މަސްވެރިންނަށް ނުދޫކުރެވި އަދިވެސް 270 މިލިއަން ރުފިޔާ އެބައޮތް ކަމުގައި، ފިޝަރީޒް މިނިސްޓަރ އަޙްމަދު ޝިޔާމް ވިދާޅުވެއްޖެއެވެ.

މިނިސްޓަރ ޝިޔާމް މިހެން ވިދާޅުވީ، ރައްޔިތުންގެ މަޖިލީހުގަިއ ވަޒީރުންނާއި ސުވާލުކުރުމުގެ ވަގުތުގައި، މެމްބަރުން ކުރެއްވި ސުވާލަށް ޖަވާބު ދެއްވަމުންނެވެ.

މަޖިލީހުގައި ވާހަކަފުޅު ދައްކަވަމުން، މިނިސްޓަރ ޝިޔާމް ވިދާޅުވީ، މަސްވެރިން އެދެނީ މަސްވެރިންނަށް ބަރާބަރަށް ފައިސާ ދެވޭނެ އަގެއްގައި، ދައުލަތަށްވެސް، ދިވެހިރާއްޖޭގެ އެހެން ރައްޔިތުންނަށްވެސް ބުރައަކަށް، އުނދަގުލަކަށް ނިކަަމެތިކަމަކަށް ނުވާނެ ގޮތަކަށް އެއަގު ހިފެހެއްޓުން ކަމަށެވެ. 

ޝިޔާމް ވިދާޅުވީ، މިސަރުކާރު ފެށުނު ފަހުން މަސްވެރިން ކިރުވާފައިވާ މަހުގެ އަގު 422 މިލިޔަން ރުފިޔާއަށް އަރާ ކަމަށާއި، އެފައިސާގެ ތެރެއިން 270 މިލިޔަން ރުފިޔާ އަދިވެސް މަސްވެރިންނަށް ނުދޫކުރެވި އެބައޮތް ކަމަށެވެ. އަދި އެފައިސާ މަސްވެރިންނަށް ދޫކުރެވޭނެ ގޮތެއް ހޯއްދެވުމަށް މަސައްކަތްކުރައްވަމުންދާ ކަމުގައިވެސް ޝިޔާމް ވިދާޅުވިއެވެ.

ޝިޔާމް ވިދާޅުވީ، ކުރީ ސަރުކާރުގެ ފަހުކޮޅު މަސްކިލޯއެއް ގަންނަ އަގު 25ރއަށް ބޮޑުކުރި ނަމަވެސް އެ ރޭޓުގައި މަސްވެރިންނަށް ފައިސާ ނުދޫކުރެވޭ ކަމަށެވެ.

މިގޮތުން، 17 ނޮވެމްބަރު 2023ގައި، ސަރުކާރު ބަދަލުވެގެން ދިޔައިރު، 25ރ ގެ ރޭޓުން ކުރީ ސަރުކާރުން މަސްވެރިންނަށް އެންމެ ރުފިޔާއެއްވެސް ދޫކޮށްފައި ނެތްކަމުގައި ޝިޔާމް ވިދާޅުވިއެވެ.

ކުރީގެ ސަރުކާރުން 25ރ ގެ ރޭޓުގައި މަސްވެރިންނަށް އެންމެ ރުފިޔާއެއްވެސް ކުރީގެ ސަރުކާރުގައި ދޫކޮށްފައި ނުވާކަމަށް ފިޝަރީޒް މިނިސްޓަރ އަޙްމަދު ޝިޔާމް ދެއްކެވި ވާހަކަފުޅު، ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުޙައްމަދު ޝިފާޢު، ނިޒާމީ މައްސަލައެއް ނަންގަވައި ދޮގު ކުރެއްވިއެވެ. ޝިފާޢު ވިދާޅުވީ، މަސްވެރިންގެ އަތުން މަސްގަންނަ އަގު 25ރއަށް ބޮޑު ކުރުމަށްފަހު މަސްވެރިންނަށް ފައިސާ ލިބުނު ބިލްތަކާއި އެވާހަކަތައް މަސްވެރިންގެ ފަރާތުން ސޯޝަލް މީޑިއާގައިވެސް ޙިއްޞާކޮށްފައި ވާކަމަށެވެ.

ޝިފާޢު ވަނީ، މަޖިިލީހުގެ ތަޅުމުގައި ފިޝަރީޒް މިނިސްޓަރ ހެއްދެއްވީ އިތުރުފުޅުކަމުގައި ވިދާޅުވެ އެކަން ކުއްވެރިކުރައްވާފައެވެ.