ސަރުކާރުގެ ސްކޫލް މަދަރުސާތަކުގައި ކިޔަވަމުންދާ ދަރިވަރުންގެ ތެރެއިން ހުޅުމާލެ ފޭސް 2 ގެ ސްކޫލަކުން ޖާގައަށް އެދި ޖާގަ ނުލިބިފައި ތިބި 800 ވުރެ ގިނަ ކުދިން އެބަތިބި ކަމުގައި އެޑިޔުކޭޝަން މިނިސްޓަރ އިސްމާއީލް ޝަފީޢު ވިދާޅުވެއްޖެއެވެ.

މިނިސްޓަރ ޝަފީޢު މިހެން ވިދާޅުވީ، ހުޅުމާލެ ފޭސް 2 ގެ ސްކޫލުތަކުން ޖާގަ ނުލިބި ބެލެނިވެރިންގެ ޝަކުވާތައް ބޮޑުވެފައި ވަނިކޮށެވެ.

މިނިސްޓަރ ވިދާޅުވީ، ހުޅުމާލެ 2 ވަނަ ފިޔަވަހީގައި ދިރިއުޅޭ ވަރަށް ގިނަ އަދަދެއްގެ ރައްޔިތުންގެ 2 ވަނަ ފިޔަވިހީގެ ސްކޫލުން ޖާގައަށް އެދި މިނިސްޓްރީއަށް ތަކުރާރުކޮށް ހުށަހަޅަމުންދާ ކަމަށެވެ. މިގޮތުން މިއަދާއަހަމައަށް 800އަށް ވުރެ ގިނަ ރިކުއެސްޓް ލިބިފައި ވާކަމަށާއި، މި ތައުލީމީ އަހަރު ނިމޭއިރު މި އަދަދު 1000އަށް ވުރެ މައްޗަށް އަރާނެ ކަމަށް ބެލެވޭ ކަމުގައިވެސް މިނިސްޓަރ ވިދާޅުވިއެވެ. 

Advertisement

މިނިސްޓަރ ޝަފީޢު ވިދާޅުވީ،  މި ހާލަތު މެދުވެރިވީ ހުޅުމާލޭގެ 2 ފިޔަވަހީގެ އާބާދީ އިތުރުވާނެ މިންވަރު ދެނެގަނެ، އަންދާޒާ ކުރެވޭ ދަރިވަރުންގެ އަދަދަށް ރިއާޔަތްކޮށް ސްކޫލް އެޅުމުގައި އިހުމާލުވެފައިވާތީ ކަމަށެވެ.

ހުޅުމާލެ ދެވަނަ ފިޔަވަހީގައި އެޅި ދެ ސްކޫލުގެ ތެރެއިން ޞަލާޙުއްދީން ސްކޫލު ދެ ދަންފަޅިއަށް ބަދަލުކޮށްގެން ޖާގަ ބޭނުންވާ ކުދިންނަށް ޖާގަ ދިނުމަށް މިނިސްޓްރީން ނިންމާފައި ވާއިރު، އެއް ދަންފަޅިއަށް ކިޔަައިދޭ އެސްކޫލުގައި މިހާރުވެސް 2054 ދަރިވަރުން އަންނަނީ ތަޢުލީމު ހާސިލްކުރަމުންނެވެ.

ހުޅުމާލެ ފޭސް 2 ގައި މިހާރު ހުންނަނީ 2 ސްކޫލެވެ. އެއީ ކާމިލް ދީދީ ޕްރައިމަރީ ސްކޫލާއި، ޞަލާޙުއްދީން ސްކޫލެވެ.

ހުޅުމާލެ ފޭސް 2 ގައި، 1700 ކުދިންގެ ޖާގައިގެ އިތުރު ސްކޫލެއް އިމާރާތް ކުރުމަށް ހުސްވި އަހަރު ނޮވެމްބަރު މަހުގެ 27 ވަނަ ދުވަހުގައި ސަރުކާރުން ވަނީ ބަޔަކާއި މަސައްކަތް ހަވާލުކުރައްވާފައެވެ. އަދި ޑިސެމްބަރު 25 ވަނަ ދުވަހު ރައީސުލްޖުމްހޫރިއްޔާ އެސްކޫލުގެ ބިންގާ ވަނީ އަޅުއްވައިދެއްވާފައެެވެ.