އެމްޕީއެލް ދެވަނަ ޑިވިޝަނުގައި ވިކްޓަރީ ސްޕޯޓްސް ކްލަބާއި ކުޑަހެންވޭރު ޔުނައިޓެޑު އިއްޔެ ކުޅުނު ކުއާޓާ ފައިނަލް މެޗުގައި ހިނގާދިޔަ ހަމަނުޖެހުންތަކާއި ގުޅިގެން، މެޗުގެ ބާކީ އޮތް 7 މިނެޓު ނުކުޅެ ވަނީ ނިންމާލާފައެވެ. އަދި މިއަދު ފުޓުބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް)ގެ އެމެޖެންސީ ކޮމެޓީއިން އެ މެޗުގެ ބާކީ ވަގުތު ކުޅެން ނިންމާފައި ވަނިކޮށް، ކުޑަހެންވޭރު ޔުނައިޓެޑުން މެޗު އިތުރަށް ކުރިޔަށް ގެންދަން ބޭނުން ނުވާކަމަށް އެންގުމުން، މެޗު މެދުކަނޑާލިއިރު އޮތް ސްކޯއިން ވިކްޓްރީއިން މެޗު ކާމިޔާބުކުރިކަމަށް އެފްއޭއެމްއިން ކަނޑައަޅައިފިއެވެ.

އެހެންކަމުން، އިއްޔެގެ މެޗުން 3-1 އިން ވިކްޓަރީ މޮޅުވުމާއި ގުޅިގެން، ސެމީ ފައިނަލްގައި އެ ޓީމު ނިކުންނާނީ ޒަމާނީ ވާދަވެރި ނިއުރޭޑިއަންޓް ސްޕޯޓްސް ކްލަބާ ދެކޮޅަށެވެ. 

އެފްއޭއެމްގެ އެމެޖެންސީ ކޮމެޓީއިން މެޗުގެ ބާކީބައި އަލުން ކުޅުމަށް ނިންމީ މިއަދުގެ މެންދުރުފަހުއެވެ. އެ ނިންމުމުގައި ވާގޮތުން، ވިކްޓަރީ އާއި ކުޑަހެންވޭރު ޔުނައިޓެޑު ބައްދަލުކުރި މެޗުގައި ހިނގައިދިޔަ ހަމަނުޖެމާއި ގުޅިގެން، މެޗު މެދުކަނޑާލި ހިސާބުން އެ މެޗުގެ ބާކީ އޮތް 7 މިނެޓު ކުޅުމަށް ތާވަލުކުރި މާދަމާގެ ހަވީރު 4 ޖަހާއިރުއެވެ. މީގެ އިތުރުން، މެޗުގެ ބާކީ އޮތްބައި ކުޅުމަށް ނިންމީ ސަޕޯޓަރުން ދަނޑަށް ނުވައްދައެވެ.

މީގެ ކުރިން 2005 ވަނަ އަހަރުގެ ގައުމީ މުބާރާތުގެ ސެމީ ފައިނަލް މެޗުގައި ނިއުރޭޑިއަންޓާއި ވެލެންސިއާ ބައްދަލު ކުރި މެޗު ހޫނުވެ، ކުޅުން މެދުކަނޑާލުމަށްފަހު އަލުން އަނބުރާ އެ މެޗު އެހެން ދުވަހެއްގައި ކުޅެން ނިންމިއެވެ. އެ މެޗު ވެސް ފަހުން ކުޅެފައިވަނީ ސަޕޯޓަރުން ދަނޑަށް ނުވައްދައެވެ.