ވެރިކަން ލިބުމުގެ ކުރިންނާއި ސަރުކާރުގެ އިސްމަޤާމުތަކަށް ވަޑައިގެންނެވުމުގެ ކުރިން، ރައީސް ޔާމީނު މިނިވަން ކުރުމަށް ގޮވާލެއްވި ޕީޕީއެމާއި ޕީއެންސީގެ އިސްބޭފުޅުން އެމަނިކުފާނު މިރޭ މިނިވަންވެވަޑައިގެންނެވުމުން އެމަނިކުފާނަށް މަރުޚަބާ ދަންނަވަން ވަޑައިނުގަންނަވައި ހިމޭންވެއްޖެއެވެ.

ރައީސް ޔާމީން މިނިވަންވެޑައިގެންފި ކަމަށް ޚަބަރުތައް ފެތުރުމުން ސަރުކާރުގެ އިސް މަޤާމުތަކުގައި ތިއްބެވި ބައެއް ބޭފުޅުން ޓްވީޓްތައް ކުރެއްވިއެވެ. އެހެންނަމަވެސް އެކަމާއި ގުޅޭ ގޮތުން ރައީސް ޑރ. މުޙައްމަދު މުއިއްޒު އެއްޗެއް ވިދާޅެއް ނުވެއެވެ.

ރައީސް ޔާމީނުގެ ފޮޓޯފުޅާއި އެމަނިކުފާނުގެ ސަޕޯޓަރުންގެ ތާއީދާއިއެކު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ވެރިކަން ލިބިވަޑައިގެންނެވި އިރު، ރައީސް ޔާމީން މިނިވަންވުމުގެ އުފަލުގައި އެބޭފުޅުން އަމަލީ ގޮތުން ބައިވެރިވެވަޑައި ނުގެންނެވި ސަބަބާއި މެދުވެސް ކޯޓުދޮށުގައި އެއްވެ ތިބި ރައީސް ޔާމީނުގެ މަދު ސަޕޯޓަރުން ޝަކުވާ ކުރިއެވެ.

Advertisement

ޝަރީއަތްތަކުގެ އަޑުއެހުންތައް 6 ގަޑިއިރަށް ވުރެ ގިނަ އިރަށް ދެމިގެން ދިޔައިރު، ހައިކޯޓު ދޮށުގައި ތިބީ ވަރަށް މަދު ސަޕޯޓަރުން ކޮޅެކެވެ. އެހެން ނަމަވެސް އެމަނިކުފާނު ކޯޓުން ނުކުމެވަޑައިގެން، އެމަނިކުފާނުގެ އައު ޕާޓީ ޕީއެންއެފްގެ އޮފީހަށް ވަޑައިގެންނެވި އިރު އެމަނިކުފާނުގެ ސަޕޯޓަރުން މަޖީދީމަގާއި ބޮޑުތަކުރުފާނު މަގު ގުޅުނު ހިސާބުން ފެށިގެން ޕީއެންއެފްގެ އޮފީސް ހ. ހުރަފަ އާއި ހަމައަށް ސަފު ދަމާލާފައި އޮތެވެ. ސަޕޯޓަރުންނާއި ސަލާމްކުރެއްވުމަށް ފަހު، ރައީސް ޔާމީން ވަނީ، މިރޭ ޕާޓީގެ އޮފީހުގައި ޕާޓީގެ އާއްމު މެމްބަރުންނާއި ބައްދަލުކުރައްވާފައެވެ.

ރައީސް ޔާމީންގެ މައްޗަށް ކޮށްފައިވާ ހުކުމްތައް ބާޠިލްކުރުމާއި އެކު މަޖިލިސް އިންތިޚާބުގެ ކެމްޕޭނުގައި އެމަނިކުފާނު ޢަމަލީ ގޮތުން ދެން ބައިވެރިވެވަޑައިގަންނަވަމުން ގެންދަވާނެއެވެ.