ވައިގެ މަގުން ރާއްޖެއައި ޕާކިސްތާނު މީހެއްގެ އަތުން 5 ކިލޯގެ މަސްތުވާތަކެތި ފެނިފައިވާ ކަމުގައި މޯލްޑިވްސް ކަސްޓަމްސް ސަރވިސްއިން ވިދާޅުވެއްޖެއެވެ.

ކަސްޓަމްސްއިން ވިދާޅުވީ، އެމީހާގެ އަތުން މަސްތުވާތަކެތި ފެނިފައި ވަނީ މިދިޔަ އަންގާރަ ދުވަހުގައި ކަމަށެވެ. އެމީހާއަކީ، ދޯހާ މަގުން މާލެއައި އުމުރުން 56 އަހަރުގެ ޕާކިސްތާނު މީހެއް ކަމަށާއި މަސްތުވާތަކެތި ފޮރުވާފައި ހުރީ އޭނާގެ ލަގެޖުގައި ކަމަށްވެސް ކަސްޓަމްސްއިން ވިދާޅުވިއެވެ.

ކަސްޓަމްސްއިން ވިދާޅުވީ، އޭނާގެ އަތުން ޖުމުލަ 5.3 ކިލޯގެ މަސްތުވާތަކެތި ފެނިފައިވާ ކަމަށާއި، ޓެސްޓްތަކުން އެތަކެތި މަސްތުވާތަކެތީގެ ބާވަތެއް ކަމުގައިވާ ހެރޮއިންއަށް ޕޮޒިޓިވްވެފައިވާ ކަމަށެވެ.  އަދި އެ މަސްތުވާތަކެތީގެ މަގުމަތީ އަގު 5.3 މިލިއަން ރުފިޔާއަށް އަރާނޭ ކަމުގައިވެސް ކަސްޓަމްސްއިން ވަނީ ވިދާޅުވެފައެވެ.

ކަސްޓަމްސްއިން ވިދާޅުވީ، އަތުލައިގަނެވުނު މަސްތުވާތަކެއްޗާއި އެމީހާ ފުލުހުންނާއި ހަވާލުކޮށްފައިވާ ކަމަށެވެ.