ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި ވާދަކުރާ އެމްޑީޕީގެ ކެންޑިޑޭޓުންނަށް ތާއީދު ހޯއްދަވައި ދެއްވުމަށް، ކުރީގެ ނައިބު ރައީސް ފައިޞަމް ނަސީމްވެސް ކެމްޕޭނުގައި ބައިވެރިވެވަޑައިގަންނަވައިފިއެވެ.

ކުރީގެ ނައިބު ރައީސް މިއަދު ވަނީ، ރައްޔިތުންގެ މަޖިލީހުގެ ވިލުފުށި ދާއިރާއަށް އެމްޑީޕީގެ ޓިކެޓްގައި ވާދަކުރައްވާ، އާދަމް މުޙައްމަދުގެ ކެމްޕޭން ހަރަކާތްތަކުގައި ބައިވެރިވެވަޑައިގެންނެވުމަށް މިއަދު އެދާއިރާއަށް ޒިޔާރަތްކުރައްވާފައެވެ. ކުރީގެ ނައިބު ރައީސް ފައިޞަލް ނަސީމް ވިލުފުށީދާއިރާގައި ހިމެނޭ ވިލުފުއްޓަށް ވަޑައިގެންނެވުމުން އެރަށުގެ އެމްޑީޕީގެ މެމްބަރުންގެ ފަރާތުން ވަނީ އެމަނިކުފާނަށް ހޫނު މަރުޙަބާއެއް ދަންނަވާފައެވެ.

ރައްޔިތުންގެ މަޖިލީހުގެ އިންތިޚާބަށް އެމްޑީޕީގެ ކެންޑިޑޭޓުންނަށް ތާއީދު ހޯއްދަވައި ދެއްވުމަށްޓަކައި، ކުރީގެ ރައީސް އިބްރާހީމް މުޙައްމަދު ޞާލިޙާއި އެމްޑީޕީގެ ރައީސް، ޢަބްދުﷲ ޝާހިދުވެސް ގެންދަވަނީ އަތޮޅުތެރޭގެ ރަށްރަށަށް ދަތުރުފުޅުތައް ކުރައްވަމުންނެވެ.

ރައްޔިތުންގެ މަޖިލީހުގެ އިންތިޚާބުގެ ކެމްޕޭނަށް ކުރީގެ ނައިބުރައީސް ފައިސަލް ނަސީމް ނުކުމެވަޑައިގެންނެވި އިރު އެމަނިކުފާނު އެމްޑީޕީއާ ގުޅިވަޑައިގެންނެވީ، ހުސްވި ފެބުރުއަރީ މަހުގެ 22 ވަނަ ދުވަހުގައެވެ.

މިއަހަރުގެ ރައްޔިތުންގެ މަޖިލީހުގެ އިންތިޚާބު މިހާރު ބޭއްވުމަށް ހަމަޖައްސާފައި ވަނީ މިއަހަރުގެ އޭޕްރީލް މަހުގެ 21 ވަނަ ދުވަހުގައެވެ.