މަސްވެރިން ކިރުވާފައިވާ މަހަށް ފައިސާ ނުލިބޭތީ، ހުވަދު އަތޮޅުގެ މަސްވެރިން ކޫއްޑޫގައި މުޒާހަރާކުރަން ފަށައިފިއެވެ.

ކޫއްޑޫ ފިޝަރީޒް ކޮމްޕްލެކްސްގައި ގިނަ އަދަދެއްގެ މަސްވެރިން ގެންދަނީ އަޑު އުފުލައި ނުރުހުން ފާޅު ކުރަމުންނެވެ.

ރައްޔިތުންގެ މަޖިލީހުގެ ވިލިގިލި ދާއިރާގެ މެމްބަރު ސަޢުދު ޙުސައިން ވިދާޅުވީ، މަސްވެރިން ކިރުވާފައިވާ މަހަށް ފައިސާ ނުލިބި މަސްވެރި އާއިލާތަކަށް ބޮޑެތި ދަތިތަކާއި ކުރިމަތިލާންޖެހިފައިވާ ކަމަށެވެ. މިގޮތުން ސަރުކާރުގެ ޔުޓިލިޓީ ބިލްތަކާއި އިންޓަރނެޓް އަދި ލޯންތަކަށް ފައިސާ ނުދެއްކި މަސްވެރިންނަށް ކުރިމަތިވާ ގޮންޖެހުންތައް ވަރަށް ބޮޑު ކަމުގައި ސައުދު ވިދާޅުވިއެވެ. މީގެ އިތުރުން، ދުވަހުން ދުވަހަކަށް ކުރަންޖެހޭ ޟަރޫރީ ޚަރަދުތައް ކުރުމަށްވެސް މަސްވެރިންގެ އާއިލާތަކަށް ދަތިވެފައިވާކަން ސައުދު ފާހަގަކުރެއްވިއެވެ.

ސައުދު ވިދާޅުވީ، ސަރުކާރުން މަސްވެރިންނާއި މެދު އިޙްމާލުވުން ހުއްޓާލަން ޖެހޭ ކަަަމަށެވެ. މީގެ އިތުރުން މެމްބަރު ސައުދުވަނީ މަސްވެރިންނަށް ދޭންޖެހޭ ހައްޤު ފައިސާ ވަގުތުން ދިނުމަށްވެސް ގޮވާލައްވާފައެވެ.

ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ރިޔާސީ އިންތިޚާބުގެ ތެރޭގަިއ ވަޢުދުވެވަޑައިގަތީ މަސްކިރުވާތާ 48 ގަޑިއިރުގެ ތެރޭގައި މަސްވެރިންނަށް ފައިސާ ދޫކުރުމަށެެވެ. އެހެންނަމަވެސް އިޤުތިޞާދު މެނޭޖު ނުކުރެވި ދައުލަތުގެ މާލީ ހާލަތު ދުވަހުން ދުވަހަށް ގޯސްވަމުންދާއިރު، އެންމެ ފަހުންވެސް ފިޝަރީޒް މިނިސްޓަރ ހާމަކުރައްވާފައިވާ ގޮތުގައި 270 މިލިޔަނަށްވުރެ ގިނަ ރުފިޔާ މަސްވެރިންނަށް ނުދެވި އެބައޮތެވެ. އަދި އެއަދަދު އަންނަނީ ދުވަހުން ދުވަހަށް އިތުރުވަމުންނެވެ.