ސްޓެލްކޯގެ ފަންނީ ތަޖުރިބާކާރު، ޓީމެއް ފޮނުވައި، ކުޅުދުއްފުށި ސިޓީއަށް ދިމާވި ކަރަންޓުގެ މައްސަލަ ހައްލުކޮށް މުޅި ރަށަށް ކަރަންޓް ދީފިއެވެ.

ސްޓެލްކޯގެ މެނޭޖިންގ ޑައިރެކްޓަރ ޙުސައިން ފަޙްމީ މިރޭ ވިދާޅުވީ، އެ ކުންފުނީގެ އިލްމީ، ޤާބިލް އަދި ތަޖުރިބާކާރު ޓީމާއި، ފެނަކައިގެ މުވައްޒަފުން ކުރި މަސައްކަތުން ކުޅުދުއްފުށި ސިޓީއަށް ދިމާވި ކަރަންޓުގެ މައްސަލަ ހައްލުކޮށް މިހާރު ވަނީ މުޅި ރަށަށް ކަރަންޓު ދެވިފައި ކަމަށެވެ. 

މީގެ އިތުރުން ފަޙްމީ ވިދާޅުވީ، ރައްޔިތުންނަށް ދިމާވާ މިފަދަ ކަންކަމަށް އަވަސް ހައްލެއް ހޯއްދަވައިދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަބަދުވެސް ދެއްވަވަމުންގެންދަވާ ހަރުދަނާ އިރުޝާދުތަކަށް ޝުކުރު އަދާކުރައްވާ ކަމަށެވެ. އަދި މިފަދަ ކޮންމެ ދަނޑިވަޅެއްގައި ޤައުމީ ވާޖިބެއް ކަމުގައި ދެކި ކުންފުނީގެ މުވައްޒަފުން ކުރައްވަމުން ގެންދަވާ ބުރަ މަސައްކަތްތަކަށް ފަޚުރުވެރިކަމާއިއެކު ފާހަގަކުރައްވައި، މުވައްޒަފުންނަށް ސާބަހާއި ޝުކުރު ދަންނަވާކަމުގައިވެސް ފަޙްމީ ވިދާޅުވިއެވެ.

Advertisement

ކުޅުދުއްފުށީ އިންޖީނުގެއިން ކަރަންޓް ދިނުމުގައި ދިމާވެފައިވާ މައްސަލަތަކުގެ ސަބަބުން ރައްޔިތުންނަށް ވަނީ ވަރަށް ބޮޑުތަކުލީފެއް އުފުލަން ޖެހިފައެވެ. ކުޅުދުއްފުށީ އިންޖީނުގެއިން ރޯދަމަހުން ފެށިގެން ކަރަންޓް ދެމުން އައިސްފައިވަނީ، ޝެޑިއުލްކޮށްގެން އެކި ސަރަހައްދުން ކަރަންޓްގެ ޚިދުމަތް މެދު ކަނޑާލަމުންނެވެ. އެކަމާއި ގުޅިގެން ކުޅުދުއްފުށީގެ ބައެއް އާއްމުން ހިތްހަމަ ނުޖެހި އިހްތިޖާޖުވެސް ކޮށްފައިވެއެވެ.