މިހުސްވި ޖެނުއަރީމަހުގެ 14 ވަނަ ދުވަހުން ފެށިގެން މިހާތަނަށް، މަސްވެރިން މިފްކޯއަށް ކިރުވާފައިވާ މަހަށް ލާރި ނުދެވި ހުރިކަން މިފްކޯއިން މިއަދު ހާމަކޮށްފިއެވެ.

ކުރީ ސަރުކާރުގެ ދުވަސްވަރު މަސްވެރިން ކިރުވާފައިވާ މަހަށް އޭރު ސަރުކާރުން ފައިސާ ނުދީ އޮތް ކަމުގައި ބުނެ، މިސަރުކާރުގެ ސިޔާސީ ބޭފުޅުން ވާހަކަފުޅުތައް ދައްކަވަމުން ދާއިރު، މިއަދު މިފްކޯއިން އެކްސްގައި ކުރި ޕޯސްޓްގައި ބުނެފައި ވަނީ، ސަރުކާރު މިއަދު ޖަމާކޮށްދިން ފައިސާ އާއެކު، 14 ޖެނުއަރީގެ ކުރިން މަސްވެރިން މަސްކިރުވައި ދޫކޮށްފައިވާ ހުރިހާ ބިލަކަށް ފައިސާދީ ނިމޭނެ ކަމަށެވެ.

ދެކުނު ބައެއް މަސްދޯނި ފަހަރުން މައުލޫމާތު ލިބިފައިވާ ގޮތުގައި މިފްކޯއަށް މަސްކިރުވާފައި ފައިސާ ނުލިބި 5 ހަފްތާވެފައިވާ ބިލްތައްވެސް އެބަހުއްޓެވެ.

މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން ވިދާޅުވީ، މަސްވެރިންނަށް ނުދެވި ހުރި ފައިސާ ދިނުމަށްޓަކައި މިއަދު މިފްކޯއަށް 35 މިލިއަން ރުފިޔާ ޖަމާކޮށްދީފައިވާ ކަމަށެވެ. އަދި އެއާއެކު، ސަރުކާރުން މަސްވެރިންނަށް ވައުދުވެފައިވާ ގޮތުގެ މަތިން މިދިޔަ ބުދަ ދުވަހާއި މިއަދު ހިމެނޭހެން ޖުމްލަ 105 މިލިއަން ޖަމާކޮށްދެވިފައިވާ ކަމުގައިވެސް އެމިނިސްޓްރީން ވިދާޅުވިއެވެ.

ފިޝަރީޒް މިނިސްޓްރީން ވިދާޅުވީ، ބެކްލޮގްގައި ހުރި ފައިސާ މަސްވެރިންނަށް ދެވޭނެ އިންތިޒާމް ހަމަޖެއްސުމަށްވެސް ދަނީ މަސައްކަތް ކުރަމުން ކަމަށެވެ. މިދިޔަ ހަފްތާގައި ރައްޔިތުންގެ މަޖިލީހުގައި މެމްބަރުން ކުރެއްވި ސުވާލު ތަކަށް ޖަވާބު ދެއްވަމުން ފިޝަރީޒް މިނިސްޓަރ ވިދާޅުވީ މަސްވެރިން ކިރުވާފައިވާ މަހަށް، 310 މިލިޔަން ރުފިޔާ ނުދެވި އެބައޮތް ކަމަށެވެ.

ފިޝަރީޒް މިނިސްޓްރީން މިއަދު ވިދާޅުވީ، 17 ނޮވެމްބަރު 2023 އިން ފެށިގެން މިހާތަނަށް، މަސްވެރިންނަށް ދޫކުރެވުނު ތެލާއި އައިސްއަށް ޚަރަދުވާ ފައިސާ ހިމަނައިގެން މިހާތަނަށް މަސްވެރިންނަށް ޖުމުލަ، 561 މިލިއަން ރުފިޔާ ދޫކުރެވިފައިވާ ކަމަށެވެ.