ނެމީބިއާގެ ރައީސް ހާގޭ ގެންގޮބް، އަވަހާރަވުމާ ގުޅިގެން ދިވެހި ޤައުމީ ދިދަ ބައިދަނޑިއަށް ތިރިކުރެއްވުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނިންމަވައިފިއެވެ. 

ރައީސް އޮފީހުން ނެރުއްވާފައިވާ ދެންނެވުމުގައި ވިދާޅުވެފައިވަނީ ނެމީބިއާގެ ރައީސް އަވަހާރަވުމުގެ ހިތާމައިގައި، 2 ދުވަހަށް ދިވެހި ޤައުމީ ދިދަ ބައިދަނޑިއަށް ތިރިކުރެއްވުމަށް ނިންމަވާފައިވާކަމަށެވެ. އެއީ ފެބުރުވަރީ 6 ވާ އަންގާރަ ދުވަހުން ފެށިގެން ފެބުރުވަރީ 7 ވާ ބުދަ ދުވަހުގެ ނިޔަލަށެވެ.

ނަމީބިޔާގެ ރައީސް އަވަހާރަވީ ކެންސަރު ބަލީގެ އާލާސްކަންފުޅަށް ފަރުވާ ހޯއްދަވަމުން ގެންދަވަނިކޮށް އުމުރުފުޅުން 82 އަހަރުގައެވެ. ނަމަވެސް, ގެންގޮބް އަވަހާރަވެފައި ވަނީ އެ ބަލީގައި ކަން އޭނާގެ އޮފީހުން ކަށަވަރު ކޮށްދީފައެއް ނުވެއެވެ. އޭނާ އަވަހާރަވުމާ ގުޅިގެން, ނައިބު ރައީސް ނަންގޯލުން ބުމްބާ ވަނީ ވަގުތީ ގޮތުން ރިޔާސަތާ ހަވާލުވެ ވަޑައިގަންނަވާފައެވެ. 

ނަމީބިޔާގެ ބޮޑުވަޒީރު ކަމުގެ މަޤާމާ 2012 ވަނަ އަހަރު ހަވާލުވެ ވަޑައިގެންނެވުމުގެ ކުރިން އޭނާ ހުންނެނީ ވިޔަފާރިއާއި ސިނާޢަތާ ބެހޭ ވަޒީރު ކަމުގެ މަޤާމުގައެވެ. 2014 ވަނަ އަހަރު ބޭއްވި ރިޔާސީ އިންތިޚާބު އޭނާ ކާމިޔާބު ކުރައްވާފައި ވަނީ 87 އިންސައްތަ ތާޢީދާ އެކުގައެވެ. ނަމަވެސް, 2019 ވަނަ އަހަރުގެ ނޮވެންބަރު މަހު ބޭއްވި އިންތިޚާބުގައި އޭނާއަށް ކާމިޔާބީ ލިބިވަޑައިގަތީ ވަރަށް ހަނި ފުރުޞަތަކުންނެވެ.