ކަޅު ބާޒާރުގައި ބޭރު ފައިސާގެ މުއާމަލާތް ކުރަމުން ދިޔަ 7 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާކަމަށް އެ މުއައްސަސާއިން މިއަދު ބުނެފިއެވެ.

ކަޅު ބާޒާރުގައި ބޭރު ފައިސާގެ މުއާމަލާތް ހިންގާ ބިދޭސީން ހޯދުމަށް އިމިގްރޭޝަނުން ހިންގާފައިވާ މި އޮޕަރޭޝަންގައި ބަލާފާސްކޮށްފައިވަނީ، އެ އިދާރާގެ އޮފީސްތަކެއް ހިންގަމުން އަންނަ މ. ސްޓަރކްލައުޑްސް އިމާރާތުގެ ކައިރިއެވެ. މި އިމާރާތުގެ ތިރީގައި ހުންނަ ބޭންކު އޮފް މޯލްޑިވްސްގެ ޑޮލަރު އޭޓީއެމްތަކުގެ ކައިރީގައި އަބަދުވެސް ބިދޭސީން ތިބެއެވެ. އަދި އޭޓީއެމުން ނިކުންނަ މީހުނާއެކު ޑޮލަރުގެ މުއާމަލާތް ކުރުމަށް މި މީހުން އަންނަނީ އަބަދުވެސް މަސައްކަތް ކުރަމުންނެވެ.

މިދިޔަ ހޮނިހިރު ދުވަހު ހިންގާފައިވާ މި އޮޕަރޭޝަނާ ގުޅޭގޮތުން އިމިގްރޭޝަނުން ހިއްސާކޮށްފައިވާ ގޮތުގައި، މި އޮޕަރޭޝަން ހިންގުމުގެ އެއް ސަބަބަކީ މި ބިދޭސީންގެ ގިނަ ޝަކުވާތަކެއް އެ މުއައްސަސާއަށް ލިބެމުން ދިއުމެވެ. އަދި އޮޕަރޭޝަންގެ ހިންގާފައިވަނީ މި ސަރަހައްދުގައި ހަރަކާތްތެރިވާ ބިދޭސީންގެ ހަރަކާތްތައް ކުރިއާލާއި ދެނެގަތުމަށްފަހުކަމަށް އިމިގްރޭޝަނުން ހާމަކޮށްފައިވެއެވެ.

މި އޮޕަރޭޝަންގައި އިމިގްރޭޝަނުގެ ބެލުމުގެ ދަށަށް ގެންދިޔަ 7 މީހުންނަކީ ވެސް ފުޅާ ދާއިރާއެއްގައި ގަވާއިދާ ހިލާފަށް ކަޅު ބާޒާރުގައި ޑޮލަރުގެ ވިޔަފާރި ކުރަމުން އަންނަ ބިދޭސީންކަމަށާއި، މީގެތެރޭގައި ސައްހަ ވީޒާއެއް ނެތި ރާއްޖޭގައި އުޅެމުން އަންނަ ބިދޭސީންނާއި، ދޫކޮށްފައިވާ ހުއްދައިގެ ބޭރުން މަސައްކަތްކުރާ ބިދޭސީން ހިމެނޭކަމަށް އިމިގްރޭޝަނުން ބުނެފައިވެއެވެ.