ރާއްޖޭގެ މާލީ ހާލަތާއި ގުޅޭ ގޮތުން މިސަރުކާރުން ހަދަމުން ދަނީ ބޮޑެތި ބުހުތާނު ދޮގުތަކެއް ކަމުގައި ކުރީގެ ރައީސް އިބްރާހީމް މުހައްމަދު ޞާލީޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރައްޔިތުންގެ މަޖިލީހުގެ އިންތިޚާބުގެ ކެމްޕޭނުގައި އެމްޑީޕީން މިރޭ އައްޑޫ ސިޓީގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، ކޯވިޑް-19ގެ ދަތިހާލަތު ނިމިގެން ދިޔައިރު، ރައީސް ޔާމީނުގެ ސަރުކާރުގައި ނަގާފައިވާ ލޯނަށް 2022 ވަނަ އަހަރު 250 މިލިއަން ޑޮލަރު ދައްކަން ޖެހިފައި އޮތް ކަމަށެވެ. ސަނީ ސައިޑް ބޮންޑްގެ ނަމުގައި ރައީސް ޔާމީނު ނަންގަވާފައި އޮތް އެ ބޮންޑަށް ދައްކަންޖެހޭ ފައިސާ ދެއްކުމަށް ކޯވިޑްގެ ދަތިހާލުގެ ތެރޭގައިވެސް ފައިނޭންސް ހޯދައި، އެލޯނުވެސް ދައްކައި ނިންމާފައިވާ ކަމުގައި އެމަނިކުފާނު ވިދާޅުވިއެވެ. ރައީސް ޞާލިހް ވިދާޅުވީ، އެއީ މާލީ ސިޔާސަތުތައް ރަނގަޅަށް ޕްލޭން ކުރެވިގެން ކުރިޔަށް ގެންދިޔައިމާ ހާސިލްކުރެވޭ ނަތީޖާކަން އެމަނިކުފާނު ފާހަގަކުރެއްވިއެވެ.

Advertisement

އައްޑޫ ސިޓީގައި ރައީސުލްޖުމްހޫރިއްޔާ، ޑރ. މުޙައްމަދު މުއިއްޒު މިރޭ އައްޑު ރައްޔިތުންނާއި މުޚާޠަބު ކުރައްވައި ދެއްކެވި ވާހަކަފުޅުގައިވެސް ވަނީ، ސޮވެރިންގ ޑިވެލޮޕްމަންޓް ފަންޑާއި ގުޅޭ ގޮތުން ސަރުކާރުން މަޖިލީހަށް ހުށައަޅާއޮތް ބިލު މަޖިލީހުން ބޭރުކޮށްލީ އޮޅުވާލައިގެން ކަމަށް ވިދާޅުވެފައެވެ. އެހެން ނަމަވެސް ރައްޔިތުންގެ މަޖިލީހުގެ ރެކޯޑްތަކަށް ބަލާއިރު، ރައްޔިތުންގެ މަޖިލީހުގެ ޖަލްސާގައި އެބިލަށް ވޯޓަށް އެހުމުގެ ކުރިން ސަރުކާރަށް ތާއީދުރާ ހުރިހާ މެމްބަރުން ވަނީ މަޖިލީހުގެ ތަޅުން ދޫކޮށް ގޮސްފައެވެ. އެބިލް ބަލައިގަތުމަށް ނެގި ވޯޓުަގައި ފެންނަ ކަމަށް ވޯޓު ދެއްވީ އެންމެ މެމްބަރެކެވެ. އަދި ނުފެންނަ ކަމަށްވެސް ވޯޓު ދެއްވީ އެންމެ މެމްބަރެކެވެ. ދެވޯޓު ދެކޮޅަށް ލިބި ބިލް ބަލައިގަތުމުގެ ވޯޓު އެއްވަރުވުމުން މަޖިލީހުގެ ޤަވާއިދުގައި ބުނާ ގޮތުން މަޖިލީހުގެ ރިޔާސަތުން ބިލަށް ވޯޓެއް ދޭންޖެހެއެވެ. އެހެންވެ ރިޔާސަތުގައި އިންނެވި މަޖިލީހުގެ ނައިބު ރައީސް އަޙްމަދު ސަލީމް ބިލް ބަލައިގަތުމަށް ނުފެންނަކަމަށް ވޯޓު ދެއްވުމުން، އެބިލް މަޖިލީހުން ބޭރުވެގެން ދިޔައީ އެންމެ ދެވޯޓުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާއި ހަވާލުވެވަޑައިގެންނެވި ފަހުން، ރާއްޖޭގެ އިޤުތިޞާދު އޮތީ އަނދަވަޅެއްގެ ތެރޭގައި ކަމަށާއި، ދައުލަތް 120 ބިލިއަން ރުފިޔާއިން ދަރާފައިވާ ކަމަށާއި، އޭގެ ތެރޭގައި ކުންފުނިތަކަށާއި އަމިއްލަ ފަރާތްތަކަށް ދައުލަތުން ދޭންޖެހޭ 900 މިލިއަން ރުފިޔާ އޮތް ކަމުގައި ތަކުރާރުކޮށް ގެންދަވަނީ ވިދާޅުވަމުންނެވެ.