ރައީސުލްޖުމްހޫރިއްޔާ، ކޮޅުމަޑުލުގެ ތިން ރަށެއް ފިޔަވައި އެހެން ރަށްރަށަށް ކުރެއްވި ދަތުރުފުޅު ނިންމަވާލެއްވުމަށްފަހު މާލެ ވަޑައިގެންފިއެވެ.

ކޮޅުމަޑުލުގައި މީހުން ދިރިއުޅޭ 13 ރަށް އޮންނައިރު އެމަނިކުފާނުގެ ދަތުރުފުޅުގައި ވަޑައިނުގެންނެވީ، ކޮޅުމަޑުލުގެ އެންމެ އާބާދީ ބޮޑު ދެރަށްކަމުގައިވާ ކޮޅުމަޑުލު ތިމަރަފުއްޓާއި ވިލުފުށީގެ އިތުރުން ހިރިލަންދޫއަށެވެ. އެތިން ރަށަކީ، ކޮޅުމަޑުލުގެ ރަށްރަށުގެ ތެރެއިން އިިދިކޮޅު ޕާޓީ އެމްޑީޕީއަށް އެންމެ ބޮޑު ތާއީދެއް އޮންނަ ތިންރަށެވެ. އެތިން ރަށަށް ރައީސުލްޖުމްހޫރިއްޔާ ވަޑައިނުގެންނެވި ނަމަވެސް ކައިރި އެހެން ރަށްރަށަށް ވަޑައިގެންނެވި ދަތުރުފުޅުގެ ތެރެއިން އެރަށްރަށުގެ ކައުންސިލްތަކުގެ މެމްބަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެމްބަރުންނާއި ބައްދަުލުކުރެއްވިއެވެ.

ރައީސުލްޖުމްހޫރިއްޔާގެ މިދަތުރުފުޅުގައި ވަޑައިގެންނެވީ، ކޮޅުމަޑުލުގެ ރަށްތަކުގެ ތެރެއިން، ގުރައިދޫ، ދިޔަމިގިލި، މަޑިފުށި، ވޭމަންޑޫ، ބުރުނީ، ކަނޑޫދޫ، ވަންދޫ، އޮމަދޫ، ކިނބިދޫ އަދި ގާދިއްފުށްޓަށެވެ.

އެރަށްރަށަށް ވަޑައިގެން އެރަށްރަށުގެ ރައްޔިތުންނާއި ރައީސުލްޖުމްހޫރިއްޔާ ބައްދަލު ކުރައްވައި ވާހަކަފުޅު ދެއްކެވިއެވެ. މިގޮތުން ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުތަކުގައި ރާއްޖޭގެ އިޤުތިޞާދު އޮތް ނާޒުކު ޙާލަތު ބަޔާންކޮށްދެއްވިއެވެ. އެހެން ނަމަވެސް ރަށްރަށުގެ ތަރައްޤީއަށާއި އަތޮޅުގެ ތަރައްޤީއަށް ސަރުކާރުން ކުރެއްވުމަށް އެމަނިކުފާނު ވަޢުދުވެވަޑައިގެންނެވި ކަންކަން ކުރައްވާނޭ ކަމުގައި ވިދާޅުވިއެވެ.

ކޮޅުމަޑުލުގެ ބައެއް ރަށްރަށަށް ރައީސުލްޖުމްހޫރިއްޔާ ކުރެއްވި މި ދަތުރުފުޅުގައި ރައީސުލްޖުމްހޫރިއްޔާގެ އަރިހުގައި ކެބިނެޓް މިނިސްޓަރުންނާއި ސަރުކާރުގެ ބައެއް މުއައްސަސާތަކުގެ އިސްވެރިން ހިމެނޭ މަތީފަންތީގެ ވަފުދެއް ބައިވެރިވެވަޑައިގެންނެވިއެވެ.