Advertisement

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފޮތް -- ފޮޓޯ: ސޯޝަލް މީޑިއާ

07 Feb 2024
ޚަބަރު
ޢަލީ ސުލައިމާން

ރައީސްގެ ވަޢުދު ފޮތް އާއްމުކޮށް ލިބޭނެ ގޮތް ހައްދަވާނެ ކަމުގައި ރައީސުލްޖުމްހޫރިއްޔާ ވިދާޅުވެއްޖެ

ރިޔާސީ އިންތިޚާބުގެ ތެރޭގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންނެވި ވަޢުދުތަކާއި ދެއްކެވި ވާހަކަފުޅުތައް ހިމަނައިގެން އެކުލަވާލާފައިވާ ވަޢުދުފޮތް އާއްމުކޮށް ލިބޭނެ ގޮތް ހަމަޖައްސަވާނެ ކަމުގައި ރައީސުލްޖުމްހޫރިއްޔާ ވިދާޅުވެއްޖެއެވެ.

ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު މިހެން ވިދާޅުވީ، އެމަނިކުފާނު އަތޮޅުތަކަށް ކުރައްވާ ފުރަތަމަ ދަތުރުފުޅުގައި ކޮޅުމަޑުލަށް ވަޑައިގެން އެއަތޮޅުގެ ވެރިކަންކުރާ ރަށް، ވޭމަންޑޫގެ ރައްޔިތުންނާއި ބައްދަލު ކުރައްވައި ރޭ ދެއްކެވި ވާހަކަފުޅުގައެވެ. 

ރައީސުލްޖުމްހޫރިއްޔާ ވިދާޅުވީ، އެފޮތް މިހާރު ޗާޕްކޮށްގެން މާލެ ގެނެސްފައިވާ ކަމަށާއި، އަދި ރަށުކައުންސިލްތަކާއި ސްކޫލުތަކަށް އެފޮތުގެ ހާޑުކޮޕީތައް ފޮނުއްވާނެ ކަމަށެވެ. އަދި ޑިޖިޓަލް ކޮޕީ އޮންލައިކޮށް އެންމެނަށް ކިޔާލެވޭނެ ގޮތަށް ޝާއިޢު ކުރައްވާނެ ކަމުގައިވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

"އެއިން ފެންނަން އޮންނާނެ އަޅުގަނޑު ދެއްކި ވާހަކަތައް. އެހެންވީމާ، އެހާވެސް ސާފުކޮށް ފެންނަގޮތަށް މިކަންކަން އަޅުގަނޑުމެން ކުރިއަށް ގެންދަން ނިންމާފައި މިއޮތީ."

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ރައީސުލްޖުމްހޫރިއްޔާ ވިދާޅުވީ،  ކެމްޕެއިން ޖަލްސާތަކުގައި ދެއްކި ވާހަކަތަކާއި ވަޢުދުތައް ހިމެނޭ ފޮތެއް ތައްޔާރުކުރެއްވީ، އެކަންކަން ގެއްލިގެންދިޔަ ނުދިނުމަށްޓަކައި ދެފުށް ފެންނާނެ ގޮތަށް ހާމަކޮށް ރައްޔިތުންނަށް އަބަދުވެސް ހަނދާންވާގޮތް ހެދުމަށްޓަކައި ކަމަށެވެ. އަދި މިހާތަނަށް އަޅުގަނޑު ދެއްކި ކޮންމެ ވާހަކައެއް، ކޮންމެ ވަޢުދެއް، ފުރިހަމަ ކުރުމަކީ، އެމަނިކުފާނު ކުރައްވާނެ ކަމެއް ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

"ވަޢުދެއް ވެއްޖިއްޔާ އެ ވަޢުދެއް ފުއްދުމަކީ، އަޅުގަނޑު ގަބޫލުކުރާ ގޮތުގައި، އަޅުގަނޑުގެ ވާޖިބެއް. ބަހާއި ޢަމަލާ ދިމާވާންޖެހޭނެ. ދުލުން ބޭރުކުރާ ކޮންމެ ބަހަކީ، އެ ބަސް ދުލުން ބޭރުވުމަށްފަހު، އެ ބަހުގެ އަޅަކަށް އެ ބަސް ބުނި މީހާވާނެ ބަހެއް. އެ ބަސް ތެދުކުރުމަކީ އެ މީހާގެ ޒިންމާއެއް."

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ވަޢުދުތަކާއި ގުޅޭ ގޮތުން ރައީސުލްޖުމްހޫރިއްޔާ ވިދާޅުވީ، އެމަނިކުފާނު ވެވަޑައިގެންނެވި ރިޔާސީ ވަޢުދުތަކުގެ ތެރެއިން، ހަފްތާ 14ގައި ފުއްދުމަށް އަމާޒު ހިފާފައިވާ ވަޢުދުތަކުގެ %50 މިހާރު ފުރިހަމައަށް ފުއްދިފައިވާ ކަމަށެވެ.

ރިޔާސީ އިންތިޚާބުގައި ރައީސުލްޖުމްހޫރިއްޔާ، ޑރ. މުޙައްމަދު ވެވަޑައިގެންނެވި މައިގަނޑު ދެ ވަޢުދުގެ ތެރެއިން އެއްވަޢުދަކީ، ރައީސް ޔާމީން މިނިވަން ކުރެއްވުމެވެ. އެހެން ނަމަވެސް ވެރިކަމުގެ ދެ މަސް ދުވަސް ފާއިތުވެ ދިޔައިރު ރައީސް ޔާމީނު މިނިވަންވެފައި ނުވާތީ އެކަމުގެ ކަންބޮޑުވުން ރައީސް ޔާމީނަށް ތާޢީދު ކުރާ ފަރާތްތަކުން އަންނަނީ ފާޅު ކުރަމުންނެވެ.

