ސައުދީ ޕްރޮފެޝަނަލް ލީގުގައި ހުކުރު ދުވަހުގެރޭ އަލް ނަސްރު އާއި އަލް އަހްލީ ބައްދަލުކުރި މެޗުގައި ކްރިސްޓިއާނޯ ރޮނާލްޑޯ ކާމިޔާބުކުރި ގޯލާއެކު، އަލް ނަސްރުގެ ރީނދޫ ޖާޒީގައި އޭނާ 50 ގޯލު ހަމަކޮށްފިއެވެ.

ރަށުން ބޭރުގައި ހުކުރު ދުވަހުގެރޭ ކުޅުނު މި މެޗު އެ ޓީމުން ކާމިޔާބުކުރީ 1-0 އިންނެވެ. މެޗުގެ ހަމައެކަނި ގޯލު 68 ވަނަ މިނެޓުގައި، ލިބުނު ޕެނަލްޓީއަކުން ކާމިޔާބުކުރީ ރޮނާލްޑޯއެވެ. މި މޮޅާއެކު އެ ޓީމަށް ވަނީ 24 މެޗުން 56 ޕޮއިންޓު ލިބިފައެވެ. ލީގުގެ އެއްވަނައިގައި އޮތީ 23 މެޗުން 65 ޕޮއިންޓު ހޯދައިގެން އަލް ހިލާލްއެވެ.

އަލް އަހްލީ ކޮޅަށް ގޯލު ޖެހުމަށްފަހު ރޮނާލްޑޯ އުފާ ފާޅު ކުރަނީ--- ފޮޓޯ: އަލްނަސްރު

އުމުރުން 39 އަހަރުގެ ރޮނާލްޑޯ ސައުދީ އަރައްބިއްޔާއަށް ބަދަލުވެފައިވަނީ 2023 ވަނަ އަހަރުގެ ޖެނުއަރީ މަހުއެވެ. މި ސީޒަނުގައި މިހާތަނަށް ސައުދީ ލީގުގައި އެންމެ ގިނަ ގޯލު ކާމިޔާބުކޮށްފައިވަނީ ވެސް އޭނާއެވެ. އަލް އަހްލީ ކޮޅަށް ޖެހި ގޯލާއެކު، ރޮނާލްޑޯ މި ސީޒަނުގައި މިހާތަނަށް 23 ގޯލު ކާމިޔާބުކޮށްފައިވެއެވެ.

މިދިޔަ ސީޒަންގެ މެދުތެރެއިން ސައުދީ ލީގަށް ރޮނާލްޑޯ ބަދަލުވި ނަމަވެސް، މިދިޔަ ސީޒަންގައި އޭނާ ވަނީ 14 ގޯލު ކާމިޔާބުކޮށްފައެވެ. އެ ސީޒަނުގައި އެންމެ ގިނަ ގޯލެ ޖެހި އަލްއިއްތިހާދުގެ މޮރޮކޯ ފޯވާޑް، އަބްދުއްރައްޒާކު ހަމަދުއްލާއަށް ކާމިޔާބު ކުރެވުނީ 26 މެޗުން 21 ގޯލެވެ.

ރޮނާލްޑޯވަނީ އޭނާގެ ކްލަބު ކެރިއަރުގައި ކުޅުނު 900 އަށް ވުރެން ގިނަ މެޗުން 700 އަށް ވުރެން ގިނަ ގޯލު މިހާތަނަށް ކާމިޔާބުކޮށްފައެވެ.