ޗައިނާގެ އެއާލައިނެއް ކަމުގައިވާ ޝިއަންމެން އެއަރގެ ދަތުރުތައް މިއަދު ރާއްޖެއަށް ފަށައިފިއެވެ.

ޝިއަންމެން އެއަރއަށް މަރުހަބާ ކިޔުމުގެ ގޮތުން އެމްއޭސީއެލްއިން ވަނީ ވެލާނާ އިންޓަރނޭޝަނަލް އެއާޕޯޓުގައި މިއަދު ޚާއްޞަ ހަރަކާތްތަކެއް ހިންގާފައެވެ. މިހަރަކާތްތައް ބައްލަވާލެއްވުމަށާއި، ޝިއަންމެން އެއަރއަށް މަރުޚަބާ ދެންނެވުމަށް، ޗައިނާއިން ރާއްޖެއަށް ކަނޑައަޅާފައި ހުންނަވާ ސަފީރުވެސް ވަޑައިގެންނެވިއެވެ.

ޝިއަންމެން އެއަރ ފުރަތަމަ ފްލައިޓް މިއަދު ރާއްޖެ އައިއިރު އެފްލައިޓުން މިއަދު 230 ފަތުރުވެރިން ރާއްޖެއަށް އައެވެ. އެމްއޭސީއެލްއިން ހާމަކޮށްފައިވާ ގޮތުގައި، ޝިއަމެން އެއަރ އިން ޗައިނާގެ ފޫޒޫ އާއި މާލެ އާއި ދެމެދު ކުރާ ދަތުރުތަކަކީ ޗާޓަރު ދަތުރުތަކެވެ.

ރާއްޖޭގެ ފަތުރުވެރިކަމުގެ ސިނާއަތް ކުރިއަރުވައި، ރާއްޖެއަށް އަންނަ ޗައިނާގެ ފަތުރުވެރިންގެ އަދަދު އިތުރު ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ ސަރުކާރުން ގެންދަވަނީ ޚާއްޞަ މަސައްކަތްތަކެއް ކުރައްވަމުންނެވެ. ކޯވިޑް-19ގެ ކުރިން ރާއްޖެއަށް އެންމެ ގިނަ ފަތުރުވެރިން އައި ޤައުމަކީ ޗައިނާ ކަމަށް ވާއިރު، މިސަރުކާރާއި އެކު ޗައިނާ އާއި ރާއްޖޭގެ ގުޅުން އިތުރަށް ބަދަހިވެ ޗައިނާއަކީ ރާއްޖެއަށް އެންމެ ގިނަ ފަތުރުވެރިން އަންނަ މަންޒިލަށް އަނެއްކާވެސް މިވަނީ ވެފައެވެ.