ފުލުހުންނާއި އޭސީސީން ގުޅިގެން އާރްޑީސީގެ ޚިޔާނާތުގެ މައްސަލަ ބަލަން ފަށައިފިއެވެ. 

ފުލުހުންގެ އިދާރާއިން ވިދާޅުވީ، އެމައްސަލަ އޭސީސިއާ ފުލުހުން ގުޅިގެން ކުރިޔަށް ގެންދިޔުމަށް ފަހުމު ނާމާއެއްގައި މިދިޔަ ބުރާސްފަތި ދުވަހު ސޮއެކޮށްފައިވާ ކަމަށެވެ.

މިމައްސަލަ އާއި ގުޅިގެން މިއަދު ފުލުުހުންނާއި އޭސީސީން ގުޅިގެން ބޭއްވި ނޫސްވެރިންގެ ބައްދަލުވުމުގައި ވަނީ، އެ މައްސަލައިގައި ޖޮއިންޓް އިންވެސްޓިގޭޝަނެއް ދެ މުއައްސަސާ އާއި ގުޅިގެން މިހާރު ފަށާފައިވާކަމަށެވެ. މިގޮތުން އެމައްސަލައިގައި، ކޮރަޕްޝަނާއި، ޚިޔާނާތް އަދި މަނީ ލޯންޑަރިންގެ މައްސަލަތައް އޭގައި ހިމެނޭ ކަމުގައިވެސް ފުލުހުން ވަނީ ވިދާޅުވެފައެވެ.

ފުލުހުން ވިދާޅުވީ، އާރްޑީސީގެ ތެރޭގައި ހިމެނޭ ޚިޔާނާތުގައި ބައިވެރިވާ 3 މީހަކު ފާހަގަކުރެވިފައިވާ ކަމަށާއި، އަދި އާރްޑީސީގެ އިތުރު 15 ވަރަކަށް މުވައްޒަފަކު އޭގެ ތެރޭގައި ހިމެނިފައިވާކަން ފާހަގަކުރެވިފައި ވާކަމަށެވެ. އޭގެ ތެރެއިން އެކެއްގެ އެކައުންޓަށް 11 މިލިޔަން ރުފިޔާ ވަދެފައިވާ ކަމަށާއި، އާރްޑީސީގެ މުވައްޒަފަކާއި ގުޅުން ހުރި މީހެއްގެ ކުންފުންޏަށްވެސް 3 ލައްކަ ރުފިޔާ ވަދެފައިވާކަން ފާހަގަކުރެވިފައިވާ ކަމަށެވެ. އަދި ޚިޔާނާތުގައި ބައިވެރިވެފައި ވާކަމަށް ތުހުމަތު ކުރެވޭ 3 މީހުންގެ އެކައުންޓަށް ޖުމުލަ، 14 މިލިއަން ރުފިޔާ ވަދެފައިވާ ކަމުގައިވެސް ފުލުހުންގެ އިކޮނޮމިކް ކްރައިމް ޑިޕާޓްމަންޓްގެ ހެޑް ސްޕްރިންޓެންޑެންޓް އޮފް ޕޮލިސް ޢަބުދުﷲ ރަޝީދު ވިދާޅުވި ވެއެވެ.

އަދި އާރްޑީސީގެ ޚިޔާނާތުގެ މައްސަލައަށް ބަލާއިރު އެ ކުންފުނިން ފައިސާ ގެންގުޅެފައި ވަނީ ދައުލަތުގެ މާލިއްޔަތުގެ ޤާނޫނާއި އެއްގޮތަށް ނޫންކަމުގައިވެސް ފުލުހުންވަނީ ވިދާޅުވެފައެވެ.

ފުލުހުންގެ އެކްޓިން ހެޑް އޮފް ކްރައިމް އިންވެސްޓިގޭޝަން ކޮމާންޑް، ޗީފް ސުޕްރިންޓެންޑެންޓް އަހުމަދު ނާފިޒު ވިދާޅުވީ، އާރްޑީސީގެ ޚިޔާނާތުގެ މައްސަލަ އެންމެ ފުރަތަމަ ސަމާލުކަމަށް ގެނެސްފައި ވަނީ 2022 ވަނަ އަހަރު ސެޕްޓެމްބަރު މަހު، ދައުލަތުގެ އިދާރާއަކުން ކަމަށެވެ. އަދި އެ ޚިޔާނާތާއި ގުޅިގެން އެކަމާއި ގުޅޭ ލިޔެކިޔުންތައް ހޯދުމަށް، ކަމާއި ގުޅޭ މުއައްސަަސާތަކަށް މި ދިޔަ އަހަރު، ނޮވެމްބަރު މަހުގެ ތެރޭގައި ވަދެފައިވާނެ ކަމަށްވެސް ފުލުހުންގެ އިދާރާއިން ވިދާޅުވިއެެވެ. 

ފުލުހުންގެ އެކްޓިން ހެޑް އޮފް ކްރައިމް އިންވެސްޓިގޭޝަން ކޮމާންޑް، ޗީފް ސުޕްރިންޓެންޑެންޓް އަހުމަދު ނާފިޒު ވިދާޅުވީ، އާރްޑީސީގެ ޚިޔާނާއި ގުޅޭ 213 ޓްރާންސްސެކްޝަނެއް ފާހަގަވެފައިވާ ކަމަށެވެ. އެހެން ނަމަވެސް މިހާތަނަށް 3 މީހުން ފާހަގަވެފައި ވީނަމަވެސް އެމީހުންގެ މައްޗަށްވެސް އަދި ކުށް ސާބިތު ކުރެވޭ ވަރަށް ހެކި ހޯދިފައި ނުވާކަމަށާއި، ޚިޔާނާތުގެ ޖުމުލަ އަދަދުވެސް ނޭނގޭ ކަމަށް ނާފިޒް ވިދާޅުވިއެވެ.

އާރްޑީސީގެ ޚިޔާނާތުގެ މައްސަލައިގައި ތުހުމަތު ކުރެވޭ މީހުންގެ ނަންތަކާއި ކުންފުނިތަކެއް ފުލުހުންނާއި އޭސީސީންވެސް ހާމައެއް ނުކުރެއެވެ. އެއީ އެމައްސަލައިގެ ތަހްޤީޤަށް ހުރަސް އެޅިދާނެތީކަމުގައި، ނާފިޒް ވިދާޅުވިއެވެ.

ނާފިޒް ވިދާޅުވީ، ފުލުހުން އެ މައްސަލަ ތަޙްޤީޤުުކުރުމަށް އެއްވެސް ފަރާތެއްގެ ނުފޫޒެއް ނެތްކަމަށެވެ.

އާރްޑީސީގެ ޚިޔާނާތުގައި ތުހުމަތުތައް ކުރިންވެސް ކޮށްފައިވާ، އެކުންފުނީގެ ކުރީގެ މެނޭޖިން ޑައިރެކްޓަރ މޫސާ ޢަލި މަނިކު (މޫކޭ) ކުރިޔަށް އޮތް ރައްޔިތުންގެ މަޖިލީހުގައި ހުޅުމާލެ އުތުރު ދާއިރާއަށް ވާދަކުރައްވައެވެ.