ބޮޑު އަގުލަބިއްޔަތަކުން، 1،779 ވޯޓު ހޯއްދަވައިގެންނެވެ. އެއީ ވޯޓުލީ މީހުންގެ %58.27 މީހުންގެ ވޯޓުންނެވެ. އެ އިންތިހާބުގައި ޖީހާންއާ އެންމެ ކައިރިން ވާދަކުރެއްވީ، މިހާރު ރައީސުލްޖުމްހޫރިއްޔާގެ އޮފީހުގައި ޚިދުމަތްކުރައްވަމުން ގެންދަވާ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުﷲ ނާޒިމް އިބްރާޙިމްއެވެ.