ކޮޅުމަޑުލުގައި މަދުވެގެން ތިން އެއާޕޯޓު އޮންނަން ޖެހޭނެމަކަށް ޤަބޫލު ކުރައްވާކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ކޮޅުމަޑުލުގެ ރަށްރަށަށް ރައީސުލްޖުމްހޫރިއްޔާ އިއްޔެ ފެއްޓެވި ދަތުރުފުޅުގެ ތެރެއިން، އިއްޔެ އެއަތޮޅު މަޑިފުށީގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، މިހާރު އޮތް އެއަރޕޯޓުގެ އިތުރަށް، ގުރައިދޫގަޔާއި ވިލުފުށީގައި އެއާޕޯޓު އެޅުމަށް އެމަނިކުފާނު ވަޢުދުވެވަޑައިގެންފައި ވާކަމަށެވެ. އެހެންވީމާ، އެ ތިން އެއަރޕޯޓް އެޅިގެންދިޔުމުން، ދާއިރާއަށާއި، ކައިރީގައި އޮންނަ ރަށްތަކަށް އޭގެ ފައިދާތައް ލިބިގެންދާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ކޮޅުމަޑުލުގައި މަދުވެގެން 3 އެއާޕޯޓް އޮންނަން ޖެހޭކަމަށް ރައީސުލްޖުމްހޫރިއްޔާ ވިދާޅުވި އިރު، މިހާރުވެސް ކޮޅުމަޑުލު ތިމަރަފުށީގައި އެއާޕޯޓެއް އޮވެއެވެ. އެހެން ނަމަވެސް ޑިމާންޑް ނެތުމާއިއެކު އެއާޕޯޓަށް މޯލްޑިވިއަނުން ކުރަމުން އަންނަނީ ހަފްތާއަކު ދެ ދަތުރެވެ.

ކޮޅުމަޑުލުގައި ތިން އެއާޕޯޓު އެޅުމުގެ މުހިއްމު ކަމުގެ މައްޗަށް ރައީސުލްޖުމްހޫރިއްޔާ ވާހަކަފުޅު ދެއްކެވި އިރު، ކޮޅުމަޑުލުގެ އިދާރީ ދާއިރާތަކުގެ ތެރެއިން ކިނބިދޫ ދާއިރާ ހިމެނޭ،  ހިރިލަންދޫ އާއި ވަންދޫ އަދި ކަނޑޫދޫއިން 30 މިނިޓުން ދަތުރުކުރެވޭ ހިސާބުގައި އެއާޕޯޓެއް ނެތެވެ. ކޮޅުމަޑުލަކީ ރާއްޖޭގެ އަތޮޅުތަކުގެ ތެރެއިން އެންމެ ތިންވަނައަށް އެންމެ ބޮޑު އަތޮޅެވެ.