ރިޔާސީ އާދަކާދައެއްގެ ގޮތުގައި ހިނގަމުން އަންނަ ރައީސުލްޖުމްހޫރިއްގެ ދެކަނބަލުން ބާއްވަވާ ޢީދު ސަލާމް ކުރެއްވުން މިއަހަރުގެ ފިތުރު އީދާއިގުޅުގެން އޮންނާނެ ކަމުގައި ސަރުކާރުން ހާމަކޮށްފިއެވެ.

ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުއިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު ބާއްވަވާ އީދު ސަލާމް ކުރެއްވުން އޮންނާނީ މިއަހަރުގެ ފިޠުރު އީދު ދުވަހު މުލީއާގޭގައެވެ. 

މިގޮތިން ޢީދު ސަލާމް ކުރެއްވުން ކުރިޔަށްދާނީ، އެދުވަހުގެ ހެނދުނު، 9:30 އިން 10:30އަށް ކަމުގައި، ރައީސުލްޖުމްހޫރިއްޔާގެ އޮފީހުން ހާމަކުރައްވާފައި ވެއެވެ.

Advertisement

ރައީސުލްޖުމްހޫރިއްޔާގެ ދެކަނބަލުން ބާއްވަވާ ޢީދު ސަލާމްކުރެއްވުމަކީ، އާއްމުކޮށް އެންމެނަށް ހުޅުވާލާފައިވާ ކަމަކަށް ވާތީ، ޢީދު ސަލާމްކުރެއްވުމަށް ވަކިން ދަޢުވަތެއް ނުފޮނުއްވައެވެ. 

ރައީސުލްޖުމްހޫރިއްޔާގެ އޮފީހުން ވިދާޅުވީ، ޢީދު ސަލާން ކުރެއްވުމަށް ވަޑައިގަންނަވާ ބޭފުޅުން މުލީއާގެއަށް ވެދެވަޑައިގަތުމަށް ހަމަޖެހިފައި ވަނީ މެދުޒިޔާރަތް މަގަށް ހުންނަ މުލީއާގޭ ބޮޑު ދޮރޯށިން ކަމަށާއި، މުލީއާގެއަށް ވަޑައިގެންނެވޭނީ، ޝަހީދު ޢަބްދުﷲ ޒުހައިރު ހިނގުމުން މެދުޒިޔާރަތް މަގުން ކަމަށެވެ.