ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި ޕެރިސް ސެއިންޓް ޖާމެއިން (ޕީއެސްޖީ) އާއި ބާސެލޯނާ ބައްދަލުކުރި މެޗުގައި ބާސެލޯނާއިން ގޯލެއް ޖަހާފައިވަނިކޮށް ޕީއެސްޖީއިން ތިން މިނެޓުން އެ ނަތީޖާ ފުރޮޅާލި ނަމަވެސް، ފަހަތުންއަރާ ބާސެލޯނާއިން ރަށުން ބޭރުގައި ކުޅުނު މެޗު ކާމިޔާބުކޮށްފިއެވެ. 

ޕެރިސްގައި ކުޅުނު މި މެޗުގައި ދެ ޓީމުންވެސް ގޯލު ޖަހާނެ ރަގަޅު ފުރުސަތުތައް ތަނަވަސް ކުރިއެވެ. ނަމަވެސް އެންމެ ފުރަތަމަ މެޗުގައި ލީޑު ނަގާފައިވަނީ ބާސެލޯނާއިންނެވެ. ފުރަތަމަ ހާފުގެ 37 ވަނަ މިނެޓުގައި އެ ޓީމަށް ލީޑު ނަގާދީފައިވަނީ ރަފީނިއާއެވެ.

ފުރަތަމަ ހާފު އެއް ގޯލުން ފަހަތުގައި އޮވެ ނިންމާލަން ޖެހުނަސް ދެވަނަ ހާފު ފެށިގޮތަށް ޕީއެސްޖީއިން އެ ނަތީޖާ ފުރޮޅާލިއެވެ. އެ ޓީމުން މެޗުގެ ނަތީޖާ ހަމަހަމަކުރީ 48 ވަނަ މިނެޓުގައި އުސްމާން ޑެމްބެލޭ ކާމިޔާބުކުރި ގޯލަކުންނެވެ. އަދި އޭގެ 3 މިނެޓުފަހުން ޕީއެސްޖީއަށް ލީޑު ނަގާދީފައިވަނީ ވިޓީނިއާއެވެ.

Advertisement

ނަމަވެސް ބާސެލޯނާގެ ރަފީނިއާ އަނެއްކާވެސް ގޯލެއް ކާމިޔާބުކޮށް ނަތީޖާ ހަމަހަމަކުރިއެވެ. މިއީ ޕެޑްރީގެ ރީތި ބޯޅަ އަކުން ރަފީނިއާ ކާމިޔާބުކުރި ގޯލެކެވެ. 

ބާސެލޯނާ މެޗުން މޮޅުވި ގޯލު ކާމިޔާބުކޮށްދިނީ ބަދަލުކުޅުންތެރިއެއްގެ ގޮތުގައި ކުޅެން ނިކުތް ކްރިސްޓެންސެންއެވެ. އެއީ ބާސެލޯނާއަށް ލިބުނު ކޯނަރެއްގައި ޕީއެސްޖީގެ ގޯލު އޭރިއާ ތެރޭގައި ހުރުމަށްފަހު ބޮލުން ގޯލަށް ފޮނުވާލައިގެންނެވެ. އަދި މިއީ އޭނާ ކުޅެން ނިކުތްފަހުން ބޯޅައިގައި ކުރި ފުރަތަމަ ޓަޗެވެ.

ރޭ ކުޅުނު ޗެމްޕިއަންސް ލީގުގެ ކުއާޓާ ފައިނަލް އަނެއް މެޗުގައި ބައްދަލުކުރީ އެތުލެޓިކޯ މެޑްރިޑާއި ބޮރޫޝިއާ ޑޯޓްމަންޑެވެ. އެތުލެޓިކޯގެ ސިވިޓާސް މެޓްރޮޕޮލިޓާނޯ ސްޓޭޑިއަމްގައި ކުޅުނު މި މެޗު އެ ޓީމުން ކާމިޔާބުކުރީ 2-1 އިންނެވެ.