ކޮޅުމަޑުލު ގުރައިދޫގައި އެޅުމަށް ވަޢުދުވެވަޑައިގެންނެވި އެއާޕޯޓުގެ މަސައްކަތުގެ ތެރެއިން ގާދިފުއްށީ ބިންހިއްކައި ދެއްވާނެ ކަމުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ، ކޮޅުމަޑުލަށް ކުރެއްވި ދަތުރުފުޅުގެ އެންމެ ފަހު މަންޒިލެއްގެ ގޮތުން ގާދިއްފުއްޓަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، އެންމެ ފުަރަަތަމަ ކަމެއްގެ ގޮތުގައި، ގާދިއްފުށީ ސްކޫލަށް ބޭނުންވާ ވަސީލަތްތައް ޤާއިމްކޮށްދިނުމުގެ މަސައްކަތް ކުރައްވާނެ ކަމަށެވެ. ގާދިއްފުށީ ސްކޫލަކީ، ރާއްޖޭގެ އާބާދީ މަދު ސްކޫލުތަކުގެ ތެރެއިން އެއް ސްކޫލެވެ.

މީގެ އިތުރުން ރައީސުލްޖުމްހޫރިއްޔާ، ވިދާޅުވީ، ގާދިއްފުށީގެ ބިންހިއްކުމުގެ މަސައްކަތް، ގުރައިދޫ އެއާޕޯޓުގެ މަސައްކަތުގެ ތެރެއިން ކުރިޔަށް ގެންދަވާނެ ކަމަށެވެ.

ކޮޅުމަޑުލު ގާދިއްފުށީގެ ބިންހިއްކުމުގެ މަސައްކަތަކީވެސް މިއަހަރުގެ ބަޖެޓުގައި ނެތް މަޝްރޫޢެކެވެ. ގުރައިދޫ އެއާޕޯޓުގެ މަސައްކަތް ވެސް ބަޖެޓުގައި ހިމެނިފައި ނުވި ނަމަވެސް އެމަސައްކަތްވެސް މިއަހަރު ކުރިޔަށް ގެންދަވާނެ ކަމުގައިި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.

އާބާދީގައި 266 މީހުން ދިރިއުޅޭ ކޮޅުމަޑުލު ގާދިއްފުއްޓަކީ، 13.4 ހެކްޓަރުގެ ކުޑަ ރަށެކެވެ. ތ. އަތޮޅުގެ ރަށްރަށުގެ ތެރެއިން އެންމެ އާބާދީ ކުޑަ ރަށަކީ، ގާދިއްފުއްޓެވެ.