ކުރީ ސަރުކާރުގައި ގެދޮރުވެރިޔާ ސްކީމްގެ ދަށުން 4000 ފްލެޓް ލިބުނު ކަމަށް ކަނޑައެޅި މީހުންގެ ތެރެއިން އެއްވެސް މައްސަލައެއް ނެތި ޝަރުޠު ހަމަވާތިބީ 838 މީހުން ކަމުގައި އެންޓި ކަރަޕްޝަން ކޮމިޝަން އޭސީސީން ވިދާޅުވެއްޖެއެވެ.

އޭސީސީން މިއަދު ބޭއްވި ނޫސްވެރިންގެ ބައްދަލުވުމުގައި، ފްލެޓްތަކާއި ގުޅޭ މައްސަލަ ތަހްޤީޤުކުރި އޭސީސީގެ ބޭފުޅުން ވިދާޅުވީ، ކޮމިޝަނަށް ހުށައެޅުނު މައްސަލަ އާއި ގުޅިގެން ފްލެޓް ލިބޭކަމަށް ކަނޑައެޅި ފޯމްތަކާއި އެކު 4048 ފޯމުގައި ހުރި މައުލޫމާތުތަކާއި އެފަރާތްތަކަށް ޕޮއިންޓް ދީފައިވާ ގޮތް ކޮމިޝަނުން ބަލައި ތަޙްޤީޤު ކުރިކަމަށެވެ.

4000 ފްލެޓް ލިބޭ ކަމަށް ކަނޑައެޅި ފަރާތްތަކުގެ ތެރެއިން ޝަރުތު ފުރިހަމަވުމުގައި އެއްވެސް މައްސަލައެއް ނެތްކަމަށް ފާހަގަވެފައި ވަނީ %20.7 މީހުން ކަމަށެވެ. އަދި %19.7 މީހުންނަކީ، ޝަރުޠު ހަމަވާކަމަށް ކަނޑައެޅި ނަމަވެސް އެމީހުން ހުށައަޅާފައިވާ ފޯމްތަކުގެ މައުލޫމާތަށް ބަލާއިރު ޝަރުޠު ހަމަ ނުވާ މީހުންކަމަށާއި، ފްލެޓް ލިބޭކަމަށް ކަނޑައެޅި މީހުންގެ ޖުމުލަ %59.6 (2،113) މީހުންނަކީ، ފްލެޓްދިނުމަށް ކަނޑައަޅާފައިވާ ޝަރުޠުތަކަށް ބަލާއިރު، ޝަރުޠު ހަމަނުވާ މީހުން ކަމުގައި، އޭސީސީގެ ތަޙްޤީޤަށް ފާހަގަވެފައިވާ ކަމުގައި އޭސީސީން ވަނީ ބުނެފައެވެ.

އޭސީސީން ބުނީ، ގެދޮރުވެރިޔާ ސްކީމްގެ ދަށުން، ފްލެޓަށް އެދި 20697 މީހުން ފޯމް ހުށައަޅާފައިވާއިރު، 18167 މީހުންގެ ޝަރުޠު ފުރިހަމަވާކަމަށް، ހައުސިން މިނިސްޓްރީން ކަނޑައަޅާފައިވާ ކަމަށެވެ.

އޭސީސީގެ ރައީސް އާދަމް ޝާމިލް ވިދާޅުވީ، އެއްވެސް މައްސަލައެއް ފާހަގަ ނުވާ ފަރާތްތަކަށް ފްލެޓްތައް ދޫކުރުމުގެ ކަންކަން ކުރިޔަށް ގެންދިޔުމާއިއެކު، މައްސަލަތައް ހުރި ފޯމްތަކުގެ ކަންކަން އަލުން ބެލުން ކުރިން އެކަމުގައި އުޅުނު މީހުން ނުހިމަނައި ކުރިޔަށް ގެންދިޔުމަށް ލަފާދީފައިވާ ކަމަށެވެ.