އިންގްލިޝް ޕްރިމިއަ ލީގުގެ މާލީ ގަވާއިދާ ޚިލާފުވެގެން އެވަޓަން ފުޓުބޯޅަ ކްލަބަށް ދިން އަދަބު ލުއިކުރުމަށް އެޕީލް ބޯޑުން ނިންމައިފިއެވެ. އެޕީލް ބޯޑުން ނިންމީ ކުރިން އުނިކުރި 10 ޕޮއިންޓުގެ ބަދަލުގައި 6 ޕޮއިންޓު އުނިކުރުމަށެވެ.

2021/2022 ސީޒަންގައި އެވަޓަން ކުރި މާލީ ކުށަށް ރިއާޔަތްކޮށް، މައްސަލަ ބެލި މިނިވަން ކޮމެޓީއިން ނިންމީ އެ ޓީމުން ލީގުގައި ހޯދާފައިވާ ޕޮއިންޓުތަކުގެ ތެރެއިން 10 ޕޮއިންޓު އުނިކުރުމަށެވެ. 

މި ނިންމުމާ ގުޅިގެން މިދިޔަ ނޮވެމްބަރު މަހު ޕޮއިންޓު އުނިކުރުމުން އެވަޓަންވަނީ ރެލިގޭޝަން ޒޯނަށް ވެއްޓިފައެވެ. ނަމަވެސް އަދަބު ލުއިކުރުމާ ގުޅިގެން އެ ޓީމުވަނީ މިހާރު 25 ޕޮއިންޓާއެކު ލީގުގެ 15 ވަނައަށް ކުރިޔަށް ޖެހިލާފައެވެ.

Advertisement

އެވަޓަންގެ 10 ޕޮއިންޓު އުނިކުރުމާ ގުޅިގެން އޭރު އެވަޓަންގެ ސަޕޯޓަރުންވަނީ އެ ޓީމުގެ ހޯމް މެޗުތަކުގައި ޕްރިމިއަލީގުގެ މި ނިންމުމާ ދެކޮޅަށް ޝުއޫރު ފާޅުކޮށްފައެވެ. ސަޕޯޓަރުން ތުހުމަތުކުރީ ޕްރިމިއަ ލީގުން ޓީމުތަކުގެ މެދުގައި ތަފާތުކުރުން ގެންގުޅޭ ކަމަށެވެ. 

ނަމަވެސް އެޕީލް ކޮމެޓީން އެވަޓަންގެ އަދަބު ލުއިކުރުމަށް ނިންމުމުން އެވަޓަންގެ މެނޭޖުމެންޓު އޮތީ އެކަމާ ހިންހަމަޖެހިފައެވެ.