ޔޫރޮޕާ ލީގުގެ ކުއާޓާ ފައިނަލް ފުރަތަމަ ލެގުގައި ބުރާސްފަތި ދުވަހުގެ ރޭ އިޓަލީގެ އެޓްލާންޓާއިން 3-0 އިން ލިވަޕޫލް ބަލިކޮށްފިއެވެ. ލިވަޕޫލްގެ އެންފީލްޑްގައި ކުޅުނު މި މެޗުން ބަލިވުމުން، އެ ޓީމު ބަލިނުވެ 33 މެޗަށް ދަންމާލި ރެކޯޑު ވެސް މިވަނީ ނިމުމަކަށް އައިސްފައެވެ. ލިވަޕޫލް އެންމެ ފަހުން ބަލިވެފައިވަނީ 2023 ވަނަ އަހަރުގެ ފެބުރުވަރީ މަހު ރެއާލް މެޑްރިޑް އަތުންނެވެ.

މި މެޗުގައި އެޓްލާންޓާއިން ލީޑު ނެގީ ފުރަތަމަ ހާފުއެވެ. އެއީ 38 ވަނަ މިނެޓުގައި ޖިއާންލޫކާ ސްކަމާކާ ޖެހި ގޯލަކުންނެވެ. އަދި އޭނާ ވަނީ ދެވަނަ ހާފުގެ 15 ވަނަ މިނެޓުގައި އިތުރު ގޯލެއް ކާމިޔާބުކޮށް އެޓުލާންޓާއަށް ލީޑު ފުޅާކޮށްދީފައެވެ. އެ ޓީމުގެ ތިން ވަނަ ގޯލު ކާމިޔާބު ކޮށްދިނީ މެޗުގެ ފުރިހަމަ ވަގުތު ހަމަވުމަށް 7 މިނެޓަށް ވެފައިވަނިކޮށް، މާރިއޯ ޕެސަލިޗެއެވެ.

ލިވަޕޫލަށް ބަލައިލާއިރު، މުޅި މެޗުގައި ވެސް ފެނިފައިވަނީ ދަށް ކުޅުމެކެވެ. ބޭކާރު މިސްޓޭކުތަކާއި، ޑިފެންސްކުރުމުގައި އެޓްލާންޓާގެ ކުޅުންތެރިންނަށް މާބޮޑަށް ޖާގަ ދެވުނުތަނެވެ. 

Advertisement

މި ނަތީޖާއާ އެކީ ދެން އެންމެ ބޮޑަށް އުފެދޭ ސުވާލަކީ، މިއީ ޔޫރަޕިއަން މުބާރާތެއްގައި ލިވަޕޫލާއެކު އެންފީލްޑްގައި ކްލޮޕް ފެންނާނެ އެންމެ ފަހު ފަހަރު ކަމާމެދު އުފެދޭ ސުވާލެވެ. އަންނަ ހަފްތާ ކުއާޓާ ފައިނަލްގެ ދެވަނަ ލެގު އިޓަލީގައި ކުޅޭއިރު، މި ނަތީޖާ ބަދަލުކޮށްލުމަކީ ފަސޭހަ ކަމަކަށް ނުވާނެއެވެ. 

ނަމަވެސް ލިވަޕޫލަކީ މިކަހަލަ އުނދަގޫ ހާލަތްތަކުން އަރައިގަނެވޭނެ ޓީމެއްކަން އެމީހުން ވަނީ މީގެ ކުރިން ސާބިތުކޮށްދީފައެވެ. އެގޮތުން 2019 ވަނަ އަހަރު ބާސެލޯނާ ބަލިކުރުން، އަދި އޭގެ ތަންކޮޅެއް ކުރިޔަށް ޖެހިލާއިރު 2005 ވަނަ އަހަރު އިސްތާންބުލްގައި އޭސީ މިލާން ބަލިކުރި ހަނދާންތަކަކީ ލިވަޕޫލްގެ ސަޕޯޓަރުން ހަނދާނުން ފޮހެވޭނެ މެޗުތަކެއް ނޫނެވެ.

މެޗަށްފަހު ވާހަކަ ދައްކަމުން ލިވަޕޫލްގެ ކޯޗު ޔާގެން ކްލޮޕް ބުނީ، މި ނަތީޖާއަކީ އެ ޓީމަށް ބަދަލު ނުކުރެވޭނެ ނަތީޖާއެއް ނޫންކަމަށާއި، ޓީމަށް ރަގަޅަށް ޕާފޯމް ކުރެވިއްޖެނަމަ އެކަން ކުރެވޭނެ ކަމަށެވެ. 

މި ހާލަތާ ގުޅިގެން ލިވަޕޫލްގެ ކެޕްޓަން ވާޖިލް ވެން ޑައިކް ބުނީ، 3-0 ގެ ނަތީޖާއާއެކީ، ދެވަނަ ލެގަކީ ވަރަށް އުނދަގޫ މެޗަކަށް ވެގެން ދާނެ ކަމަށާއި، ނަމަވެސް އެ މެޗު ކާމިޔާބުކޮށް ސެމީ ފައިނަލަށް ދަތުރު ކުރެވޭނެ ކަމުގެ އުންމީދު ކުރާކަމަށެވެ.