ރިޔާސީ އިންތިޚާބުގެ ތެރޭގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންނެވި ވަޢުދުތަކާއި ދެއްކެވި ވާހަކަފުޅުތައް ހިމަނައިގެން އެކުލަވާލާފައިވާ ވަޢުދުފޮތް އާއްމުކޮށް ލިބޭނެ ގޮތް ހަމަޖައްސަވާނެ ކަމުގައި ރައީސުލްޖުމްހޫރިއްޔާ ވިދާޅުވެއްޖެއެވެ.

ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު މިހެން ވިދާޅުވީ، އެމަނިކުފާނު އަތޮޅުތަކަށް ކުރައްވާ ފުރަތަމަ ދަތުރުފުޅުގައި ކޮޅުމަޑުލަށް ވަޑައިގެން އެއަތޮޅުގެ ވެރިކަންކުރާ ރަށް، ވޭމަންޑޫގެ ރައްޔިތުންނާއި ބައްދަލު ކުރައްވައި ރޭ ދެއްކެވި ވާހަކަފުޅުގައެވެ. 

ރައީސުލްޖުމްހޫރިއްޔާ ވިދާޅުވީ، އެފޮތް މިހާރު ޗާޕްކޮށްގެން މާލެ ގެނެސްފައިވާ ކަމަށާއި، އަދި ރަށުކައުންސިލްތަކާއި ސްކޫލުތަކަށް އެފޮތުގެ ހާޑުކޮޕީތައް ފޮނުއްވާނެ ކަމަށެވެ. އަދި ޑިޖިޓަލް ކޮޕީ އޮންލައިކޮށް އެންމެނަށް ކިޔާލެވޭނެ ގޮތަށް ޝާއިޢު ކުރައްވާނެ ކަމުގައިވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ،  ކެމްޕެއިން ޖަލްސާތަކުގައި ދެއްކި ވާހަކަތަކާއި ވަޢުދުތައް ހިމެނޭ ފޮތެއް ތައްޔާރުކުރެއްވީ، އެކަންކަން ގެއްލިގެންދިޔަ ނުދިނުމަށްޓަކައި ދެފުށް ފެންނާނެ ގޮތަށް ހާމަކޮށް ރައްޔިތުންނަށް އަބަދުވެސް ހަނދާންވާގޮތް ހެދުމަށްޓަކައި ކަމަށެވެ. އަދި މިހާތަނަށް އަޅުގަނޑު ދެއްކި ކޮންމެ ވާހަކައެއް، ކޮންމެ ވަޢުދެއް، ފުރިހަމަ ކުރުމަކީ، އެމަނިކުފާނު ކުރައްވާނެ ކަމެއް ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ވަޢުދުތަކާއި ގުޅޭ ގޮތުން ރައީސުލްޖުމްހޫރިއްޔާ ވިދާޅުވީ، އެމަނިކުފާނު ވެވަޑައިގެންނެވި ރިޔާސީ ވަޢުދުތަކުގެ ތެރެއިން، ހަފްތާ 14ގައި ފުއްދުމަށް އަމާޒު ހިފާފައިވާ ވަޢުދުތަކުގެ %50 މިހާރު ފުރިހަމައަށް ފުއްދިފައިވާ ކަމަށެވެ.

ރިޔާސީ އިންތިޚާބުގައި ރައީސުލްޖުމްހޫރިއްޔާ، ޑރ. މުޙައްމަދު ވެވަޑައިގެންނެވި މައިގަނޑު ދެ ވަޢުދުގެ ތެރެއިން އެއްވަޢުދަކީ، ރައީސް ޔާމީން މިނިވަން ކުރެއްވުމެވެ. އެހެން ނަމަވެސް ވެރިކަމުގެ ދެ މަސް ދުވަސް ފާއިތުވެ ދިޔައިރު ރައީސް ޔާމީނު މިނިވަންވެފައި ނުވާތީ އެކަމުގެ ކަންބޮޑުވުން ރައީސް ޔާމީނަށް ތާޢީދު ކުރާ ފަރާތްތަކުން އަންނަނީ ފާޅު ކުރަމުންނެވެ.

މީގެ އިތުރުން، ރާއްޖެއިން އިންޑިއާ ސިފައިން ބޭލުމަށް ވެވަޑައިގެންނެވި ވަޢުދާއެއްގޮތަށް އިންޑިއާ ސިފައިން ރާއްޖެއިން ފޮނުވާލެއްވުމުގެ މަސައްކަތްތައް ސަރުކާރުން ކުރައްވަމުން ގެންދެވި ނަމަވެސް އިންޑިއާ ސިފައިން ފޮނުވާލުމަށް ފަހު، އިންޑިއާ ސިފައިން މިހާރު ތިބި މަޤާމުތަކުގައި، އިންޑިއާގެ ސިފައިން ކަމުގައި ނުހިމެނޭ އިންޑިއާގެ އާއްމު މީހުން ބޭތިއްބުމަށް ސަރުކާރުން އިންޑިއާއާއެކު އެއްބަސްވެފައިވާ ކަމުގެ ވާހަކަތައް ފެތުރޭއިރު، އެކަން އެހެން އޮތްނަމަ އެއީ ވަޢުދު ފުއްދުކަމުގައި ނުވާނެ ކަމަށް ބުނެވެސް ބައެއް ފަރާތްތަކުން ދަނީ އެކަން ފާހަގަކުރަމުންނެވެ.

ރިޔާސީ އިންތިޚާބުގެ ކެމްޕޭނުގެ ތެރޭގައި ރައީސުލްޖުމްހޫރިއްޔާ ދެއްކެވި ވާހަކަފުޅުތަކާއި ވެވަޑައިގެންނެވި ވަޢުދުތައް ހިމަނައި އެކުލަވާލި ފޮތް އިފްތިތާޙްކުރީ 2023 ނޮވެމްބަރު 15 ވަނަ ދުވަހު، ބޭއްވި ރަސްމިއްޔާތެއްގައެވެ.