ދިވެހި ސިފައިންގެ އަސްކަރީ ވައިގެ ބަނދަރު، އިސްކަންދަރު ވައިގެ ބަނދަރުގެ ގޮތުގައި ހަދާފައިވާ ކައްދޫ އެއާޕޯޓު އިތުރަށް ތަރައްޤީކުރުމާއި، މިހާރު ފަޅުރަށެއްގެ ގޮތުގައި ހަމަޖައްސަވާފައިވާ. ލ. ގާދޫގައި އިންޓަރގްރޭޓެޑް މެރިޓައިމް ހަބެއް ޤާއިމްކުރުމަށް ޗައިނާގެ ކުންފުންޏަކަށް ހަވާލުކޮށް އެއްބަސްވުމުގައި ސޮއެކޮށްފިއެވެ.

މިއެއްބަސްވުމުގައި ސޮއެކޮށްފައި ވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހާރު ހައްދުންމައްޗަށް ކުރައްވަމުން ގެންދަވާ ދަތުރުފުޅުގެ ތެރެއިން، މިރޭ ފޮނަދޫ ރައްޔިތުންނާއި ބައްދަލުކުރެއްވުމަށް ބޭއްވި ބައްދަލުވުމުގައެވެ.

މި މަޝްރޫޢު ސަރުކާރުން ހަވާލުކޮށްފައި ވަނީ ޗައިނާގެ ސީއޭއެމްސީ އިންޖިނިއަރިން ކޮމްޕެނީ ލިމިޓެޑް (ސީއޭއެމްސީއީ)އަށެވެ. މިއެއްބަސްވުމުގައި މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ފަރާތުން ސޮއެކުރެއްވީ އެކުންފުނީގެ ސީއީއޯ މުހައްމަދު ވަޖީހު އިބްރާހިމް އެވެ. 

މިރަސްމިއްޔާތުގައި، އެމްޕީއެލްގެ ސީއީއޯ މުހައްމަދު ވަޖީހު އިބްރާހިމް ވިދާޅުވީ، އެމަސައްކަތް ހަވާލުކުރި ކުންފުންޏަކީ، ޗައިނާގެ ވަރަށް ބޮޑު ކުންފުންޏެއް ކަމަށެވެ. އަދި އެކުންފުނީ ސަބްސިޑިއަރީ 9 ކުންފުނި ހިންގަމުންދާ ކަމަށާއި، އެކުންފުނީގެ 70 ވުރެ ގިނަ ބްރާންޗު ދުނިޔޭގެ އެކި ކަންކޮޅުތަކުގައި ހިންގަމުންދާ ކަމަށެވެ. އަދި މިމަޝްރޫޢުތަކަކީ އެކުންފުންޏާއި ގުޅިގެން ކާމިޔާބު ކަމާއި އެކު ކުރިޔަށް ގެންދެވޭނެ މަޝްރޫޢެއް ކަމަށެވެ.

ވަޖީހު ވިދާޅުވީ، ގާދޫގައި ތަރައްޤީކުރެވޭ، އިންޓަރގްރޭޓެޑް މެރިޓައިމް ހަބުގެ ސަބަބުން ރާއްޖޭގެ އިޤުތިޞާދަށް ބަދަލެއް އަންނާނެ ކަމަށެވެ. އަދި އެތަނުގައި ޤާއިމްކުރެވޭ ޕޯޓާއި، ޔޮޓުމެރީނާއާ ބަންކަރިންގެ ޚިދުމަތާއި އީކޯ ޓޫރިިޒަމްގެ ރިޒޯޓު ޕްރޮމޯޓް ކުރުމަށް މިހާރުވެސް މަސައްކަތް ކުރަމުންދާ ކަމުގައި ވަޖީހު ވިދާޅުވިއެވެ.

ވަޖީހު ވިދާޅުވީ، މި 5 އަހަރުގެ ތެރޭގައި އެ މަޝްރޫޢު ހިންގައި ނިންމާނެ ކަމަށެވެ.

ކައްދޫ އެއާޕޯޓް ތަރައްޤީކުރުމުގެ އެއްބަސްވުމުގައި ސޮއެކުރުން -- ފޮޓޯ ރައީސް އޮފީސް

މިރަސްމިއްޔާތުގައި ވަނީ، ކައްދޫ އެއާޕޯޓު ތަރައްޤީކުރުމަށް ބިން ހިއްކުމުގެ މަސައްކަތުގެ އެއްބަސްވުމުގައިވެސް ސޮއެކޮށްފައެވެ. މިމަސައްކަތްވެސް ހަވާލުކޮށްފައި ވަނީ، ޗައިނާގެ ސީއޭއެމްސީ އިންޖިނިއަރިން ކޮމްޕެނީ ލިމިޓެޑް (ސީއޭއެމްސީއީ)އާއެވެ. އެއްބަސްވުމުގައި ދިވެހި ސަރުކާރުގެ ފަރާތުން ސޮއެކުރެއްވީ، ކޮންސްޓްރަކްޝަން މިނިސްޓަރ ޑރ. ޢަބުދުﷲ މުއްޠަލިބެވެ.