އިމިގްރޭޝަނުން ފޯރުކޮށްދޭ ޚިދުމަތްތަކުގެ ފެންވަރު ރަގަޅުކޮށް, ރައްޔިތުންނަށް ލުއިފަސޭހަ ކޮށްދިނުމުގެ ގޮތުން 5 ޖުލައި 2023 ވަނަ ދުވަހުން ފެށިގެން އިތުރު ބަދަލުތަކެއް ގެނައުމަށް ކޮންޓްރޯލަރ ޖެނެރަލް މުޙައްމަދު އަޙުމަދު ޙުސެއިން ނިންމަވައިފިއެވެ. މިކަން އިއުލާން ކުރެއްވީ ކޮންޓްރޯލަރ ކުރެއްވި ޓުވީޓެއްގައެވެ.

ކޮންޓްރޯލަރ ހާމަ ކުރައްވާފައިވާ ގޮތުގައި, މި ބަދަލާއިއެކު ދިވެހި ޕާސްޕޯޓުގެ ޚިދުމަތް އެއްކޮށް ޑިޖިޓަލައިޒްކޮށް, ޚިދުމަތްދޭ ވަގުތު ރޭގަނޑު 9 އަކާއި ހަމައަށް އިތުރު ކުރެވިގެން ދާނެއެވެ. މި ކަމާއި ގުޅިގެން އިމިގްރޭޝަނުން އިތުރަށް ހާމަކުރެއްވި ގޮތުގައި, އިމިގްރޭޝަންގެ އަމާޒަކީ އަބަދުވެސް ރައްޔިތުންނަށް ލުއިފަސޭހަ ކަމާއެކު ޚިދުމަތް ހޯދޭނެ މަގު ތަނަވަސް ކޮށްދިނުމެވެ. 

ޚިދުމަތަށް ގެނެވުނު ބަދަލުތައް:

ފޯމު ފުރިހަމަކޮށް، ސްކޭންކޮށް އަޕްލޯޑު ކުރަން ނުޖެހުން.

ޕާސްޕޯޓަށް އޮންލައިންކޮށް ހުށަހެޅެމުން ދިއަނަމަވެސް، ފޯމު ފުރައި ސޮއިކޮށް، އެ ފޯމު އަނެއްކާ ސްކޭންކޮށް އަޕްލޯޑުކުރަން ޖެހުމުން ބައެއް ފަރާތްތަކުން ޝަކުވާކުރިއެވެ. އެ ޝަކުވާތައް ބަލައިގަނެ މިއަދު މިވަނީ ޕާސްޕޯޓަށް އެދި ހުށަހަޅާ ފޯމު އުވާލައި، ފޯމާ ނުލައި އެޕްލިކޭޝަން ހުޅަހެޅޭނެ މަގު ފަހިވެގެން ގޮސްފައެވެ.

އައި.ޑީ ކާޑު އަދި ކުރީގެ ޕާސްޕޯޓުގެ ކޮޕީ ދެން ބޭނުމެއް ނުވާނެ.

ކުރީގެ ޕާސްޕޯޓުގެ ބަޔޯޑާޓާ އަދި އޮބްޒަރވޭޝަން ޕޭޖްގެ ފޮޓޯ އަޕްލޯޑް ކުރުމަކީ ކުރިން ކުރަމުން އައި ކަމެއް ނަމަވެސް، މި ބަދަލާއެކު އައި.ޑީ ކާޑޫ އަދި ކުރީގެ ޕާސްޕޯޓު ކޮޕީ ވެސް ދެން ބޭނުމެއްނުވާނެއެވެ.

ސޮއި ކޮށްލުމަށްފަހު ފޮޓޯއެއް ނަގައި އަޕްލޯޑްކޮށްލުން.