މީގެ އިތުރުން، ރާއްޖެއިން އިންޑިއާ ސިފައިން ބޭލުމަށް ވެވަޑައިގެންނެވި ވަޢުދާއެއްގޮތަށް އިންޑިއާ ސިފައިން ރާއްޖެއިން ފޮނުވާލެއްވުމުގެ މަސައްކަތްތައް ސަރުކާރުން ކުރައްވަމުން ގެންދެވި ނަމަވެސް އިންޑިއާ ސިފައިން ފޮނުވާލުމަށް ފަހު، އިންޑިއާ ސިފައިން މިހާރު ތިބި މަޤާމުތަކުގައި، އިންޑިއާގެ ސިފައިން ކަމުގައި ނުހިމެނޭ އިންޑިއާގެ އާއްމު މީހުން ބޭތިއްބުމަށް ސަރުކާރުން އިންޑިއާއާއެކު އެއްބަސްވެފައިވާ ކަމުގެ ވާހަކަތައް ފެތުރޭއިރު، އެކަން އެހެން އޮތްނަމަ އެއީ ވަޢުދު ފުއްދުކަމުގައި ނުވާނެ ކަމަށް ބުނެވެސް ބައެއް ފަރާތްތަކުން ދަނީ އެކަން ފާހަގަކުރަމުންނެވެ.

ރިޔާސީ އިންތިޚާބުގެ ކެމްޕޭނުގެ ތެރޭގައި ރައީސުލްޖުމްހޫރިއްޔާ ދެއްކެވި ވާހަކަފުޅުތަކާއި ވެވަޑައިގެންނެވި ވަޢުދުތައް ހިމަނައި އެކުލަވާލި ފޮތް އިފްތިތާޙްކުރީ 2023 ނޮވެމްބަރު 15 ވަނަ ދުވަހު، ބޭއްވި ރަސްމިއްޔާތެއްގައެވެ.

ކޮމެންޓް
އިތުރު އާޓިކަލް
03 Apr 2025
މޯލްޑިްވްސް ޕޮލިސް ސަރވިސް
އިނގިލި ބުރިކޮށްލަން އުޅުނު މީހަކު އެހެން މައްސަލައެއްގައި ހައްޔަރަށް
ހުޅުމާލޭގައި މީހަކު ރަހީނު ކުރުމަށް ފަހު އޭނާގެ އިނގިލި ބުރިކޮށްލަން އުޅުނު މައްސަލައިގައި ހައްޔަރު ކުރި މީހުންގެ ތެރޭގައި ހިމެނޭ މީހަކު އަނެއްކާ ވެސް ހައްޔަރުކޮށްފިއެވެ.
03 Apr 2025
ވެލާނާ އިންޓަނޭޝަނަލް އެއާޕޯޓް
އެއާރޕޯޓު ބާރުބޮޑުވާނެތީ އެކަމަށް ސަމާލުވުމަށް އަންގައިފި
ހުކުރު ދުވަހުގެ މެންދުރުފަހު ޢުމްރާއިން މީހުން އެނބުރި އަންނާނެތީ، ވެލާނާ އެއަރޕޯޓު ބާރުބޮޑުވާނެ ކަމަށް ލަފާކޮށް، ފުރަންދާ ފަރާތްތަކުން ދުރާލާ އެއަރޕޯޓަށް ދިއުމަށް އިލްތިމާސްކޮށްފިއެވެ.
03 Apr 2025
ސްޓެލްކޯ
ބިލް ބޮޑުވީ ހޫނު ގަދަވެ ބޭނުންކުރިވަރު އިތުރުވުމުން: ސްޓެލްކޯ
ކަރަންޓުން ދިހަ އިންސައްތައިގެ ޓިސްކައުންޓެއް ދީފައިވީނަމަވެސް، ބިލް ބޮޑުވީ ހޫނު މޫސުމާ ދިމާވެ، ކަރަން ބޭނުންކުރެވޭ މިންވަރު އިތުރުވުމުން ކަމަށް ސްޓެލްކޯ އިން ބުނެފިއެވެ.
02 Apr 2025
ޚަބަރު
ހޮޅުދޫ ބޯޓުގައި ރޯވެ އެބޯޓުގައި ހުރި ޒުވާނަކު ގެއްލިއްޖެ
އެމްއެންޑީއެފުން ވިދާޅުވީ، ގެއްލިގެން ހޯދަމުން ދަނީ، ލ.މާވަށަށް ނިސްބަތްވާ 25 އަހަރުގެ އަލީ މުޝްފިގް މުހައްމަދު ކަމަށެވެ. އޭނާގެ އިތުރުން އެބޯޓުން ދަތުރު ކުރި އެހެން މީހުން ވަނީ، ސަލާމަތް ވެފައެވެ. އޭގެ ތެރެއިން ދެމީހަކަށް، ތ. ކަނޑޫދޫ ޞިއްޙީ މަރުކަޒުގައި ފަރުވާދެމުން އަންނަ ކަމުގައިވެސް އެމްއެންޑީއެފުން ވިދާޅުވިއެވެ.