ރައީސް ޔާމީނުގެ ދަރިކަލުން ޒެއިން ޢަބުދުﷲ ޔާމީނަށް އުފެއްދުމަށް ހުއްދަ ދީފައިވާ ޕާޓީ ޕީޕަލްސް ނެޝަނަލް ފްރޮންޓް ޕީއެންއެފް އުފެއްދުމުގެ ގޮތުން މިރޭ ޣިޔާޘުއްދީން އިންޓަރނޭޝަނަލް ސްކޫލުގެ ހޯލުގައި ބޭއްވުމަށް ތައްޔާރުވި ޖަލްސާއަށް ހުރަސް އަޅައި ހުއްޓުވައިފިއެވެ

ފުލުހުން ވަނީ މިހާރު ޣިޔާސުއްދީން ސްކޫލަށް އާމުންނާއި ޕީއެންއެފްގެ އިސްފަރާތްތަކަށް ނުވަދެވޭނެހެން އެސްކޫލުގެ ގޭޓު ބަންދުކޮށްފައެވެ.

ފުލުހުންގެ ތަރުޖަމާނު އަޙްމަދު ޝިފާން މީޑިއާތަށް ވިދާޅުވީ، ފުލުހުން ޣިޔާސުއްދީން ސްކޫލުގައި ހަރަކާތްތެރިވަމުން ދަނީ މިނިސްޓްރީ އޮފް އެޑިޔުކޭޝަނުން އެދިގެން ކަމަށެވެ. އަދި އެޖަލްސާ އެ ސްކޫލުގައި ރައްކާތެރިކަން ޤާއިމްކޮށްދިނުމަށް އެސްކޫލު ހިންގާ ކުންފުނިން މިނިސްޓްރީ އޮފް އެޑިޔުކޭޝަންގައި އެދިފައިވާ ކަމުގައިވެސް ޝިފާން ވިދާޅުވިއެވެ.

ޝިފާން ވިދާޅުވީ، މިނިސްޓްރީ އޮފް އެޑިޔުކޭޝަނުން އީމެއިލަކުން އެކަމަށް ފުލުހުންގެ ކިބައިން އެދިފައި ވަނީ، މިއަދު އިރުއޮއްސި 6:42ގައި ކަމަށެވެ.

ޝިފާންއަށް ރައްދު ދެއްވައި ޕީއެންއެފް އުފެއްދުމުގެ މަސައްކަތުގައި އިސްކޮށް މަސައްކަތް ކުރައްވަމުން ގެންދަވާ ކުރީގެ ވަޒީރު މުޙައްމަދު މަލީހް ޖަމާލު ވިދާޅުވީ، ޝިފާން ވިދާޅުވާ ވާހަކަފުޅަކީ ކަނޑައެޅިގެން އިތުރުފުޅެއް ކަމަށާއި، ކުންފުންޏާއިއެކު ހެދި އެގްރިމެންޓް ދެމި އޮތް ކަމަށާއި، ޖަލްސާ ބޭއްވުމުގެ ތައްޔާރީތައް ކުރިޔަށް ގެންދިޔައީ އެކުންފުނީގެ އެއްބާރުލުމާއި އެކުގައި ކަމަށެވެ.

ޣިޔާޘުއްދީން ސްކޫލުގައި ޕީއެންއެފް އުފެއްދުމުގެ ޖަލްސާ ބޭއްވުމަށް އެސްކޫލު ހިންގާ ކުންފުންޏާއި އެކު އެއްބަސްވެ އެޑްވާންސް ފައިސާވެސް ޕީއެންއެފުން ދައްކާފައިވާކަމަށް އެޕާޓީން ބުނެފައިވެއެވެ. ފުލުހުންގެ އިދާރާއިން ވިދާޅުވީ، ޣިޔާސުއްދީން ސްކޫލު ހޯލު ކުއްޔަސް ދިނުމަށް އެސްކޫލު ހިންގާ ކުންފުނިން ޕީއެންއެފާއިއެކު ވެފައިވާ އެއްބަސްވުން ކެންސަލްކޮށްފައިވާ ކަމަށް އެސްކޫލުން މިނިސްޓްރީ އޮފް އެޑިޔުކޭޝަނަށް އަންގާފައިވާ ކަމަށެވެ. އެހެން ނަމަވެސް ތަން ކުއްޔަށް ދިނުމަށް ފަހުގައި އެގްރީމެންޓް ކެންސަލްކުރި ސަބަބެއް އެކުންފުނީގެ ފަރާތުން ހާމަކޮށްފައެއް ނުވެއެވެ.

ޕީއެންއެފް އުފެއްދުމުގެ ޖަލްސާ ޣިޔާޘުއްދީން ސްކޫލުގައި ބޭއްވިޔަނުދީ ފުލުހުން އެކަމަށް ހުރައެޅުމާއި ގުޅިގެން، ޕީއެންއެފް އުފެއްދުމަށް އިލެކްޝަންސް ކޮމިޝަނުން ހުއްދަ ދެއްވާފައިވާ ރައީސް ޔާމީންގެ ދަރިކަލުން ޒެއިން ޢަބުދުﷲ ޔާމީން ވިދާޅުވީ، ފެނިގެން މިދަނީ، ރައީސް ޑރ. މުޙައްމަދު މުޢިއްޒުގެ ސަރުކާރުގެ ޚުދުމުޚުތާރުކަން ކަމަށެވެ. އަދި ރައީސް ޑރ. މުއިއްޒަށް ވެރިކަން ލިބިވަޑައިގަތީ އެމަނިކުފާނަށް ތާއީދެއް އޮވެގެން ނޫންކަމުގައި ޒެއިން ވިދާޅުވިއެވެ.

ފުލުހުން ޣިޔާޘުއްދީން ސްކޫލުގެ ގޭޓުތައް ބަންދުކޮށްފައި ވީނަމަވެސް ގޭޓުގެ އެތެރޭގައި ސްކޫލުގެ ގޯތި ތެރޭގައި ޕީއެންއެފަށް ނިސްބަތްވާ އިސް ބައެއް ބޭފުޅުންނާއި އާއްމުން އެބަތިއްބެއެވެ.

.

.

.

.