އިންޑިއާ ސިފައިންގެ ބަދަލުގައި އިންޑިއާގެ އާއްމު މީހުން ބޭއްތިއްބުމާއި ގުޅޭ ސުވާލަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޖަވާބު ނުދެއްވައި ދޫކޮށްލައްވައިފިއެވެ.

ރައީސްގެ ޖަވާބުގެ ނަމުގައި، ރައީސުލްޖުމްހޫރިއްޔާގެ އޮފީހުން، ސޯޝަލްމީޑިއާގައި ގެނެސްދޭ ސިލްސިލާގައި، މިއަދު ޕޯސްޓްކުރި ވީޑިއޯގައި އާއްމު މީހަކު ސުވާލުކޮށްފައި ވަނީ، އިންޑިއާ ސިފައިންގެ ބަދަލުގައި އިންޑިއާގެ އާއްމުން އިންޑިއާ ސިފައިން ތިބި މަރުކަޒުތަކަށް ގެންނަން އުޅޭ ކަމަށް ދެކެވޭ ވާހަކަތަކާއިގުޅޭ ގޮތުންނެވެ. މިގޮތުން ހުޅުމާލެ، ފުލެޓް ނަންބަރު 21308، އަޙްމަދު ޝަރީފް ހުށައެޅުވި ކަމަށް ރައީސުލްޖުމްހޫރިއްޔާގެ އޮފީހުން އާއްމުކުރި ވީޑިއޯގައި ކުރައްވާފައިވާ ސުވާލަކީ، އިންޑިއާ ސިފައިން ޔުނީފޯމް ބާލާފައި ކުލަ ހެދުމުގައި ރާއްޖެ އަންނަން އުޅޭ ވާހަކަ އަޑު އިވޭކަމަށާއި އެކަން ސާފުވާން އެދޭ ކަމަށެވެ.

ރައީސުލްޖުމްހޫރިއްޔާ ވިދާޅުވީ، ރާއްޖެއިން އިންޑިއާ ސިފައިން ފޮނުވާލުމުގެ މަސައްކަތް އެމަނިކުފާނު ވެރިކަމަށް ވަޑައިގެންނެވި ގޮތަށް މަސައްކަތް ފައްޓަވާފައި ވާކަމަށެވެ. އަދި މެއި މަހުގެ 10 ވަނަ ދުވަހާއި ހަމައަށް ރާއްޖޭގައި ތިިބި އިންޑިއާގެ ހުރިހާ ސިފައިން އަނބުރާ ޤައުމަށް ގެންދާނެ ކަމަށާއި، އެކާމިޔާބަށް ވާސިލް ވެވެނީ ޑިޕްލޮމަސީގެ އުސޫލުން ކުރެވުނު މަސައްކަތްތަކުގެ ނަތީޖާއެއްގެ ގޮތުން ކަމަށެވެ. އަދި ރާއްޖޭގެ އަސްކަރިއްޔާގެ ޤާބިލްކަން އިތުރު ކުރައްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ރާއްޖޭގައި އެއްވެސް ޤައުމެއްގެ ސިފައިން ޤާއިމްވެ ނުތިބޭ ހިސާބަށް ވަރަށް އަވަހަށް ގެންގޮސްދެއްވާނެ ކަމަށެވެ.

ރައީސުލްޖުމްހޫރިއްޔާއަށް، ޝަރީފް ހުށައެޅި ސުވާލުގެ މައިގަނޑު ބަޔަށް ރައީސް ޖަވާބެއް ނުދެއްވައެވެ. އެކަމަކު ނުރަސްމީކޮށް އެނގިފައިވާ ގޮތުގައި އިންޑިއާއިން ހުށައަޅާފައި ވަނީ އިންޑިއާ ސިފައިން އަނބުރާ ރާއްޖެއިން ގެންދިޔުމަށް ފަހުވެސް ޑޯނިއާ މަތިންދާ ބޯއްޓާއި ދެހެލިކޮޕްޓަރު ދުއްވުމަށް ރާއްޖޭގައި އިންޑިއާގެ މީހުން ބޭތިއްބުމަށެވެ. އެކަމަށް ދިވެހި ސަރުކާރުން އެއްބަސްވެފައިވާ ކަމުގެ މައުލޫމާތު ލިބިފައިވީ ނަމަވެސް އެކަމާއި ގުޅޭ ގޮތުން ރަސްމީ ސިފައެއްގައި އެއްވެސް ވާހަކައެއް ސަރުކާރުން ހާމައެއް ނުކުރެއެވެ.

އިންޑިއާގެ ޔުނީފޯމް އެޅި ސިފައިން ރާއްޖެއިން ގެންދިޔުމަށް ފަހު، އިންޑިއާ ސިފައިން މިހާރު ޤާއިމްވެ ތިބި ތަންތަނުގައި ބަދަލުގައި އިންޑިއާގެ މީހުން ތިބުމަކީ، ރާއްޖެއިން އިންޑިއާ ސިފައިން ފޮނުވާލުމަށް ރައީސް ވެވަޑައިގެންނެވިި ވަޢުދު މައުނަވީ ގޮތެއްގައި ފުދުނު ކަމަށް ވާނެ ކަމެއް ނޫންކަމުގައި އާއްމު ފަރާތްތަކުންނާއި ސިޔާސީ ފަރާތްތަކުންވެސް ފާހަގަކުރެއެވެ.