ޕާސްޕޯޓަށް އެދި ހުށަހެޅުމުގެ ޕްރޮސެސް މުޅިން ޑިޖިޓަލައިޒް ކުރެވުމާއެކު، ހުށަހަޅާ ފަރާތުން ސޮއިކުރުމަށް ވެސް މިވަނީ  ފަސޭހަތަކެއް ލިބިފައެވެ. މި އައި ބަދަލާއެކު، ޑިޖިޓަލް ސޮއި ބޭނުންކުރެވިދާނެއެވެ. ނުވަތަ ސޮއި ރަނގަޅަށް ސާފުވާނެ ފަދަ ތަނެއްގައި، (މިސާލަކަށް ހުދު ކުލައިގެ ކަރުދާސް) ދެލި ގަދަ ގަލަމަކުން ސޮއިކޮށްލުމަށްފަހު، އޭގެ ފޮޓޯއެއް ނަގައި އަޕްލޯޑް ކޮށްލީމަ ނިމުނީއެވެ. ނަމަވެސް، އަޕްލޯޑު ކުރާ ސޮއި، ޕާސްޕޯޓާ ހަވާލުވުމަށް އަންނައިރު ކުރަންވާނެއެވެ.

އީފާސް މެދުވެރިކޮށް ލޮގިން ވެވުން.

ޕާސްޕޯޓުގެ ޚިދުމަތަށް އެދޭއިރު، އިމުގާ ޕޯޓަލްއަށް ރަޖިސްޓަރކޮށް ވަކި އެކައުންޓެއް ހުޅުވަން ޖެހެއެވެ. މިހާރުގެ ބަދަލާއެކު، ތިބޭފުޅުންގެ އީފާސް އެކައުންޓް މެދުވެރިކޮށް ވެސް އިމުގާ ޕޯޓަލްއަށް ލޮގިން ވެވޭނެއެވެ.

ދެ ޝިފްޓަށް ސްޓާފުން ބަހާލައި ޚިދުމަތް ދޭ ވަގުތު އިތުރުކުރުން.

ޕާސްޕޯޓުގެ ޚިދުމަތަކީ ޑިމާންޑު ބޮޑު ޚިދުމަތެއް ކަމުން، ހަމައެކަނި ރަސްމީ ގަޑީގައި މި ޚިދުމަތް ދިނުމުގެ ބަދަލުގައި ދެދަންފަޅިއަކަށް ބަހާލައި، ޝިފްޓް ޑިއުޓީއަށް ސްޓާފުން ނުކުމެ ޚިދުމަތް ދެވޭނެއެވެ. އެހެންކަމުން، ކުރީގައި ހެނދުނު 8:00 އިން މެންދުރު 14:00 އާ ހަމައަށް ޕާސްޕޯޓާ ހަވާލުވުމަށް ދޫކުރި ނަންބަރު އިތުރު ގަޑިތަކުގައި ދޫކޮށް، ޚިދުމަތްދޭ ވަގުތު ބޮޑުތަނުން އިތުރުކުރެވި، ޕާސްޕޯޓު ޕްރޮސެސްކުރުމަށް ހޭދަވާ ވަގުތު މަދުވެ, ރައްޔިތުން ބޭނުންވާ ފަދަ އަވަސް ޚިދުމަތެއް ފޯރުކޮށްދިނުމަށް މަގުފަހިވެގެން ދާނެއެވެ. އެގޮތުން ޕާސްޕޯޓު ޚިދުމަތުގެ ގަޑިތައް ބަހާލާފައިވަނީ ތިރީގައި ބަޔާންކޮށްފައި ވާގޮތަށެވެ.

ޕާސްޕޯޓާ ހަވާލުވުމަށް ނަންބަރު ދޫކުރާ ގަޑިތައް:

-       ހެނދުނު 8:30 އިން 12:00 އަށް، އަދި

-       މެންދުރު 12:45 އިން ހަވީރު 17:00 އަށް.

ދިވެހި ޕާސްޕޯޓުގެ ޚިދުމަތަށް އިމިގްރޭޝަންގެ ޑިޖިޓަލް ޕްލެޓްފޯމް އިމުގާއިން އޮންލައިންކޮށް ހުށަހެޅުމުގެ ފުރުސަތު ހުޅުވާލީ 22 ޖުލައި 2020 ގައެވެ. އޭގެ ފަހުން މިހާތަނަށް އޮންލައިންކޮށް 125,600 އަށްވުރެ ގިނަ މީހުން ވަނީ ޕާސްޕޯޓު ހައްދާފައެވެ.