ރައީސް ޔާމީން އިސްވެ ހުންނަވައި އުފައްދަވާ ޕާޓީ، ޕީއެންއެފް އުފެއްދުމަށް މާދަމާރޭ ޣިޔާޘުއްދީން ސްކޫލުގައި ބޭއްވުމަށް ހަމަޖެއްސި ޖަލްސާ ފަސްކޮށްފިއެވެ.

ޕީއެންއެފް އުފެއްދުމުގައި އިސްކޮށް މަސައްކަތް ކުރައްވަމުން ގެންދަވާ މުހައްމަދު މަލީޙް ޖަމާލު ވިދާޅުވީ، ޕީއެންއެފް އުފެއްދުމަށް ބާއްވަންޖެހޭ ޖަލްސާ ބޭއްވުން ފަސްކޮށްފައި ވަނީ، ދައުލަތުގެ އެކި އިދާރާތަކުން ލިބެންޖެހޭ އެހީތެރިކަން ނުލިބުމުގެ ސަބަބުން ކަމަށެވެ. އަދި ޕީއެންއެފް ނުހުއްޓުވޭނެ ކަމަށާއި ދެން ޖަލްސާ ބާއްވާނެ ތާރީޚެއް ވަރަށް އަވަހަށް އިޢުލާނު ކުރައްވާނެ ކަމުގައިވެސް އޭނާ ވިދާޅުވިއެވެ.

ޕީއެންއެފަށް ނިސްބަތްވާ ބައެއް މެމްބަރުން ވިދާޅުވެފައިވާ ގޮތުގައި، މާދަމާރޭ ބާއްވަން ހަމަޖެހިފައިވާ ޖަލްސާ ފަސްކުރަން ޖެހުނީ އިލެކްޝަންސް ކޮމިޝަންގެ ފަރާތުން ޖަލްސާގައި ބައިވެރިވާންޖެހޭ ފަރާތްތަކަށް މާދަމާރޭ ބައިވެރިނުވެވޭނެ ކަން އަންގާފައި ވުމުންނެވެ. އަދި މިހާރު މަސައްކަތް ކުރަމުން ދަނީ މިމަހުގެ 18 ވަނަ ދުވަހު އެ ޖަލްސާ ބޭއްވުމަށް ކަމަށާއި އެހެން ނަމަވެސް އެތާރީޚުގައި ނުބޭއްވިއްޖެ ނަމަ ދެން ޕާޓީ އުފެއްދުމުގެ ޖަލްސާ ބޭއްވޭނެ ކަމަށް ބެލެވެނީ، ރައްޔިތުންގެ މަޖިލީހުގެ އިންތިޚާބަށް ފަހުގައިކަންވެސް އޭނާ ފާހަގަކުރެއްވިއެވެ.

ޕީއެންއެފް އުފެއްދުމުގެ ޖަލްސާ ފަސްކޮށްފައި ވާއިރު، އެޕާޓީއަށް މެމްބަރުން އިތުރު ކުރުމަށް ހުށައަޅާ މެމްބަރޝިޕް ފޯމްތައް އިލެކްޝަންސް ކޮމިޝަނުން ރިޖެކްޓް ކުރާ ކަމުގައިވެސް އެޕާޓީއަށް ނިސްބަތްވާ އިސް ބައެއް މެމްބަރުން ވިދާޅުވެފައިވެއެވެ.

ކުރީގެ ރައީސް އަދި ޕީޕީއެމްގެ ކުރީގެ ރައީސް އަބްދުﷲ ޔާމީން އުފައްދަވަން އުޅުއްވާ 'ޕީޕަލްސް ނޭޝަނަލް ފްރަންޓް' އުފައްދަން އިލެކްޝަންސް ކޮމިޝަން (އީސީ)އަށް ފުރަަތަމަ ފޯމު ހުށައަޅުއްވާފައި ވަނީ، 26 ނޮވެމްބަރު 2023 ގައެވެ. އެޕާޓީ އުފެއްދުމުގެ މަސައްކަތްތައް ކުރުމުގެ ހުއްދަ އިލެކްޝަންސް ކޮމިޝަނުން ދޫކުރައްވާފައި ވަނީ، ރައީސް ޔާމީނުގެ ދަރިކަލުން ޒެއިން ޢަބްދުﷲ ޔާމީނަށެވެ.