މަސްވެރިންނަށް 329 މިލިއަނަށްވުރެ ގިނަ ރުފިޔާ މި ސަރުކާރުން ދީފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ. ރައީސް މިހެން ވިދާޅުވީ، ރިޔާސީ ބަޔާން އިއްވަވަމުންނެވެ.

ރައީސް ވިދާޅުވީ، ނިމުނު ސަރުކާރުން މަސްވެެރިންނަށް ދޭންޖެހޭ ފައިސާގެ ތެރެއިން މިހާތަނަށް މި ސަރުކާރުން 329 މިލިއަނަށްވުރެ ގިނަ ރުފިޔާ ދޫކޮށްފައިވާކަމަށެވެ.

މަސްވެރިންނަށް ދޫކުރި ފައިސާގެ އަދަދު ރައީސް ހާމަކުރެއްވިއިރު މިހާތަނަށް މަސްވެރިންނަށް ނުދެވި ހުރި ފައިސާގެ އަދަދެއް ހާމައެއް ނުކުރެއެވެ. މަސްވެރިންނަށް ލިބެންޖެހޭ ފައިސާ ނުލިބި މިހާރުވެސް ދޭތެރެއަކުން މަސްވެރިން ދަނީ އެކަމުގެ ކަންބޮޑުވުން ސޯޝަލް މީޑިއާގައި ފާޅުކުރަމުންނެވެ.

މި ސަރުކާރު ހަވާލުވިއިރު މަސްވެރިންނަށް ދޭންޖެހޭ 250 މިލިއަނެއްހާ ރުފިޔާ ހުރި ކަމަށް ފިޝަރީޒް މިނިސްޓަރު އަހުމަދު ޝިޔާމް ވަނީ މީގެކުރިން ވިދާޅުވެފައެވެ. ނަމަވެސް މިކަން ކުރީގެ ފިނޭންސް މިނިސްޓަރ އިބްރާހިމް އަމީރު ވަނީ ދޮގުކުރައްވާފައެވެ.