ފުޓުބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް) އާ ގުޅުންހުރި 1.9 މިލިއަން ޑޮލަރު (29.3 މިލިއަން ރުފިޔާ)ގެ މައްސަލަތަކެއް ތަހުގީގު ކުރަމުން ދަނިކޮށް، އިތުރު 1 މިލިއަން ޑޮލަރު (15.4 މިލިއަން ރުފިޔާ) ގެ އައު މައްސަލައެއް ފެންމަތިވެއްޖެކަމަށް ރިޕޯޓުކޮށްފިއެވެ.

މި ތަހުގީގަށް އިތުރުވި 1 މިލިއަން ޑޮލަރުގެ މައްސަލައާއެކު، ރާއްޖޭގެ ފުޓްބޯޅައިގެ މައި އިދާރާގެ ތެރޭގައި ހިޔާނާތާއި މަނީ ލޯންޑަރިންއާ ގުޅޭ މައްސަލަތަކެއް ހުރިކަމަށް ތުހުމަތުކޮށް ފަށާފައިވާ މި ތަހުގީގުގައި ޖުމްލަ 2.9 މިލިއަން ޑޮލަރު (44.7 މިލިއަން ރުފިޔާ) ގެ މައްސަލަތަކެއް މިހާރު ކުރިޔަށް އެބަދެއެވެ.

ޕްރޮސިކިއުޓަ ޖެނެރަލް (ޕީޖީ) ހުސެއިން ޝަމީމުގެ އަމުރަކަށް މި މައްސަލަތަކުގެ ތަހުގީގު ފަށަފައިވަނީ މިދިޔަ އަހަރުގެ ފަހުކޮޅުއެވެ. ފުރަތަމަ ބަލަން ފެށި މައްސަލަތަކުގެ ތެރޭގައި ހިމެނެނީ ކޮވިޑާ ގުޅިގެން އެފްއޭއެމްއަށް ލިބުނު 1.9 މިލިއަން ޑޮލަރުގެ ފައިސާއަށް ހިޔާނާތްތެރިވުމުގެ މައްސަލައާއި، ފީފާއިން އެފްއޭއެމްއަށް ދިން 10،000 ޑޮލަރު އެފްއޭއެމްގެ އިސް ވެރިއެއްގެ އެކައުންޓަށް ޖަމާކޮށް އަމިއްލައަށް ބޭނުންކޮށް މަންފާ ހޯދާފައިވާ ކަމުގެ މައްޗަށް ކުރާ ދައުވާއަކާއި އަދި އެފްއޭއެމްގެ ރައީސް ބައްސާމުގެ އެސްއޯއެފް އެކައުންޓަށް 28،000 ޑޮލަރު ޖަމާވި މައްސަލައެކެވެ.

މި މައްސަލަތައް އަވަހަށް ކުރިޔަށް ގެންދިއުމާ ގުޅޭގޮތުން ޕީޖީ ޝަމީމްއާއި ފުލުހުން ވަނީ މިއަދު ބައްދަލުވުމެއް ވެސް ބާއްވާފައެވެ. މި ބައްދަލުވުމުގައި ނުނިމި ހުރި މަސައްކަތްތަކަކީ ކޮބައިކަން ދެނެގަތުމާއި، އެ މަސައްކަތްތައް ކުރިޔަށްގެންދާނެ ގޮތުގެ ތާވަލެއް ހެދުމާއި،  ދައުލަތުގެ އިދާރާތަކުން ބޭނުންވާ އެހީތެރިކަން ހޯދޭނެ ގޮތްތަކާ ގުޅޭ ގޮތުންނާއި އަދި މި މައްސަލަތަކުގައި އިތުރަށް ތުހުމަތުކުރެވޭ މީހުންގެ ބަޔާން ނެގުމާ ގުޅޭ ގޮތުން މަޝްވަރާކުރިއެވެ.