އިންގްލިޝް ޕްރިމިއަ ލީގުގައި އާދީއްތަ ދުވަހުގެރޭ މެންޗެސްޓާ ޔުނައިޓެޑާއި ލިވަޕޫލް ބައްދަލުކުރި މެޗު އެއްވަރުވެ، ލީގު ތައްޓަށް ވާދަކުރަމުންދާ ލިވަޕޫލަށް މުހިންމު ޕޮއިންޓުތަކެއް ގެއްލިއްޖެއެވެ. އަދި ލިވަޕޫލަށް ލިބުނު މި ގެއްލުމުގެ ފައިދާ ނަގާފައިވަނީ ލީގުގެ ދެވަނައިގައި އޮތް އާސެނަލްއެވެ.

އޯލްޑް ޓްރެފާޑްގައި ކުޅުނު މި މެޗު އެއްވަރުވީ، މެޗު ނިމެން ކައިރިވެފައި ވަނިކޮށް ލިވަޕޫލްގެ ފޯވާޑް މުޙައްމަދު ސަލާޙް ކާމިޔާބުކޮށްދިން ޕެނަލްޓީއަކުން، 2-2 އިންނެވެ. 

މި މެޗުގައި ފުރަތަމަ ލީޑު ނަގާފައިވަނީ ލިވަޕޫލްއިންނެވެ. އެއީ ފުރަތަމަ ހާފުގައި ލުއިޒް ޑިއާޒް ކާމިޔާބުކުރި ރީތި ގޯލަކުންނެވެ. ނަމަވެސް ދެވަނަ ހާފު ފަށައިގެން 5 މިނެޓު ކުޅެވުނުތަނާ ޔުނައިޓެޑުން ނަތީޖާ ހަމަހަމަ ކުރިއެވެ. އެއީ ލިވަޕޫލްގެ ޒުވާން ޑިފެންޑަރު، ޖަރެލް ކުއަންސާހްއަށް ހެދުނު ގޯހެއްގެ ބޭނުން ހިފައި، ބްރޫނޯ ފެނާންޑޭޒް މެދުރޮނގު ކައިރިން ގޯލަށް ބޯޅަ ފޮނުވާލައިގެނެވެ.

އޭގެ 17 މިނެޓުފަހުން، އުމުރުން އެންމެ 18 އަހަރުގެ ކޮބީ މައިނޫ ވަނީ ޔުނައިޓެޑަށް ލީޑު ނަގައިދީފައެވެ. ލިވަޕޫލްގެ ޕެނަލްޓީ އޭރިޔާ ތެރެއިން ކަނާތް ފަރާތުގައި ހުރުމަށްފަހު ދުރުކަނަށް ބޯޅަ ފޮނުވާލައިގެން މައިނޫ މި ކާމިޔާބުކުރި ގޯލާއެކީ، ގިނަ ދުވަސްތަކެއް ވަންދެން ލީގުގެ އެއްވަނައިގައި އޮތް ލިވަޕޫލަށް އެމީހުންގެ މަގާމު ދިފާއުކުރަން އުނދަގޫ ވިއެވެ.

ލިވަޕޫލުން އުފެއްދި ގިނަ ހަމަލާތަކެއް ގޯލަށް ވައްދާނުލެވި އުޅެނިކޮށް، މެޗު ހަމަހަމަ ކުރީ އެ ޓީމަށް ލިބުނު ޕެނަލްޓީއަކުން ސަލާހްއެވެ. 

މި ނަތީޖާއާއެކު ލިވަޕޫލް އާއި އާސެނަލް އޮތީ ޕޮއިންޓުގެ ގޮތުން ހަމަހަމަވެފައެވެ. ނަމަވެސް ގޯލު ފަރަގާއެކު އެޑްވަންޓޭޖު ލިބުނީ އާސެނަލްއަށެވެ. އެ ޓީމުން ވަނީ ހޮނިހިރު ދުވަހުގެރޭ 3-0 އިން ބްރައިޓަން ބަލިކޮށް، ޖުމްލަ 71 ޕޮއިންޓު ހޯދާފައެވެ. އަދި ލިވަޕޫލް އެއްވަރުވުމުން އެ ޓީމަށް ލިބުނު ޖުމްލަ ޕޮއިންޓުގެ އަދަދަކީ ވެސް 71 އެވެ. ލީގުގެ ތިން ވަނައިގައި އޮތް މެންޗެސްޓަރ ސިޓީއަށް ލިބިފައިވަނީ 70 ޕޮއިންޓެވެ.