އަނިޔާގެ ސަބަބުން މަހެއްހާ ދުވަހު ކުޅުމާއި ދުރުގައި ހުރުމަށްފަހު އެނބުރި އައިގޮތަށް، ޑާވިން ނުނިއޭޒް އިންގްލިޝް ޕްރިމިއަ ލީގުގައި ލިވަޕޫލަށް މުހިންމު 3 ޕޮއިންޓު ހޯދައިދީފިއެވެ.

ލީގުގެ އެއްވަނައިގައި އޮތް ލިވަޕޫލާއި 17 ވަނައިގައި އޮތް ނޮޓިންގްހަމް ފޮރެސްޓް ބައްދަލުކުރި މެޗު ލިވަޕޫލުން ކާމިޔާބުކުރީ 1-0 އިންނެވެ.

މެންޗެސްޓަރ ސިޓީ އާއި އާސެނަލް ލިވަޕޫލުގެ ފަހަތުގައި އޮތީ އެންމެ ޕޮއިންޓެއް ގެއްލުނަސް އޭގެ ހިތި ނަތީޖާ ވަގުތުން ފެންނާނެހާ ކައިރީގައި ކަމުގައިވުމުން، މެޗުން 3 ޕޮއިންޓު ނެގުން ލިވަޕޫލަށް އޮތީ ވަރަށް މުހިންމުވެފައެވެ. ނަމަވެސް އަނިޔާގެ ސަބަބުން އެ ޓީމުގެ މުހިންމު ސްޓްރައިކަރުން ކަމުގައިވާ މުޙައްމަދު ސަލާހު އާއި ޑިއެގޯ ޖޯޓާ އަދި ޑޮމެނިކް ސޮބޯސްލައި ކުޅުމާއި ދުރުގައި ތިބެން ޖެހުމަކީ، ލިވަޕޫލަށް ކުރިމަތިވެފައި އޮތް ބޮޑު ގޮންޖެހުމެކެވެ. އޭގެ ހެއްކަކީ ފޮރެސްޓުގެ ގޯލަށް ލިވަޕޫލުން މިރޭ 22 ޝޮޓު ފޮނުވާލި ނަމަވެސް، އެންމެ ޝޮޓެއް ގޯލާ ދިމާކުރެވިފައިވުމެވެ.

Advertisement

ނުނޭޒް ކުޅެން ނިކުތީ މެޗުގެ 60 ވަނަ މިނެޓުގައި އެންޑީ ރޮބަޓްސަންގެ ބަދަލުގައެވެ. ގޯލެއް ކާމިޔާބު ނުކުރެވި ކޮލްޕަށް ގޮތް ހުސްވެފައި ވަނިކޮށް، ނުނޭޒުގެ ގޯލު ފެނިގެން ދިޔައީ މެޗުގެ 90 މިނެޓު ހަމަވެގެން އިތުރު ވަގުތު ކުޅެމުން ދަނިކޮށް، 9+90 ވަނަ މިނެޓުގައި މެކަލިސްޓާގެ ރީތި ހުރަހަކުން ނުނޭޒް ބޮލުން ޖަހާ ކާމިޔާބުކުރި ގޯލުންނެވެ.

މިއީ ކްލޮޕް ލިވަޕޫލާ ހަވާލުވިފަހުން، 90 ވަނަ މިނެޓުގެ ފަހުން ކާމިޔާބުކުރި ގޯލުތަކުން ލިވަޕޫލް މޮޅުވި 18 ވަނަ މެޗެވެ. މީގެ އިތުރުން، ބަދަލުކުޅުންތެރިންގެ ގޮތުގައި ކުޅެން ނިކުމެ ލިވަޕޫލުގެ ކުޅުންތެރިން މި ސީޒަނުގައި މިހާތަނަށް 43 ގޯލު ކާމިޔާބު ކުރުމުގައި (21 ގޯލާއި 22 އެސިސްޓު) ހިއްސާވެފައިވެއެވެ. މިއީ މި ސީޒަންގައި ޔޫރަޕްގެ ރެކޯޑެކެވެ.