ރައްޔިތުންގެ މަޖިލީހުގެ އިންތިޚާބަށް ވަގުތު ކުޑަތަން ވަމުން އަންނަ އިރު، ސަރުކާރު ކެންޑިޑޭޓުންނަށް ވޯޓު ދިނުމަށް މަޖުބޫރު ކުރުމަށްޓަކައި އަސާސީ ޚިދުމަތްތައް ނުދީ ހިފެހެއްޓުމަށް ފެނަކައިގެ އިސް މަޤާމެއްގައި ހުރި މީހަކު ގޮވާލައިފިއެވެ.

ރައްޔިތުންގެ މަޖިލީހުގެ ދިއްދޫ ދާއިރާއަށް ޕީޕިއެމް ޕިއެންސީގެ ޓިކެޓްގައި ވާދަކުރައްވާ ކެންޑިޑޭޓަށް ތާއީދު ހޯދުމަށް ރޭ ބޭއްވި ކެމްޕޭން އެއްވުމެއްގައި، މިސަރުކާރުން، ދިއްދޫ ފެނަކަ ބްރާންޗްގެ އެސިސްޓެންޓް މެނޭޖަރަކަށް ހަމަޖައްސާފައިވާ، ޢަބްދުއްﷲ ރަޝީދު ވަނީ، ދިއްދޫގައި، ކަރަންޓްދޭންވީ، ހަމައެކަނި ސަރުކާރަށް ތާއީދުކުރާ ފަރާތްތަކުގެ ގެތަކަށް އެކަނި ކަމަށް ބުނެ ވާހަކަ ދައްކާފައެވެ.

ދިއްދޫގެ ކަރަންޓްގެ މައްސަލަ ހައްލު ނުވެ ދިގުލައިގެން ދިޔުމާއި ކޮންމެ ދުވަހަކު ކަރަންޓް ކެނޑޭތީ އެކަމުގެ ސަބަބުން ރައްޔިތުންނަށް ވަރަށް ގިނަ އުނދަގޫތަކާއި ގެއްލުންތަކާއި ވަނީ ކުރިމަތިލާން ޖެހިފައެވެ. އެކަމަށް މަލާމާތް ރައްދުވާ ގޮތަށް، ޢަބުދުﷲ ރަޝީދު ވިދާޅުވީ، ކަރަންޓް ކެނޑެމުން ދިޔުމަކީ ނަސީބެއް ކަމަށާއި، އިންތިޚާބު ނިމެންދެން ކަރަންޓް ދޭންވީވެސް ސަރުކާރަށް ތާއީދު ކުރާ މެމްބަރުންގެ ގެތަކަށް ކަމަށެވެ.

އިންތިޚާބުގެ ވޯޓުލުން ގާތްވަމުން އަންނައިރު، ޕީއެންސީގެ ސަޕޯޓަރުން އެކި ސިފަސިފައިގައި، އިންތިޚާބަށް ނުފޫޒު ފޯރުވުމަށް ހިންގާ އަމަލުތައް އަންނަނީ އިތުރުވަމުންނެވެ. މިގޮތުން ވަޒީފާގެ ބިރު ދެއްކުމާއި، މީހުން ވަޒީފާތަކުން ސަސްޕެންޑް ކުރުން ފަދަ ހަރަކާތްތައް ދަނީ ހިންގަމުންނެވެ.