ޕްރޮސެކިއުޓަރ ޖެނެރަލް ޙުސައިން ޝަމީމަށް ހަމަލާދިން މައްސަލައިގައި މިހާތަނަށް ޖުމުލަ 7 މީހުން ހައްޔަރުކޮށްފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ޕީޖީ ޝަމީމަށް ހަމަލާދިން މައްސަލަ އާއި ގުޅޭ ގޮތުން އެންމެ ފަހުގެ މައުލޫމާތު މީޑިއާއާއި ހިއްޞާކޮށް ފުލުހުން ވިދާޅުވީ، މިހާތަނަށް އެމައްސަލައިގައި ޖުމުލަ 7 މީހުން ހައްޔަރުކޮށްފައިވާ ކަމަށާއި އެ އެންމެނަކީވެސް ދިވެހި ފިރިހެނުން ކަމަށެވެ. އަދި އެމީހުން ހައްޔަރުކޮށްފައި ވަނީ، ކޯޓު އަމުރުގެ ދަށުން އެކި ދުވަސްމަތިން ކަމަށާއި، އެމީހުންގެ ބަންދާއިމެދު ގޮތް ނިންމުމަށް ކޯޓަށް ހާޟިރު ކުރުމުން ޝަރީޢަތް ނިމެންދެން އެމީހުން ބަންދުގައި ބޭތިއްބުމުގެ އަމުރު ދީފައިވާ ކަމަށެވެ.

މިމައްސަލަ ސީރިއަސް މައްސަލައެއްގެ ގޮތުގައި ފުލުހުން ގެންދަނީ ތަޙްޤީޤު ކުރަމުންނެވެ.

ޕްރޮސެކިއުޓަރ ޖެނެރަލް ހުސައިން ޝަމީމަށް ހަމަލާދީފައި ވަނީ މިޖެނުއަރީ މަހުގެ 31 ވަނަ ދުވަހުގެ ހެނދުނު ކަސްރަތަށް ނުކުމެ އުޅުއްވަނިކޮށް، މާލޭ ނޫރު މިސްކިތް ކައިރިންނެވެ. 

ޕީޖީ ހުސައިން ޝަމީމަށް ހަމަލާދީފައި ވަނީ ދުރާލައި ރާވައި ފާރަލައިގެން ކަމަށް އެމައްސައިގެ މައުލޫމާތު ދިނުމަށް ފުލުހުން ބޭއްވި ނޫސްވެރިންގެ ބައްދަލުވުމުގައި ވިދާޅުވެފައިވެއެވެ.