އައު ސަރުކާރު ވެރިކަމާއި ހަވާލު ވިއިރު، ކުރީ ސަރުކާރުން ތަޢުލީމީ ދާއިރާއިން ސްކޫލުތަކުގައި 107 މަޝްރޫޢެއް ފަށާފައި އޮތް ކަމުގައި، މިނިސްޓަރ އޮފް އެޑިޔުކޭޝަން، ޑރ. އިސްމާއީލް ޝަފީއު ވިދާޅުވެއްޖެއެވެ.

ރައްޔިތުންގެ މަޖިލީހުގައި ވަޒީރުންނާއި ސުވާލު ކުރުމުގެ ވަގުތުގައި، ސްކޫލުތަކުގެ ޢުމްރާނީ ތަރައްޤީއަށް ފަށާފައި ހުރި، މަޝްޢޫރުތަކާއި ގުޅޭ ގޮތުން މެމްބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރ ޝަފީޢު ވިދާޅުވީ ސަރުކާރު ބަދަލުވި އިރު، 107 މަޝްރޫޢެއް ހިނގަމުން ދިޔަ ކަމަށެވެ. އޭގެ ތެރެއިން ބައެެއް މަޝްރޫޢުތައް ހުއްޓިފައިވާއިރު، އަނެއްބައި މަޝްރޫޢުތައް ލަސްދުވެއްޔެގައި ކުރިޔަށްދާކަން މިނިސްޓަރ ފާހަގަކުރެއްވިއެވެ.

މިނިސްޓަރ ވިދާޅުވީ، މިހާރުވެސް ތަޢުލީމީ ދާއިރާއިން ސްކޫލުތަކުގައި ޖުމުލަ 130 މަޝްރޫޢު ހިނގާއިރު، މަޝްރޫޢުތައް ހުއްޓުމުގައި ނުވަތަ މަޑު ޖެހިގެން ދިޔުމުގެ ސަބަބަކީ، ކޮންޓްރެކްޓަރުންނަށް ދޭންޖެހޭ ފައިސާ ނުދެވި ލަސްވެގެން ދިޔުން ކަމަށެވެ. މިގޮތުން 128 މިލިޔަން ރުފިޔާ ނުދެވި އޮތް އިރު އޭގެ ތެރެއިން 90 މިލިއަން ރުފިޔާ މިހާރު މިސަރުކާރު އައުމަށްފަހު ކޮންްޓްރެކްޓަރުންނަށް ދޫކޮށްފައިވާ ކަމުގައިވެސް މިނިސްޓަރ ވިދާޅުވިއެވެ. 

Advertisement

މިނިސްޓަރ ވިދާޅުވީ، އެމަނިކުފާނު މަޤާމާއި ހަވާލުވެވަޑައިގެންނެވުމަށްފަހުގައި އެންމެ އިސްކަމެއް ދެއްވާފައި ވާނީ ހުއްޓިފައި ހުރި މަޝްރޫޢުތައް އަވަހަށް ފެށުމަށް ކަމަށެވެ.